Read Komrem ROMANHEI 5 Bible Online

ROMANHEI 5 - Komrem bible

ROMANHEI 5

¹Tûnchu eini taksen jâra Pathen leh akadiksap kachang jo me, ei-ni’n Rōngpu Jesu Christa jâra Pathen leh inchamna ninei jo.

²Pathen maritna manhret pum a tuna ni-omna shunga hin ama’n taksen jâra aṭhōi manhlut me kae. Khava jâra Pathen lûrna nichen sik tia inhōrna nineia a’n-or me kae!

³Khana nikhōdeng theina kha’num in-or me, ajârchu khōdeng theina khan dehratna amasō,

⁴dehratna khan Pathen manṭhatna amasō, manṭhatna khan inhōrna amasō ti eini’n nimanhret.

⁵Hiva inhōrna hin malung tlâksamna apek mak, ajârchu Pathen kutchoi pek me Rathla Intheng vâng khan Pathen in alungsetna kha nimalung shunga ajōngsun mathlâk pek mea kae.

⁶Ajârchu eini’n ratha heite nineimak laitak, Pathen takadei phatak a khan Christa kha mikaṭhamak-hei sik kathi jo.

⁷Mikadik inkhat sik mi inkhat athi sik hi a’ntak inkhat kae. Mikaṭha inkhat sik mi inkhat akathi ngam katlunga ka-om thei.

⁸Tâk-kha Pathen in eini hi heituk-hrep mo alungset me ti kha amalâr jo, khachu eini’n mikaset nileichang laitak Christa kha eini sik a kathi jo.

⁹Tûnchu ama thisen jâra eini hi Pathen leh amandiksap jo me; kha achang inchu, Pathen hnuk natna inphut heituk kakhe chet a ama’n ahuksōt sik jo me mo!

¹⁰Eini hi Pathen kadōi leikachang me; tâk asapa thi jâra khan ama’n aṭhōn amanchang jo me. Tûnchu eini Pathen ṭhōn kha kachang jo me, khan chu Christa hringkhō khan heituk ahukchet sik jo me mo!

¹¹Tâk-kha khaseng rōk kha changmak; tûn eini Pathen ṭhōna ani kasyem ni-Rōngpu Jesu Christa a Pathen ṭōntlo jâra khan eini inpâk a katlai jo me.

¹²Mi inkhat jâra ralei pumpui chu-nga setna hongkahlut, khana setna khan thina ahei choi manhlut. Khava thina kha mihring rakip chunga katlung jo ajârchu mi rakip in setna antlo jo.

¹³Dân a’npek mak hma ralei-chunga setna kha leika-om, tâk Dân om makna hmun a khan setnahei tintana kha leiom mak.

¹⁴Achang ravâng Pathen ṭongpek aleikasuk khōi Adam kapōa setna aleikatlo mak hei chunga kapha, Adam pha a inphut Moses pha katlunga, thina khan mihring jât-hei chunga vai aleirôn joa kae. Adam khachu akajōng sikpa lim inkhat kapō kae.

¹⁵Tâk-kha 2 hei kha thakhat changmak hei ajârchu Pathen kutchoi pek mankase kha Adam setna kapō kha changmak. Mi inkhat set jâra mi katamtak kathi hei ti hi chu akadik kae. Tâk-kha Pathen maritna khachu akalen chet kae, khana mi inkhat ti chu Jesu Christa maritna vânga mi katamtak hei hneng apek mankase kutchoi kha’n kalen chet a kae.

¹⁶Pathen kutchoi pek kha leh mi inkhat setna kha an-in angmakna inkhat ka-om. Mi inkhat vōi khat asetsōa khan, “Ṭhena”, ṭongtan kha achunga ka-om; tâk setna katamtak ahong omsōa, eini sik rahōi sōklo kutchoi pek “Ṭhena ka-om mak”, inti kha kahong.

¹⁷Khava mi inkhat set-tloa inphut thina akahong khan vai arôn inphut jo ti hi akadik kae. Tâk-kha mi inkhat ti chu Jesu Christa tatlosōt kara khan chu heituk-hrep a akalen jôk sik mo! Pathen maritna katamtak kachen hei, khana mankasea ama leh mandik sapna kachen hei khan Christa a hringkhō shunga vai anrôn sik.

¹⁸Khan chu, khava inkhat set jâra mi rakip maset anchang jo kapōa, kha leh in-anghrep a mi inkhat ṭongjui jâra mi katamtak Pathen leh amandiksap sik hei.

¹⁹Mi inkhat ṭong juimak jâra mi katamtak mikaset amanchang hei kapōa, mi inkhat ṭongjui jâra mi katamtak Pathen leh amandiksap sik hei kae.

²⁰Khan chu tloṭhe pungna sik a Dân kha ahon’rôn inhlut kae; tâk set pungna hmun a khan, Pathen maritna kha’m kapungsa chet a kae.

²¹Khan chu, setna khan thina vânga vai arôn kapōa, ni-Rōngpu Jesu Christa jâra kumsôt hringnating ani kaṭhōi Pathen maritna khan dikna vânga vai arôn.