Read Komrem ROMANHEI 8 Bible Online

ROMANHEI 8 - Komrem bible

ROMANHEI 8

¹Tûnchu Jesu Christa leh inchunna akahring mihei sik a masetna inti om mak jo.

²Ajârchu Rathla dân kha Christa Jesu leh inchunna hringkhō shunga aṭhōi manhlut jo me jâra setna dân leh thina inphut amasō jo eng kae.

³Ralei mihring hi angaia atlâksam jâra, Dân in atlo tor mak kha Pathen in atlo jo. Setna kator sik a, set kasip mihring ngai kapōa kajōng, Asapa khet kha ajōngtir, mihring ngai shunga setna kha maset apek jo.

⁴Taksa mihring dungjuia akahring changloa, Rathla dungjuia akahring Dân tamadu akadik kha, eini hnenga inphut pui katluk a atlaina sik a hivahi Pathen tatlosōt kae.

⁵Mihring ngai mantheina dungjuia akahring hei kha, anlungri kha anmihring ngai tamadu khan vai arôn kae. Rathla mantheina dungjuia akahring hei kha, anlungri kha Rathla tamadu khan vai arôn kae.

⁶Mihring ngai tamadu vairôn khan thina kha amansōk; Rathla tamadu vairônna khan chu hringna leh mōngna kha amansōk.

⁷Khava jâra anmihring ngai tamadu vairôn hei khachu Pathen kadōi hongkachang hei; ajârchu Pathen Dân kha juimak heia kae, khana inchêntak a ajui um juitor mak hei.

⁸Mihring ngai kajuihei khan Pathen malung mantlai tor mak hei.

⁹Tâk-kha nangni chu mihring ngai tamanthei chei dungjuia hringmak chei; khava kanek a, Pathen Rathla kha nanshunga kadiktak a a-om inchu, Rathla tamanthei chei dungjuia akahring jo chei kae. Tu achang inum Christa Rathla kaneimak mi kha Christa mi changmak.

¹⁰Tâk-kha Christa kha nanshunga a-om inchu Rathla kha nangni sik a hringna kae; ajârchu setna jâra nantaksa hei kha athi sik inum nangni chu Pathen leh kadik a dasap jo chei kae.

¹¹Thina inphut Jesu akakei inthoi Pathen rathla kha nanshunga a-om inchu, Christa kha thia inphut akakei inthōipa Rathla nanshunga aka-om khan nantaksa akathihei kha hringna ahongpek nôk sik hei.

¹²Khava jâra kasōpuihei, eini’n karâkna inkhat ninei, khavakha mihring ngai tamadu dungjuia hringna kha changmak.

¹³Ajârchu nangni mihring ngai tamadu dungjuia nanhring inchu, kathi sik chei; tâk Rathla khan nanset ṭōntlohei kha nanmanhai inchu, kahring sik chei.

¹⁴Pathen Rathla taṭhōi hei seng kha Pathen sahei kae.

¹⁵Heijâra mo niti’nchu Pathen tapek chei Rathla khan nangni sōk manchang mak chei khana ṭitna amannei mak; khava kanek a Rathla khan nangni Pathen sahei amanchang jo chei. Khana khava Rathla hrat vâng khan eini’n Pathen hneng, “Apa, kapa,” amantitor mea kae.

¹⁶Eini Pathen sa nichang kha phôngsōtna sik a Pathen Rathla khan eini rathla kha a’nchunpuia kae.

¹⁷Eini Pathen sa nichang jo jâra, amihei sik a ada mahâmṭhatna khana Christa sik a ada mahâmṭhatna kha’m nichensap sik jo; ajârchu tûn eini’n Christa inrengna kha nidepui inchu, alûrna kha’m nichenpui sik kae.

¹⁸Tûn pha shunga eini’n khōdeng theina nide manrim hi leh hnunga nichunga ajōng katlung sik lûrna kha tethei changmak ning tia kamandon.

¹⁹Pathen in asahei ajōng malâr sik hei kha kutsyem rakip in antahngâk hla et kae.

