Read Komrem ROMANHEI 2 Bible Online

ROMANHEI 2 - Komrem bible

ROMANHEI 2

¹Eh kaṭhōn, nang in milak-hei chunga ṭong natan mo? Tu achang inum, khanga katlo mi kha rangei mandam chenhêr mak ning. Ajârchu nang in milak-hei ṭong natan pha, anmani tatlo kapōtak kha navatlo’n chu nabinga maset a’npek che kae.

²Khang khava ṭōn katlohei kha Pathen in anṭong atan pha, Pathen hi kadik tia nimanhret.

³Tâk-kha, Eh kaṭhōn, milak-hei omchen chunga ṭongkatan nang in khavatak kha natloa kae. Pathen ṭong tanna inphut katlânsōt sik eng tia namandon mo?

⁴Achangmak leh alungsetna akalen, amandona leh ade hratna hi heitea nasakmak leikachang thei. Pathen hi lungset kathem kae ti hi nang in inchêna namanhret ajârchu ama’n namalung thlengtheina sik a hlam akeitheina sik che ajonga kae.

⁵Tâk-kha malung kasak leh ṭong inngeimak malung kha nanei, khava jâra Pathen hnuk natna leh aṭongtan kadik ajōng inlâr ninga sik karâkna kalen chet nabinga sik nansyem joa kae.

⁶Ajârchu Pathen in mi rakip anṭōntlo dungjui et a tloman apek sik hei kae.

⁷Mi ṭhahrep in ṭōn kaṭha antlo manjōm ṭhak a, lûrna, kajana khana thitik kaneimak hringkhō kha anjong; anmani hneng Pathen in kumsôt hringna apek sik hei.

⁸Alak he’nchu bingta rōk anmandon khana akadik mak kha juitheina sik akadik kha anhlonsōt, anchunga Pathen hnuk natna leh inhângna kha ajōng mathlâk sik.

⁹Ṭōn kaṭhamak katlo rakip hei chunga inrengna leh natna ka-om sik, hma inkeia Jehudihei hneng khana abâna Jât-hlop hei hneng.

¹⁰Tâk-kha ṭōn kaṭha katlo rakip hei chunga Pathen in lûrna, kajana khana mōngna apek sik hei, hma inkeia Jehudihei hneng khana abâna Jât-hlop hei hneng.

¹¹Ajârchu Pathen in mi rakip ôtum neiloa in-angtlinga ṭong atan.

¹²Jât-hlop he’n Moses Dân kha neimak hei; Dân kasea setna antlo khana kathihei. Jehudi he’n Dân annei; setna antlo khana Dân in anṭong atan.

¹³Ajârchu Dân ṭong theina jâra mi kha Pathen hneng akadik changmak; tâk Dân ṭongpek tlo jâra kae.

¹⁴Jât-hlop he’n Dân kha annei mak ravâng anracham hrep a Dân ṭongpek kha antlona heia khan, anbing kalena dân kha kae hei.

¹⁵Anmani omchen khan anmalung shunga Dân ṭongpek kha inzet ti kha amalâr. Anmani dik leh dikmak ṭhen theina malung kha’num hivahi kadik tia amalâr, ajârchu anmandonna khan vōi khat leh amaset hei, vōi khat leh amandikri heia kae.

¹⁶Khava jâra kaṭong hrile Ṭong kaṭha dungjuia, khava kani ning khan Pathen in Jesu Christa ngansena, mihringhei malung shunga a’nthup mandonna rakip kha hing’hin ṭong atan sik kae.

¹⁷Nang heikhonga che mo? Nang nabinga Jehudi inkhat eng nati; Dân a khan a’nngai chea, Pathen na’nlensak pui;

¹⁸Pathen in heimo amantlo hnōm che kha nang in namanhret, akadik kadeina kha Dân a inphut inthemchûk che;

¹⁹Nang hi inchên jo che ti chu hmitkachohei hlam kaṭhōi, khō inthim kâra ka-om hei sik a vâr inkhat che kae,

²⁰mikamohei inse khana hei-inhret mak hei oja inkhat che kae. Nang in namanhret manchên, khachu Dân shunga inphut themna leh akadik pui katluk a nanei.

²¹Nang in milak-hei namanthei hei, heisa mo nabinga anthei mak che? “Inru mak ruh,” tia nahrile, tâk nang nabinga inru che mo?

²²“Jông mak ruh,” nati, nang akajông che mo? Nang in limsyem nahōt, tâk nang in bek-inn nachom mo?

²³Pathen Dân kanei tia inlensak che, tâk Dân kha nasuk khōia Pathen inzak napek mo?

²⁴Ajârchu ṭong intheng in ati, “Nangni Jehudihei jâra, Jât-hlop he’n Pathen anhrimaset a kae.”

²⁵Nang in Dân kha najui achang inchu, navuntan kha ahnemna ka-om; tâk nang in Dân kha najui mak achang inchu, nang navun naleitan hêrmak kapō che kae.

²⁶Jât-hlop vun katanmak mi’n Dân ṭongpek kha ajui achang inchu, Pathen in ama kha vun katan kapōa amandon mak sik mo?

²⁷Khang’khan nangni’n Dân inzet kha nanneia vun nantan jo ravâng Dân kha nanvōk khōi jâra Jât-hlop he’n nangni Jehudi chunga maset antapek sik chei kae; anmani chu taksa a vun antan makjen ravâng Dân kha anjuia kae.

²⁸Hei-achang inum, tu mo kadiktak a vun katan Jehudi inchênkhet kha? Avâng pônga Jehudi, taksa a vun katanpa kha changmak.

²⁹Jehudi kadik khet khachu, ashunga Jehudi kachang, amalunga vun katan mi kha kae, hivahi Rathla Intheng ṭōntlo kae, a’nzet Dân tatlosōt changmak. Khang khava mi khan mihring choi ka-ânna changloa Pathen choi ka-ânna achen.