Read Komrem CORINTHIANHEI INKHATNA 14 Bible Online

CORINTHIANHEI INKHATNA 14 - Komrem bible

CORINTHIANHEI INKHATNA 14

¹Khava jâra insalertak a nanta’njong sik kha lungset hi kae. Kha’num rathla kutchoi pek chunga nanmalung manhlut ruh, akarôn pena Pathen ṭong manthangna sik tlo ruh.

²Ṭonghlop a akaṭong mi kha mihei hnenga akaṭong changmak, Pathen hneng akaṭong kae, ajârchu mi tûte’n manhret pek mak hei. Anmani’n Rathla rathahrat vâng ṭong in-ip kha antahri kae.

³Tâk-kha Pathen ṭong kahrihei khan chu mihei hnenga antahri kae khana mihei inthōpuina, malung mathokna leh lungngamna antapek hei kae.

⁴Ṭonghlop a kaṭonghei khachu anbing rōk a sik akahnem kae; tâk Pathen ṭong kahrihei khan chu bekrup pumpui an-inthō puia kae.

⁵Nankhenga ṭonghlop a nanṭong et sik kamadu; tâk Pathen ṭonghri manthangna kutchoi nantachen sik a kamaduchet. Ajârchu, ṭonghlop a kaṭongpa ṭongsō kha bekrup pumpui inthōpuina sik a mi inkhat in ahri manchênmak inchu, ama kanek a Pathen ṭong kahri sōtpa kha aman katam jôk a kae.

⁶Khava jâra, sōpuihei, kei nanhnenga kahong pha ke’n ṭonghlop vâng kahri’nchu heimo kahnemna aka-om sik? Ke’n Pathena inphut phôngsōtna ahlek, themna ahlek, mathokna ṭong ahlek, khana mantheina ajingtebek kajōng rôn pek mak che’nchu, nangni sik heimo kahnemna aka-om sik? Om hêrmak ning!

⁷Hringna kaneimak mahring kaneihei bunglir, serângdâr inlo ruh, anmahring kha a’nthengseng mak inchu heikhong mo mi inkhat in anrasa kha amanhret sik?

⁸Khana pengkun katum khan bekna mahring kha amanchênmak inchu, re katuk sik a tu mo a’ntluk sik?

⁹Kha leh in-anghrep a, ṭonghlop vânga nanṭong heirôn kha a’nthengmak inchu heikhong mo mi inkhat in amanhret tor sik? Naṭong hrisōt kha bōirōk a a’nhmang sik kae!

¹⁰Raleichunga ṭong hlop-hlop katamtak ka-om; kha’num anmanhretna omlo inkhatbek om mak.

¹¹Tâk-kha ṭong inhri kha ke’n kamanhret mak inchu, kei sik a akahripa kha ram hlop mi jo kae khana kei anmani sik a ram hlop mi jo eng kae.

¹²Nangni’n Rathla kutchoi pek hi nanta madu achang jâra, heirakip kanek a bekrup syemsōtna inthōpuina sik a akakhôk chet a hmangna sik tak tlo ruh.

¹³Khava jâra, ṭonghlop a kaṭong mi khan, aṭongsō hei kha ahri manchên theina sik derna anei nger sik kae.

¹⁴Ajârchu khanga ke’n ṭonghlop ṭonga kader inchu, karathla’n chu ader kae kadik, tâk kamalung khan chu invei mak a kae.

¹⁵Khan chu ke’n heimo katlo sik jo? Karathla vâng kader kha kamalung vâng um kader sik kae; karathla vâng hla kasak kha kamalung vâng um kasak sik kae.

¹⁶Nangni’n Pathen hneng rathla vâng rōk manpâkna nannei pha, intûpna shunga a’nvei micham he’n heikhong mo nangni manpâkna derna chunga khan, “Amen,” antatipui sik chei? Anmani chu nanta hri kha manhret theina sik ahlam neimak hei.

¹⁷Nangni Pathen manpâkna derna kha aṭhat-hêr inum, milak chu khava khan heite inthōpui mak a kae.

¹⁸Kei nangnihei kanek a ṭonghlop a kaṭongsōt chet jâra Pathen kamanpâk.

¹⁹Tâk-kha bek-inna kamukna shunga ṭonghlop lishing raja ṭongsōt sik kanek a, mantheina kha milak-hei antamanhret tor sik ṭongrahme 5 limte kahri sik a kae.

