Read Komrem ROMANHEI 6 Bible Online

ROMANHEI 6 - Komrem bible

ROMANHEI 6

¹Khan chu eini’n heimo nihri sik? Pathen maritna kha apungsana sik setna eini aka-om ṭhak sik me mo?

²Kha changmak! Eini setna kathi jo me, heikhong mo setna shunga alaka-om ṭhak tor sik me?

³Ajârchu, eini Jesu Christa leh inchunna shunga tui hlutna nichen pha, eini ama thina shunga inchun jo me ti hi inchêna nanmanhret.

⁴Pa lûrna rathahrat khan Christa kha thina inphut akei mathōi kapōa eini hringkhōther inkhat a nihringna sik, eini tuihlut a khan ama leh inphûmsap jo me khana athina kha nichenpui sap jo kae.

⁵Ajârchu, ama thina shunga khan ama leh inkhat nichang jo jâra, kha leh in-anghrep a ama keimathōi changna shunga khan inkhat akachang sik me kae.

⁶Khana eini setna sōk nichang nôk makna sik, nibing set ratha hratna kha manhmangna sik, ni-omchen marō kha thingrake chunga Christa leh thatsap jo hei kae, ti hi eini’n nimanhret.

⁷Ajârchu mihei anthi pha, anmani kha set rathahrat a inphut masōsōt jo hei kae.

⁸Eini Christa leh akathisap me nichang jo jâra, ama leh akahringsap sik me ti hi nitaksena kae.

⁹Ajârchu, Christa kha thina inphut keimatho kachang jo, khana thi nôk hêrmak jo ning, thina khan ama chunga ratha neinôk hêrmak jo ning ti hi eini’n nimanhret.

¹⁰Khan chu, ama’n athi jâra thina’n achunga ratha neimak jo; khana tûnchu Pathen leh inchunna shunga akahring jo kae.

¹¹Khavakha leh in-anghrep a nangni setna chungchânga khan chu akathi jo chei, tâk Jesu Christa a Pathen leh inchunna shunga khan chu akahring jo chei inkhat a a’ndon sik chei kae.

¹²Nanbing taksa tamadu rangei ṭong juina sik a, setna kha akathithei nantaksa chunga vai arôn hêrmak sik kae.

¹³Khan chu nantaksa bâk inkhat rōk um akaṭhamak ṭōn hmangna sik nantaphe mak sik kae. Khava kanek a, akadik ṭōn tlona sik nantaksa pumpui phesōt una, thina inphut hringna nanhei kaṭhōi Pathen hneng nanbinga inpek inhlut ruh.

¹⁴Ajârchu, nangni Dân thōia akahring changmak jo chei, Pathen maritna thōia akahring jo chei kae, setna kha nankapu akachang hêrmak sik kae.

¹⁵Khan chu heimo? Eini Dân thōia ni-om mak jo jâra, Pathen maritna thōia aka-om nichang jo jâra, setna nitlo sik mo? Kha changmak!

¹⁶Nangni’n tu mo inkhat thōia sōk changna sik nan-inpek inhlut pha aṭong nantajui nakapupa sōkkhet nanchang jo kha nanmanhret a kae, thina heikarôn sōt setna sōk achang inum, khana ṭongjuia Pathen leh akadik a dasapna sik sōk kha achang inum.

¹⁷Tâk-kha Pathen kha manpâk a om rasoh! Ajârchu nangni vōi khat setna sōk nanleichang inum, tûnchu nanta rahlâng jo mantheina chei shunga akadik nantahmu kha malung kahluttak a nanjui joa kae.

¹⁸Nangni setna inphut masō jo chei kae, khana dikna sōk akachang jo chei kae.

¹⁹(Mihring bing ngaia nantlâksam jâra ke’n nitina ṭonghri ngaihrep kahong hmang kae.) Nangni pha khat a ṭhatmak tlona sik a’nthengmak leh ṭhatmak sōk sik a nanbinga pum inpea le’npek sōt jo chei. Khava kapōa tûnchu, a’ntheng kha tlona sik, omchen kadik sōk sik a nanbinga pum inpek a a’npek sōt sik chei kae.

²⁰Nangni setna sōk nanlei changlai, omchen kadik a inphut masōsōt leikachang chei.

²¹Nangni tuna nanta’n zakpui omchen nanta leitlo hei khana inphut akaṭha heimo nantachen aka-om jo? Khavahei tarôn sōt khachu thina kae.

²²Tâk-kha tûnchu nangni setna inphut masō kachang jo chei, Pathen sōk akachang jo chei kae. Ṭhatchômna nantahmu khachu hringkhō inkhat ahnenga nanta tōksōtpet kha kae, khana khava tahei rôn sōt khachu kumleikōa hringna kae.

²³Ajârchu setna tapek tloman khachu thina kae; tâk Pathen kutchoi pek mankase khachu ni-Rōngpu Jesu Christa leh inchunna shunga kumsôt hringna kha kae.