Read Komrem CORINTHIANHEI INKHATNA 1 Bible Online

CORINTHIANHEI INKHATNA 1 - Komrem bible

CORINTHIANHEI INKHATNA 1

¹Pathen lungdo dungjuia Jesu Christa sonle sik a beksōt Paul a inphut leh nisōpui Sosthenes a inphut —

²Corinth a ka-om Pathen bekrup, Pathen mi intheng kachang sik a abek hei seng, Jesu Christa leh inchunna shunga ami kachang jo hei, eini leh anmani Rōngpu kachang ni-Rōngpu Jesu Christa inmuk, khana hmun rakip a ka-om mi rakip hneng:

³Nipa Pathen leh ni-Rōngpu Jesu Christa’n maritna leh lung mōngna pek chei rasoh.

⁴Pathen in Jesu Christa a maritna apek chei jâra, nanchungchânga Pathen kamanpâk ṭhak.

⁵Ajârchu nangni Christa leh nan-inchun jâra heirakip hrisōt theina, heirakip manhret theina nannei jo, heirakip a akahao kachang jo chei.

⁶Christa chungchânga ṭong kha nanshunga kahnet a inphunsōt jo,

⁷khachu ni-Rōngpu Jesu Christa ajōng inphông sik nanhngâkna shunga nangni’n mahâmṭhatna heite inkhatbek chenloa om mak chei.

⁸Khana ni-Rōngpu Jesu Christa Kani ning khan nangni ṭhenakase nanchangna sik, achaina katlunga kahnet a ada sik chei.

⁹Asapa, ni-Rōngpu Jesu Christa leh inloikhômna kanei sik a nankabek inhlut Pathen kha taksen sik kae.

¹⁰Kasōpuihei, ni-Rōngpu Jesu Christa torna ratha vâng ke’n nankhenga kangek chei kae; nankâra inkhōiṭhenna a-om makna sik, ṭong inkhat nanhrina chunga intōk ruh.

¹¹Ajârchu sōpuihei, nankâra innâk-inse ka-om ti ṭong hi Chloe innshung he’n kahnenga inchêntak a anhonghria kae.

¹²Ke’n hinga heihri rong: nangni inkha-khat in ṭong kha ahlop et a nanhria kae. Inkhat in, “Kei Paul kajui,” ati; khana ahlop inkhat in, “Kei Apollos kajui,” ati; ahlop inkhat in, “Kei Peter kajui,” ati; khana ahlop inkhat in, “Kei Christa kajui,” ati.

¹³Christa kha arup-rup a ankhōiṭhen jo! Nangni sik thingrake chunga aleikathi kha Paul mo? Paul sonle sik a nangni tuimanhlut aleikachang chei mo?

¹⁴Crispus leh Gaius teilo alak tûte ke’n tui manhlut mak hei eng, khava jâra Pathen kamanpâk,

¹⁵Khava jâra tûte’n nangni kei sonle sik a tuimanhlut akachang chei kae titheimak jo hei ning.

¹⁶(Oh Kadik, Stephanas leh a-innshung mihe’m chu ke’n tui kamanhlut hei, tâk alak chu tui kamanhlut mandonsōt tor mak eng.)

¹⁷Christa khan tui manhlutna katlo sik a kei atir mak. Ṭong kaṭha kahri sik atir eng kae. Khana thingrake chunga inchêntak a Christa athina rathahrat kha hnemna kase achang makna sik, mihring singna hmang loa aṭong kha kahri sik kae.

¹⁸Ajârchu thingrake chunga Christa athi ṭong inhri hi a’nhmanghei hneng chu invetna kae; tâk hukmanhring kachang eini sik a chu, hivahi Pathen ratha hratna kha kae.

¹⁹Ṭong intheng in ahri: “Ke’n akasinghei ansingna kasukset sik, Ke’n akathemhei manhretna kha hmang loa kada sik.”

²⁰Chu achang inchu akasinghei, akathemhei, hiva raleichunga mi makhena kathemhei kha khon mo adahlon jo hei? Pathen in hiva raleichung singna hi akamo amanchang jo!

²¹Mihringhei binga singna vâng Pathen manhretna nei sik kha Pathen singna khan man-e theimak. Khava kanek a, eini “mikamo” inti hei ṭong hrilea inphut akataksenhei hukmanhringna sik Pathen in amantluk kae.

²²Hiva manchên theina sik a Jehudi he’n ṭōn-inlak anmadu, khana Greek he’n singna anjong.

²³Tâk-kha keini’nchu thingrake chunga Christa antamakhei hlon kha kanhri manthang; hiva ṭong hi Jehudihei sik a ankadōi khana Jât-hlop hei sik a invetna kae;

²⁴Tâk Jehudi anchanga Jât-hlop hei anchanga, Pathen tabek mihei sik a khan chu hiva ṭong hi Pathen rathahrat leh Pathen singna, Christa kha kae.

²⁵Ajârchu Pathen akamozek ka-ang kha, mihring kasing kanek a kasing jôk, khana Pathen akatlasamzek ka-ang kha mihring rathahrat kanek a kahrat jôk a kae.

²⁶Kasōpuihei, Pathen in abeklai chei khan nangni khong khova mi mo aleikachang chei ti tûnhin madon ruh. Mihring mandonna dungjuia, akasing, tlotorna kanei, innshung kaṭha mi ajingtehrep leikachang chei.

²⁷Tâk-kha a’nsingsak hei manzakna sik, raleichung in akamoa amandon hei kha Pathen in akadei hei, khana tlotorna kaneihei kha manzakna sik, raleichung in akatlasama amandon hei kha Pathen in akadei hei.

²⁸Khang’khan raleichung mi’n apui karônpen tia antamandon hei kha suk manhmangna sik, raleichunga hmumasi hei leh heitea teimakpen hei kha Pathen in akadei heia kae.

²⁹Hivahi Pathen hmaikunga mihring tûte inlensaktor mak ning tina kae.

³⁰Tâk-kha nangni chu Pathen in Christa Jesua inchunna shunga aṭhōi manhlut jo chei, khana Pathen in Christa kha eini singna amanchang joa kae. Ama jâra Pathen leh kadik a adasap jo me, eini Pathen mi intheng kachang jo me, khana eini ning leh hnōma amasō jo me kae.

³¹Khava jâra ṭong intheng in ahri, “Tu achang inum a’nlensak hnōm a-om inchu Rōngpu tatlo chunga inlensak rasoh.”