²⁰Sōpuihei, mandonna ting naipang angmak ruh; akaṭhamak chunga chu naipang ang ruh, tâk nanmalung mandonna khan chu pui katluk chang ruh.

²¹Ṭong Inthenga hing’hin inzet: “Rōngpu khan ahri, ram hlop ṭong kajôm mihei kahmanga kamihei hneng ṭong kahri sik. Ramlak mihei beisō kahmanga ṭong kahri sik, khava katlung um kami he’n rangei mak hei ning.”

²²Kha achang inchu, ṭonghlop kutchoi hichu akataksenmak hei sik manchênna kae, akataksenhei sik changmak, khana Pathen ṭong manthangna kutchoi khachu akataksenhei sik manchênna kae, akataksenmak hei sik changmak.

²³Kha achang inchu, bekrup mi rakip nan-intûp a khana mi rakip ṭonghlop vâng nanṭong pha, micham akataksenmak hei kha honghlut hei sona, anmani’n nangni kha invet jo chei timak hei ning mo?

²⁴Tâk-kha mi rakip in Pathen ṭong kha anhrilai, akataksenmak michamhei honghlut hei sona, anṭong thei khan ansetna ka-om ti kha anmanhret sik jo. Anṭong thei vâng khan binga in-ensuina annei sik jo,

²⁵ale’nthup mandonna rakip aphôngsōt pek sik jo hei, khana anmani inkun heia Pathen ankamuk sik jo, “Kadiktak a nankâra hin Pathen ka-om,” tia anbeia anphông sik jo.

²⁶Kasōpuihei, hihei hi kahrina kae. Nangni a’nmuk sik a nan-intûp pha, mi inkhat in hla kasak sik, inkhat in ṭong inthei sik, inkhat in Pathena inphut ṭong kaphông sik, inkhat in ṭonghlop kahrisōt sik, inkhat in ṭonghlop kahri inchên sik, nannei et a kae. Khahei rakip kha bekrup inthōpui akachang nger sik hei kae.

²⁷Tu mo inkhat ṭonghlop a akaṭong sik achang inchu, mi 2 anchangmak leh 3 lim inthlâk hei sona inkha-khat a ṭonghei rasoh, khana mi inkhat in ahri manchên nger sik kae.

²⁸Tâk-kha akahri inchên tor sik mi a-om mak inchu, ṭongmak jo rasoh, sip tisonna abinga leh Pathen hneng ṭong jo rasoh.

²⁹Mi 2 a-emak leh inthumlim in Pathen ṭong kha hri hei rasoh, alak he’n anṭong hri kha ensui hei rasoh.

³⁰Achang ravâng a’n-ong hei kâra mi inkhat in Pathena inphut ṭongphông sik anei inchu akaṭonghei kha haihi rasoh.

³¹Ajârchu mi rakip in anmanhret a mathokna sik Pathen ṭong kha inkha-khat in nankhenga nanhrithei sik.

³²Pathen ṭong hrisōtna kutchoi khachu, ṭong kahripa inkhimtheina thōia aka-om sik kae,

³³ajârchu Pathen in eini a’nhmak sik a abek me changmak, akadai leh akamōng sik a abek me kae. Bekrup rakip a Pathen mihei omchen kapōa,

³⁴intûpna shunga nuhmeihei kha kadai hngera aka-om sik hei kae. Anmani ṭongna sik hnōm pekna om mak; Jehudi Dân dungjuia anmani ṭongna sik pha pemak sik hei kae.

³⁵Anmani’n heikhat anmanhret hnōm inchu, inna anpuisehei der hei rasoh. Bek-inna nuhmei inkhat aṭong sik hi inzak ka-om tak kae.

³⁶Achangmak leh Pathen ṭong kha nangnia inphut akajōng thei sik mo? Achangmak leh Pathen ṭong jōng sōkna kha nangni rōk jo chei mo?

³⁷Tu mo inkhat in Pathen ṭong kahrisōt eng, a-emak leh rathla kutchoi kanei eng tia a’ndon inchu, hiva nanhnenga kaheimazet hi Pathen ṭongpek kae tia manhret ngar rasoh.

³⁸Mi inkhat in hiva kaheimazet hi adonmak inchu, ama kha donmak jo ruh.

³⁹Khava jâra kasōpuihei, Pathen ṭong hrisōtna sik nanmalung manhlut ruh, kha’num ṭonghlop a akaṭong he’m khâm mak hei ruh.

⁴⁰Heirakip abân bâna kaṭhadek a tlo sik kae.