Read Komrem CORINTHIANHEI INKHATNA 12 Bible Online

CORINTHIANHEI INKHATNA 12 - Komrem bible

CORINTHIANHEI INKHATNA 12

¹Tûn, Rathla Intheng kutchoi chunga nanta heimazet chungchânga ngeitōna. Sōpuihei, khahei chunga nantamanhret sik a kamadu.

²Nangni khōvel a nanlei omlai, hringna kaneimak limsyem inthoina ahlam, katamtak a ṭhōimanhmak nanchangna kha nanmanhret.

³Tûnchu manhret jo ruh, ti chu Pathen Rathla taṭhōi mi tûte’n, “Jesu kha hâksêr kachen kae,” titor mak ning; khan chu Rathla Intheng taṭhōimak mi tûte’n, Jesu kha, “Rōngpu kae,” tia phôngtor mak ning.

⁴Rathla kutchoi pek ahlop katam, Rathla inkhat rōk khan apek hei kae.

⁵Razenna sik hlam katamtak ka-om, tâk Rōngpu inkhat rōk kha nirazen kae.

⁶Ṭōn tlosōtna sik tlotorna ratha ahlop-hlop ka-om, tâk anṭōn et tlona sik, mi rakip hneng tlotorna kapek kha Pathen inkhat rōk kae.

⁷Mi rakip ṭhatna sik mi inkhat et hnenga Rathla inṭangna kha ahlam hlop-hlop a inlâr.

⁸Mi inkhat hnenga Rathla khan singna kasip ṭong apek, mihlop inkhat hnenga khava Rathla khet khan manhretna kasip ṭong apek.

⁹Khava Rathla inkhat tlit khan mi inkhat hneng taksenna apek, mihlop inkhat hnenga mi mandamna sik ratha apek.

¹⁰Rathla khan mi inkhat hneng ṭōn-inlak tlotorna ratha apek; khan chu mihlop inkhat hneng Pathen ṭonghri theina kutchoi apek; khana mihlop inkhat hneng Rathla a inphut akajōng kutchoi akae leh aka-emak hrisōt theina apek a kae. Mi inkhat hneng ṭongsō inlak a ṭong theina, mihlop inkhat hneng khava ṭongsō inlak kha hrimanchên theina ratha apek a kae.

¹¹Tâk-kha hiva rakip katlo hi Rathla inkhat rōk kha kae; ama’n amanṭhat dungjuia, mi inkhat et hneng kutchoi ahlop et apek hei.

¹²Christa kha abâk katamtak ka-om taksa pumkhat kapō kha kae; abâk hlop-hlop vâng ansyem inum taksa chu pumkhat rōk kae.

¹³Khava kapōa, eini nikhenga, Jehudi, Jât-hlop, sōk, masō nichang inum nikhenga taksa pumkhat shunga Rathla inkhat rōk a tui amanhlut jo me, khana eini nikhenga Rathla inkhat rōk kha in sik a apek jo me kae.

¹⁴Ajârchu taksa pumkhat kha, abâk inkhat rōk a a’nsyem changmak, akatamtak vâng a’nsyem kae.

¹⁵Ke khan, “Kei, kut kachangmak jâra, taksa ta changmak eng,” ati’num khava khan ama taksa inphut inṭhentor dekmak ning.

¹⁶Khana kōr khan, “Kei hmit kachangmak jâra taksa ta changmak eng,” ati’num khava khan ama taksa inphut inṭhentor dekmak ning.

¹⁷Taksa pumpui kha hmit inkhat rōk achang jo’nchu, heikhong mo atheitor sik? Khana kōr inkhat rōk achang inchu, heikhong hmen amahnam thei sik?

¹⁸Hei-achang inum, hing’hin Pathen in amaduhrep a taksa chunga abâk ahlop-hlop kha ada jo hei kae.

¹⁹Ankhenga taksa bâk inkhat rōk anchang jo’nchu, taksa inkhat kha om mak jo ning.

²⁰Hing’hin, abâk hingja ka-om hei tâk taksa chu inkhat rōk kae.

²¹Khava jâra, hmit khan kut hneng, “Nang kei sik a hnemmak che,” titor mak ning. Lu kha’num ke hneng khan, “Aya jo, nang kei sik a hnemmak che,” titor mak ning.

²²Khava kanek a, akatlasam pen kapōa nimandon taksa bâk kha inveiloa eini ṭōn tlotor mak me;

²³khana akahnem reimak a nimandon hei kha kakhôk pena nihrung chet heia kae; khan chu enhme kase taksa bâk-hei kha kakhôk chet a nirazen heia kae,

²⁴khana nitaksa bâk enhme kaṭhahei khan chu khanga rangei mak hei. Rahōi kasōk bâk-hei kha kajana sik a Pathen khet in nitaksa hi ada manchun jo kae.

²⁵Khava jâra taksa pumkhat shunga insemṭhenna om mak, taksa bâk rakip ankhenga inkhat leh inkhat khôk insak heia kae.

²⁶Taksa bâk inkhat anat inchu, anat kha ankhenga andepui et a kae. Abâk inkhat in manpâkna achen inchu, taksa bâk rakip in inpâkna kha anchenpui et a kae.

²⁷Nangni nankhenga Christa taksa jo chei kae, khana nangni mi inkha-khat hi ataksa bâk et chei kae.

²⁸Bekrup shunga Pathen in mi rakip anhmun et a ada hei: ahma inkeia sonle, 2na sânkathem, 3na oja; khava kahnung kajuia ṭōn-inlak katlo, mi mandamna ratha a’npe, mi inthōpui, mi hlamkakei leh ṭonghlop kaṭonghei hi kae.

²⁹Anmani ankhenga sonle, sânkathem, oja changmak hei. Ankhenga ṭōn-inlak tlotorna,

³⁰mikana mandamna, ṭonghlop ṭong theina, ṭonghlop hrimanchên theina ratha neimak heia kae.

³¹Kha’num akakhôkdet kutchoi kachen sik a nanmalung manhlut ruh. Hei-achang inum akaṭhapen chu abâna hlam hi kae.