²⁰Ajârchu kutsyem kha abitin hui mathlung mak tia maset inpek jo, abing lungdo changmak, tâk Pathen in hinga sik tia alungdo kha kae. Kha’num inhōrpuina sik hi ka-om,

²¹khachu kutsyem hi asōk changna inphut aṭop inhmang makna sik ni khat masōa alaka-om sik kae, khana Pathen sahei hi akalûrtak ning leh hnōm kha achanpui sik hei kae.

²²Ajârchu nai kanei sik a nupui naiha aphut kapōa tûn katlunga hin kutsyem rakip nat kade-hla a inkōi heia kae.

²³Tâk-kha kutsyem rōk kha changmak, eini hma inkeipena Pathen kutchoi Rathla kachen me hi’m Pathen in asa amanchangna sik me khana nitaksa pumpui ning leh hnōma amasōna sik me nihngâk hla a nishungting inkōia ka-om et me.

²⁴Ajârchu inhōrna vâng eini hukmanhring akachang me kae; tâk eini’n ni’nhōrna kha nileihmusa jo achang inchu, khavakha inhōrna kadik changmak. Ajârchu heikhat hmusa jo chunga tu mo a’nhōr phung aka-om?

²⁵Tâk-kha hmumak chunga a’nhōr me achang inchu, khava sik a dehrat leh inṭhōia nihngâk kae.

²⁶Khavakha leh in-anghrep a Rathla kha eini nitlâksam jâra nika-bôm sik a akajōng kae. Ajârchu, eini’n heikhong mo derhlam kasōk manhret mak me; Rathla khan eini sik Pathen hneng hritheilo leoa inkōia angek pek mea kae.

²⁷Khana nimalung shung kahmu sō tor Pathen khan Rathla tamandon kha heimo ti hi amanhret; ajârchu Rathla khan Pathen lungdo dungjuia, amihei kahlanga Pathen hneng angek pek hei.

²⁸Ajârchu Pathen mantlukna dungjuia abek hei, ama inlungset mihei ṭhatna sik, heirakip a ṭōn atlo ti hi eini’n nimanhret.

²⁹Sapa kha sōpui katamtak kâra upapen achangna sik, Pathen talei kadeisōtsa hei kha Sapa kapōa anhong changna sik, ahlop a aṭhensōt heia kae.

³⁰Khana Pathen in ahlop a adasōt hei kha abek hei; ama’n abek hei kha, ama leh inṭhōia kadik a adasap hei; khana alûrna kha anmani achanpui sap hei.

³¹Hivaseng chunga hin eini’n heimo nihri ngam sik? Pathen kha nilanga a’nṭang inchu, tu mo anikadōi tor sik?

³²Ama’n asapa kapha maner loa nikhenga sik a atōksōt jo! Ama’n asapa kha hmen apek sōt jo me achang inchu, heirakip hi mankasea apek mak sik me mo?

³³Tu’n mo Pathen takadeisōt mihei kha maset apek sik hei? Pathen ama khet in anṭhena om mak tia ahrisōt jo kae.

³⁴Khan chu tu’n mo anmani masetna apek sik hei? Akathi jo Christa Jesu khana Pathen changting a’n-onga eini sik akaderpa kha’num tlomak ning.

³⁵Khava jâra Christa lungsetna inphut tu’n mo eini akeiṭhentor sik me? Malung bōina’n mo, khōdeng theina’n mo, suk manrimna’n mo, vonṭâm inmo, sara changna’n mo, khôk na’n mo, thina’n mo?

³⁶Hing’hin Ṭong Inthenga inzet: “Nangni sik jâra keini pha rakip a thinathei kha kanthōk; that sik a keisôn kemōngte kapōa antlo manrim ung.”

³⁷Emak, khahei seng chunga khan, ani’nlungset ama jâra pui katluk torna kha nichen jo!

³⁸Ajârchu ama lungsetna mea inphut heite’n aṭhen tor mak ning ti ke’n inchêna kamanhret. Thina achanga, hringna achanga, marvân ngeva anchanga, marvân chunga ratha kaneihei anchanga, tûn achanga, hnunga achang inum,

³⁹raleichunga leh ralei thōia achanga, kutsyem rakip in achanga, Jesu Christa jâra Pathen lungsetna nita kachang jo khana inphut heite’n aṭhen tor mak ning.