Read Komrem ROMANHEI 3 Bible Online

ROMANHEI 3 - Komrem bible

ROMANHEI 3

¹Khan chu Jehudi he’n Jât-hlop hei kanek a hnemna heimo antanei? Achangmak leh anvuntan kha heimo ahnemna ka-om?

²Kadik, ahlam rakip a hnemna katamtak ka-om! Ahma inkeitak a Pathen in Jehudihei hneng aṭong hi amannganna heia kae.

³Anmani ṭhahrep taksenthei anchangmak jâra, Pathen kha’m taksenthei akachangmak bât sik mo?

⁴Kha chang hêrmak! Mi rakip malei kasei anchang inum, Pathen chu akadik nger sik kae. Ṭong intheng in ahri kapōa, “Nang naṭong pha, kadik a a’nlâr nger sik che kae, Nang naṭong intan pha, nang in nator nger sik kae.”

⁵Eini tatlo ṭhena hin Pathen ṭōntlo kadik kha inchênchet a malârna akachang mo? Pathen in akarâk me pha eini’n ama aṭhe niti tor mo? (Hivahi der sik a ṭong ngai kachang sik.)

⁶Changthei mak! Pathen kha akadik mak achang inchu, heikhong mo raleichung ṭong atantor sik?

⁷Tâk-kha kei dikmakna hin, ama dikna kha inchênchet a amalâra Pathen lûrna kha arazen mo? Khan chu heisa mo tûn katlung mikase inkhat a maset kalachen ṭhak sik?

⁸Chu achang inchu, “Akaṭha hongsōkna sik, setna tlo rih,” heisa mo niti mak? Hiva ṭongkhet hi kahri anti enga, mi ṭhahrep in inzak anleipek eng! Anmani rahōi sōkna dungjuia masetna kha a’npe sik hei kae.

⁹Khan chu kaṭha jo, eini Jehudi me hi, Jât-hlop hei kanek a ni-omje akaṭha jôk me mo? Kha chang hêrmak! Jehudi mi achanga, Jât-hlop achanga, mi rakip set ratha neina thōia ka-omsō jo hei ti hi kaleimalâr jo kae.

¹⁰Ṭong intheng in ahri kapōa: “Mikadik inkhatbek om mak,

¹¹mikasing tûte om mak khana Pathen inmuk tûte om mak.

¹²Anmani ankhenga Pathena inphut inhesōt jo hei; anmani ankhenga anṭhepet jo; tûte inkhat in akadik tlomak, inkhatbek om mak.

¹³Anṭonghei kha thinathei mihōnna kasip; ṭhatmak maleisei in anmalei kha ahmang, anbeia inphut mari tûr kapō thinathei ṭong kasōk;

¹⁴anbeisōa hâksêrna ṭong kakha rōk kasip,

¹⁵Mi thatna sik leh mansetna sik a anke kayâng;

¹⁶Ansena rakip a ankahnunga sukset leh inhmangna rōk andahlon.

¹⁷Anmani’n intōk inchamna hlam manhret phâkmak hei,

¹⁸khan chu Pathen ṭit inti’m anmalunga om mak.”

¹⁹Vânhnōi pumpui hi Pathen ṭong tanna thōia a-omtheina sik, khan chu mihring tûte rangei mandam achang makna sik, Dân thōia ka-om mihei chunga khan Dân shunga ka-om rakip kha mantlo sik a arei ti hi eini’n nimanhret.

²⁰Dân tamadu tlo jâra mihring tûte Pathen hmaikunga akadiktor om mak; Dân tatlosōt khachu, mi kha kaset jo ti manhretna katlo hrep kha kae.

²¹Tâk-kha tûnchu, Dân inveiloa Pathen in mihringhei hi ama leh inṭhōia kadik a ada theina sik hlam kha inlâr joa kae. Hivahi Moses Dân leh sânkathemhei khan sâkhi anleipek achang inum dân leh heite inmat mak hei.

²²Mihe’n Jesu Christa antaksen jâra Pathen in amandik hei kae. Hivahi Christa kataksen rakip chunga Pathen tatlo kha kae, ajârchu mi rakip an-in angmakna om hêrmak:

²³mi rakip kaset jo heia Pathen huksōtna a inphut inkâr jo hei.

²⁴Tâk-kha Pathen maritna kutchoi mankase khan, ning leh hnōma ani-insō Jesu Christa jâra anmani ankhenga ama leh akadiksap amanchang jo hei.

²⁵Mi’n ama antaksen jâra, athisen vânga mihringhei set rangei mandam theina achangna sik, Pathen in ama aleitōksōt jo. Ama kadik ti kha manhmuna sik Pathen in hi atlo kae. Hmalai khan chu Pathen in mihei setna kha inhmu hlemsak a aleidesôt a kae; tâk tûnlai chu adikna kha manhmuna sik a ansetnahei kha a-enmansin jo. Hing’hin ama abingkhet a akadik kae khan chu mi rakip Jesu kataksenhei kha amandik jo hei ti kha Pathen in amalâr.

²⁷Kha achang inchu, khava chunga eini a’nlensak tor me mo? Tor mak me! Khavakha hei jâra hmen? Eini’n Dân kha nijui jâra mo? Changmak, tâk nitaksen jâra kae.

²⁸Ajârchu mi inkhat in Dân ṭongpek kha ajui jâra changloa, ataksen jâr rōk a khan ama kha Pathen leh akadiksap amanchang kae, ti hi achaina nimanhret a kae.

²⁹Achangmak leh Pathen hi Jehudihei rōk Pathen akachang mo? Jât-hlop hei sik Pathen kha changmak jo mo? Akachang tlit kae.

³⁰Pathen inkhat rōk kae, ama’n Jehudihei kha antaksenna jâra ama leh amandiksap sik hei kae, khan chu Jât-hlop hei kha antaksenna jâra amandik sik hei kae.

³¹Hiva taksen hin eini Dân kha leh amanṭhen jo me mo? Changmak, chang hêrmak; Dân kha nimanngar jôk kae.