Read Komrem CORINTHIANHEI INKHATNA 11 Bible Online

CORINTHIANHEI INKHATNA 11 - Komrem bible

CORINTHIANHEI INKHATNA 11

¹Ke’n Christa omchen kamanchu kapōa, nangni’n kei omchen manchu ruh.

²Nangni’n kei nanmandon ṭhak eng jâra leh kaman theina chei kha nanjui ṭhak jâra kamanpâk chei.

³Tâk-kha hivahi nantamanhret sik kamadu, ti chu, Christa kha pase rakip chunga kae, pase kha anuhmei chunga kae, khana Pathen kha Christa chunga kae.

⁴Khava jâra kamukna hmun a mipui intûpna pha, pase inkhat in Pathen ṭong ahrilai leh derlai pōnlu a’nkhu’n chu Christa kha inzak apek kae.

⁵Khan chu nuhmei tu achang inum mipui kamukna pha Pathen ṭong ahrilai leh aderlai alu chunga heite inkhulo achang inchu, amanu khan apuise kajana aneimak kae; ama leh nuhmei lu kavo inkhat leh an-in angmakna om mak.

⁶Nuhmeinu khan pōnlu a’nkhumak achang inchu asam invō rasoh. Ajârchu lu mankek leh sam ep hi nuhmei sik a inzakna achang jâra, amanu khan pōnlu a’nkhu sik kae.

⁷Pase inkhat in pōnlu a’nkhu sik rangei mak, ajârchu ama’n Pathen lûrna leh ahme kha ara-âng kae. Tâk-kha nuhmei inchu pase lûrna kha ara-âng kae;

⁸ajârchu pase kha nuhmeia inphut a’nsyem changmak, tâk pasea inphut nuhmei kha a’nsyem kae.

⁹Khan nôk chu, pase kha nuhmei sik a asyem changmak, tâk nuhmei kha pase sik a asyem kae.

¹⁰Khan chu, marvân ngevahei jâra, nuhmei hi apuise ṭong thōia a-om malârna sik pōnlu inkhu rasoh.

¹¹Hei-hei achang inum Rōngpua nihring shunga pase inveiloa nuhmei omtheimak, nuhmei inveiloa pase omtheimak.

¹²Ajârchu nuhmei kha pasea inphut a’nsyem kapōa, kha leh in-angtlinga pase kha nuhmeia inphut a’nte kae; khana heirakip kahringa akada kha Pathen kae.

¹³Nanbinga mandon ruh, mipui kamukna hmun a nuhmei inkhat in pōnlu inkhu loa Pathen hneng ader hi a’nhōi mo?

¹⁴Heijâra mo niti’nchu, ralei ngai hinum pase sam kasei hi ama sik a inzakna kae,

¹⁵tâk nuhmei in asam asei inchu aṭhatna inteia kae. Asam kasei kha a’nkhu sina sik a a’npe kae.

¹⁶Tâk-kha hiva chunga tu inkhat in makhe hnōmna anei inchu, kei tahri sik khachu eini leh Pathen bekrup in kamukna ṭōnhlama chôndân ahlop neimak mea kae.

¹⁷Kha achang inum, mansena bânna hin, ke’n nangni manpâk mak chei eng ajârchu kamukna sik bek-inna nan-intûp hi ṭhatna kanek a ṭhatmakna chet kachang jôk jo.

¹⁸Ahma inkeipena, nangni nan-intûp pha ruprup a indōitō chei ti ṭong kathei; hivahi kadik thou sik tia kataksen.

¹⁹(Mikadik-hei kha mihe’n inthenga anhmu theina sik hei nankâra inṭhenna kha akasōk nger sik kae.)

²⁰Nangni rup khat a nan-intûp pha, nantasâk kha Rōngpu Jânthlai kha changmak.

²¹Heijâra mo niti’nchu, nangni’n thlai nansâk pha, mi rakip in anthlai heichoi et kha hma inkeia ansâk a, her khat chu anvon kaṭâm jo, her khat chu ju inrui jo heia kae.

²²Nansâk nan-inna sik nanbing inn et om mak mo? Pathen bekrup hnōisena sik leh mi akatlasam hei manzakna sik a mo nantatlo? Hiva chunga hin nanhnenga heimo hri rasoh nantati eng? Kamanpâk sik chei mo? Changmak, manpâk mak chei eng.

²³Ajârchu, nangni kapek sōt jo chei mantheina kha ke’n Rōngpua inphut kahmu sōt insena kha kae, ti chu Rōngpu Jesu pek sōt a a-om sik ning jân khan ama’n buhlom kha aloa,

²⁴Pathen amanpâk a, har akhōia, ahri, “Hivahi nangni tasâk sik a a’npesōt kataksa kha kae. Kei mandonsōtna sik hi tlo ruh,” ati.

²⁵Kha leh in-anghrep a, anmani’n ansâksō pha, ama’n kōklei kha aloa khana ahri, “Hiva kōklei hi kathisenna mêrchîkna kataetkhum jo Pathen ṭongtep ther kha kae, nangni’n nan-in akaia kei mandonsōtna nei ruh.”

²⁶Hiva buhlom hi nansâk a, hiva kōkleia nan-in akaia Rōngpu ajōng mak hma seng nangni’n athina ṭong kha nanhri manthang jo tina kae.

²⁷Hiva bân kajui khachu tu achang inum Rōngpu kajana kasea buhlom akasâk khana kōkleia aka-in mi kha Rōngpu taksa leh thisen kadōia ṭhena leh setna achen kae.

²⁸Khava jâra mi rakip ama abinga in-ensui sona buhlom kha sâk rasoh, khan chu kōkleia khan in rasoh.

²⁹Ajârchu buhlom kasâk leh kōkleia ka-in mi khan Rōngpu taksa achangna jâr manhret loa asâk achang inchu, asâk a-in khan abinga chunga ṭong tanna ajōng rôn manhlut a kae.

³⁰Khava jâra nankâra mi katamtak katlâksam cheia, nat nanravei, khana katamtak kathi jo hei.

³¹Eini nibinga hma ni’n-ensuia achang inchu, Pathen ṭong tanna kha ratō mak min.

³²Tâk-kha eini’n vânhnōi ralei leh masetna nichensap makna sik, Rōngpu khan niṭong atan a karâkna apek me kae.

³³Khava jâra sōpuihei, tûnchu, Rōngpu Jânthlai kasâk sik nan-intûp pha, inkhat leh inkhat inhngâk ruh.

³⁴Pathen in nanchunga ṭong atanmakna sik, nan-intûp pha, von kaṭâm a-om inchu a-inna heisâkdek rasoh. Khana ṭonglak hei khachu, kei kahong pha leh kahri mankim sik jo.