Read Komrem CORINTHIANHEI INKHATNA 10 Bible Online

CORINTHIANHEI INKHATNA 10 - Komrem bible

CORINTHIANHEI INKHATNA 10

¹Sōpuihei, nipusōn he’n Moses kahnung anleijuilai anchunga heimo aleikasōk ti nantamanhret sik kamadu. Anmani ankhenga sumtuk in aleika-unsi hei, ankhenga Tuipui Kasen kha kadam a anleirakana kae.

²Anmani Moses kahnung kajui kachang heia ankhenga tui leh sumtuk shunga tuimanhlut leikachang jo hei.

³Ankhenga rathla bu inkhat rōk anleisâksōm,

⁴khana ankhenga rathla tui inkhat rōk anlei insōma kae. Anmani leh ale’nṭhōiṭhak rathla hlungpuia inphut tui anlei in. Khava hlungpui kha Christa khet leikachang.

⁵Kha achang inum anmani akatam lang chunga Pathen malung leitlai mak, khava jâra nêrdiram a ankathi kalōng le’nhlon inthek a kae.

⁶Tûn hivaseng hei hi einihei mansena sik tekâk hei kae, anmani taleitlo kapōa ṭhatmak kha nimadu makna sik aṭongkam pekna me kha kae,

⁷anmani ṭhahrep tatlo kapōa limsyem nikamuk makna sik a kae. Ṭong intheng in ahri kapōa, “Akasâk sik leh aka-in sik a a’n-ong mihei kha ju ina hōina leh jôngnating inhe hei.”

⁸Anmani ṭhahrep taleitlo jông leh kîk jâra ni khat a mi 23,000 akathi inhmanghei kapōa eini chu niṭhehêr mak sik kae.

⁹Anmani ṭhahrep taleitlo, Rōngpu kha anlei enmansin a mari’n aleimachuk hlon hei kapōa eini’nchu ni-enmansin mak sik kae.

¹⁰Anmani kâra ṭhahrep, a-inphin anleitam jâra Thina ngeva khan aleithat hei kapōa, niṭong nimantam hêrmak sik kae.

¹¹Anmani chunga hihei rakip aleikasōk kha milak-hei man enna sik a kae, khana einihei ṭong-gîkna pekna sik a a’nzet inhlut jo hei kae. Ajârchu pha inchaina ahong sik ting khan eini aka-om jo me kae.

¹²Kei kahnet a kangirtor jo eng tia a’nngam mihei kha, anthlûk makna sik a’nsingthei chet sik hei kae.

¹³N antaratō jo mathlemna rakip kha mihring hneng akahong phung rōk hei kha kae. Tâk-kha Pathen chu aṭong tepna kha ajui mathlung, khana ama’n nanngir inhnetna ratha nantanei kakhea mathlem sik chei kha hnōm mak ning; mathlemna nan-om pha, detorna sik ratha apek sik chei; khan chu apesōt theina hlam um apek sik chei.

¹⁴Khava jâra kaṭhōn marit hei, limsyem kamukna inphut sesōt ruh.

¹⁵Mikasinghei hnenga kapōa nanhnenga kahri kae; kaṭong hri hei hi nanbinga kaṭha mandon ruh.

¹⁶Rōngpu thlai sâkna nihmang kōklei khana khava sik a Pathen manpâkna ninei kha: khana inphut ni-in pha, Christa thisen shunga chen ninei jo kae. Khana buhlom her hnia khōi kha, nisâk pha Christa taksa shunga chen ninei jo kae.

¹⁷Ajârchu buhlom kha inkhat rōk kae, eini nikhenga nitam inum, taksa pumkhat rōk me kae; ajârchu eini’n buhlom inkhat rōk kha nikhenga insem mea kae.

¹⁸Israel mihei kha mandon hei ruh; an-inthoina thlai kasâk hei khan maichâma Pathen ṭōn kha’m a’nsem hei kae.

¹⁹Khan chu hivahi limsyem a-emak leh kamukna thlai kha heikhat hongkachang tia kahrina mo kae?

²⁰Kha changmak! Ke’n kahri khachu hi kae, Jât-hlop he’n maichâma an-inthoina khachu ṭaihei hnenga anpek, Pathen hnenga changmak. Khana ṭaihei leh chen nantaneisōm sik madu mak chei eng.

²¹Nangni’n Rōngpu kōklei leh ṭaihei kōklei inmankop theimak tin chei; khan chu Rōngpu dokhâng leh ṭaihei dokhânga sâk manchun theimak tin chei.

²²Khana Rōngpu thangsetna sik eini’n nitlo sik mo? Ama kanek a eini kahrat me tia a’ndon me mo?

²³Anmani’n anti, “Eini’n heirakip tlo aja.” Khavakha kadik, tâk heirakip akaṭhapet changmak. “Eini’n heirakip tlo aja,” tâk heirakip akahnempet changmak.

²⁴Nangni tute’num ama bing maduna rōk nanta-en mak sik kae; tâk milak-hei maduna kha nanta-en sik kae.

²⁵Manhretṭhen theina malung nannei jâra ṭongderna kasea jōrtlânga a’njōr hme rakip nansâk theia kae.

²⁶Ajârchu ṭong intheng in ahri kapōa, “Raleichung leh ashunga ka-om rakip Rōngpu tahei kae.”

²⁷Pathen ka-ôimak mi inkhat in bu kasâk sik abek chea akase sik a na’ntluk inchu, mandon ṭhen theina nanei jâra ṭongderna kasea nahma antadônpek che kha sâk roh.

²⁸Tâk-kha tu mo inkhat in nahnenga, “Hivahi inthoina thlai kae,” atia amanthei che’nchu, na’ntheipa sik jâra leh mandon ṭhen theina jâra khava thlai kha sâk mak roh,

²⁹khavakha nang mandon ṭhen theina sik jâra rōk changloa nakahri pekpa mandon ṭhen theina sik jâra kati kae. Tu mo inkhat in ader, “Khan chu kaṭha jo, kei ning leh hnōm kha mi inkhat mandon ṭhen theina’n heisa mo akhârtan sik?

³⁰Ke’n kathlâi sâk a Pathen kamanpâk inchu, manpâkna kanei jo thlai chunga khan heijâra mo mi inkhat in amaset sik eng?”

³¹Kaṭha jo, heirakip nantlona chunga, nansâkna nan-inna achanga, Pathen lûrna sik a tlo ruh.

³²Jehudihei leh Jât-hlop hei khana Pathen bekrup-hei bōina kapek mak hringkhōa om ruh.

³³Kei tatlo kapōa tlo ruh. Katlona rakip a mi rakip tlaina sik a intluk eng, kabing ṭhatna rōk mandon mak eng, tâk anmani huktheina sik a mi rakip ṭhatna sik katlo.