Read Komrem ROMANHEI 7 Bible Online

ROMANHEI 7 - Komrem bible

ROMANHEI 7

¹Kasōpuihei, kahri sik hi nangni’n inchêna nanmanhret sik, ajârchu dân chungchânga nankhenga nanmanhret a kae. Mihe’n anhring lai seng rōk dân in anchunga vai arôn kae.

²Man enna inkhat a, puise kanei nuhmei inkhat, apuise hring lai seng amanu kha dân khan apuisea akhit kae; tâk apuise kha athi jo’nchu dân in amanu kha apuisea aleikhit a inphut amasō jo.

³Khava jâra apuise hring lai seng amanu kha pase hlop inkhat leh ava-om inchu, amanu kha mikajông inti sik; tâk apuise kha athi jo’nchu, kadiktak a amanu kha masō jo kae; pase hlop inkhat leh sanghram avachang jo’num akajông changmak jo.

⁴Khava ângphunga kasōpuihei, nangni’m khanga sik chei kae. Ajârchu nangni Christa taksa bâk kha nanchang jâra, Dân tak a nimandon inchu nangni’m akathi jo chei kae; tûnchu hringkhō hi Pathen sik a pui katluk a hmangna sik thina inphut akathōi sōtpa ta jo chei kha kae.

⁵Heijâra mo niti’nchu, mihring ngai dungjuia nihring lai hin Dân in setna tamadu leh tarangei kha akachok mathōia nitaksa chunga khan ṭōn atlo, khan chu nitlo rakip kha thina vakachang.

⁶Tûnchu, hei-achang inum, Dân a inphut kasōk jo me, ajârchu pha khat a eini kurkhum a anileikada hnenga khan chu akathi jo me kae. Tûnchu dân marō inzet dungjuia khan eini’n nirazen changmak jo, tâk Rathla hlamthera nirazen jo kae.

⁷Khan chu, Dân kha binga setna pui katluk kae niti sik mo? Changmak! Tâk-kha Dân khan setna kha heimo kae ti amanthei eng. Ajârchu Dân khan, “Minei chunga thangset tlomak roh,” aleiti mak inchu, ke’n thangset inti kha kalei manhret mak sik kae.

⁸Ṭongpek a inphut setna khan hlam inkot ahmu sōt a bing thangsetna rakip kashunga akachok mathōia kae. Ajârchu Dân omloa setna kha akathi kae.

⁹Kei khet um vōi khat chu Dân omloa leikahring eng, tâk ṭongpek kha ahong hlut pha setna kha hong kahringsōt jo,

¹⁰khana kei kathi jo eng. Khana hringna anikapek sik ṭongpek khan kei chunga chu thina jôk apek jo eng.

¹¹Ajârchu setna khan ahlam inkot ahmu sōt a ṭongpek kha ahmangchâk a kei ahōn enga athat jo enga kae.

¹²Khan chu, Dân kha abinga intheng, khana ṭongpek kha intheng, kadik, khana kaṭha.

¹³Khan chu akaṭha kha kei sik a thina akachang jo mo? Changmak! Khava katlosōt khachu setna kae; setna ngai kha kadiktak a a’nlârsōt theina sik, setna khan akaṭha kha ahmangchâk a kei chunga thina ahei rôn sōt kae. Khang’khan ṭongpek kha ahmangchâk a setna kha akakhôk chet setna hongkachang jo.

¹⁴Dân hi rathlatinga achang kha eini’n nimanhret; tâk kei chu rathla langa changmak enga, setna sōk inkhat a jōrsōt jo eng kae.

¹⁵Ke’n heimo katlo manhret mak eng; ajârchu ke’n kamadu ṭōn kha tlomak enga, kamater ṭōn jôk kha katlo ria kae.

¹⁶Ke’n kamadumak kha katlo jâra, Dân kha kadik ti kahnōmna kha a’nlâr kae.

¹⁷Khava jâra hiva akatlokhet kha kei changmak eng, kashunga ka-om setna tatlo jôk kae.

¹⁸Karalei mihring ngai hin, kashunga akaṭha inti om mak ti ke’n kamanhret. Ajârchu kashunga ṭōn kaṭha tlo hnōmna a-om ravâng, ke’n kha tlotor mak eng.

¹⁹Ke’n ṭōn kaṭha katlo hnōm kha tlomak enga, katlo hnōm mak ṭōnse jôk kha katlo ri jo.

²⁰Ke’n katlo hnōm ṭōn kha katlomak achang inchu akatlo kha kei changmak eng; khava kahlânga kashunga ka-om setna tatlo kae.

²¹Achang jâra hiva dân hin ṭōn atlo ti kha kahmu sōt khachu: ṭōn kaṭha katlo hnōm pha, ṭōnse rōk jôk kakadei ri jo.

²²Kashung inchu Pathen Dân kha amadu.

²³Tâk-kha kataksa chunga ṭōnkatlo dân hlop inkhat kahmu sōt, khava dân khan kamanṭhat dân adōi kha kahmu sōt. Khava khan kataksa chunga ṭōnkatlo setna dân hnenga kurkhum mi amanchang jo eng.

²⁴Heituk a akahōi mak mi jo eng mo! Thina sik a ani kaṭhōi hiva kataksa inphut hin tu’n mo kei akatlânsōt sik eng?

²⁵Ni-Rōngpu Jesu Christa inphut hiva akatlosōt Pathen kha manpâk a om rasoh! Khan chu, hivahi ka-omje kha kae: kabinga chu Pathen dân hi kamalung rōk in arazen tor, khana kamihring ngai khan chu setna dân kha arazen.