Read Komrem ROMANHEI 16 Bible Online

ROMANHEI 16 - Komrem bible

ROMANHEI 16

¹Ke’n Kenkhrea bekrup a ṭōnkatlo nisōpuinu Phoebe hi nantalei rahlâng sik kahei ngek chei.

²Pathen mihei tlohlam kasōktak a, Rōngpu rahminga amanu hi leirahlâng ruh khana nangnihei inthōpuina amadu heikhat a-om inchu leipek ruh; ajârchu amanu hi mi katamtak hei ṭhōn kaṭha kae, kei sik um kae.

³Christa Jesua kaṭōn tlopui Priscilla leh Aquila chibei kahei pek hei;

⁴anmani kei sik a anhringkhō ale’nkhang hei kae. Anchunga inpâk hêr eng, kei rōk changloa Jât-hlop bekrup rakip inum anmanpâk hei.

⁵Khan chu an-inna a’ntûp bekrup mihei hneng um chibei kahei pek hei. Asia ram a Christa kataksen hma inkeipen kaṭhōn marit Epaenetus chibei kahei pek.

⁶Nangni sik ṭōn inhnaktak a akatlo Mary kha chibei kahei pek.

⁷Ka-Jehudi changpui kurkhum kahlutpui mihei Andronicus leh Junia chibei kahei pek hei; anmani hi kei hma Christian leikachang heia sonle rakip in kaṭha nenga antamanhret hei kae.

⁸Rōngpua inloikhômna shunga kaṭhōn marit Ampliatus chibei kahei pek.

⁹Christa ṭōn katlopui Urbana leh kaṭhōn marit Stachys chibei kahei pek hei.

¹⁰Christa ṭong ajuina a’nchên jo Apelle chibei kahei pek. Aristobulus innshung mihei chibei kahei pek chei.

¹¹Ka-Jehudi changpui Herodion leh Narkissa innshunga Christianhei chibei kahei pek hei.

¹²Rōngpu ṭōnkatlo Triphaena leh Triphosa khan chu Rōngpu ṭōn katamtak katlo jo kaṭhōn marit Persis chibei kahei tlo hei.

¹³Rōngpu ṭōn inhnaktak a katlopa Rufus, khana asapa kapōa lungset a anikarôn anu kha chibei kahei pek hei.

¹⁴Asyncritus, Phlegon, Hermes, Patrobas, Hermas, khana anmani leh aka-om Christian sōpui seng chibei kahei pek chei.

¹⁵Philologas leh Julius khana Nereuas leh asōpuinu, khana Olympus leh anta-ompui Pathen mi seng chibei kahei pek hei.

¹⁶A’ntheng injôp pum a inkhat leh inkhat chibei intlo ruh. Christa bekrup rakip in nangni chibei anheitlo chei.

¹⁷Kasōpuihei kangek chei kae: nanta rahlângsa jo intheina kha akadōia inṭhenna insō leh mihei taksenna makhup-malet katlo mihei kha chîk hei ruh. Anmania inphut ahlop a om ruh.

¹⁸Ajârchu khanga akatlo mihei khan ni-Rōngpu Christa ṭōn kha tlomak hei; tâk anbing von khopna sik antatlo kae. Anṭong hri manhōi leh anbei them jâra ṭhenakasehei kha anhōn mathlâk heia kae.

¹⁹Ṭong kaṭha kadik a nantajui kha mi rakip in anthei jo, hiva jâra kei nanchunga inpâk eng. Nangni akaṭha chunga akasing sik chei leh akaṭhamak chunga ṭhenakase akachang sik chei kamadu.

²⁰Khana nilung mōngna kung Pathen in inrangtak a Seitan kha nanke thōia amanchōn rachi sik chei kae. Ni-Rōngpu Jesu Christa maritna nanchunga om rasoh.

²¹Kaṭōn tlopui Timothy in achibei ahei manrôn chei, khana ka-Jehudi changpui hei, Lucius, Jason, Sosipater he’n chibei anheitlo chei.

²²Hiva chithi inzetpa, Tertius kei in Christian chibei kahei tlochei.

²³Bekrup intûpna, katlungna inn akapu Gaius in chibei ahei tlochei. Khōpui sêr kachingpa Erastus leh nisōpui Quarta he’n anchibei anheitlo chei.

²⁴Ni-Rōngpu Jesu Christa maritna nankhenga chunga om rasoh. Amen.

²⁵Eini’n Pathen hneng lûrna kha perih! Nangni taksenna kha Jesu Christa chunga Ṭong kaṭha kahrile dungjuia leh khava kum kasôttak ale’nthup a ka-om a’n-ip ṭong kadik a’nphôngsōt dungjuia ama’n kahnet a amanngir tor cheia kae.

²⁶Hei-achang inum khava akadik kha sânkathemhei lekha mazet a inphut inlârsō jo; mi rakip in antaksena aṭong anjuina sik, akahring ṭhak Pathen ṭongpek dungjuia jât rakip manthei jo hei kae.

²⁷Akasingpen Pathen inkhat rōk kha Jesu Christa jâra ahei tik a lûrṭhak rasoh! Amen.