Read Komrem CORINTHIANHEI INKHATNA 15 Bible Online

CORINTHIANHEI INKHATNA 15 - Komrem bible

CORINTHIANHEI INKHATNA 15

¹Sōpuihei, nangni taksena ngir inhnetna, nanta rahlâng jo, Ṭong kaṭha nanhnenga kaleihri kha nantamandonsōt sik kamadu.

²Ke’n nanhnenga kaleihri jo ṭong kha ṭong kaṭha kha kae. Nangni’n khava ṭong kaṭha kha kahnettak a nanmatu’nchu, nangni hukmanhring kachang jo chei, nantaksenna kha hnemna kase changmak ning.

³Apui karônpen khachu, ke’n kaleichen kha nangni kapeksôn chei kae; ti chu ṭong inthenga a’nzet dungjuia, eini set jâra Christa kha kathi jo,

⁴khachu ṭong inthenga a’nzet dungjuia ama thlânna anvûma ni 3 ning kahringa kathōisōt jo;

⁵ama Peter hneng inlâr khava sōa sonle 12 hei hneng inlâra kae.

⁶Khava sōa akahnung kajui 500 kakhe hei hneng vōi khat inlâra kae; anmani kâra ṭhahrep chu anthi jo’num, akatam lang chu lakahring heia kae.

⁷Khava sōa James hneng inlâr, khava sōa sonlehei seng hneng inlâra kae.

⁸Kei hi pui katluk a a’ntemak mi inkhat kapō kachang jo’num hnung kakhôrpena kei hneng jōng inlâra kae.

⁹Kei sonlehei kâra mathlum pen eng kae, sonle inkhat inti sik hi’m karahōi changmak ajârchu ke’n Pathen bekrup kaleisuk manrima kae.

¹⁰Achang ravâng Pathen maritna eng jâra kei hi kei jo eng kae, khana ama’n kei maritna apek eng kha hmangna kase changmak. Khava kakhea, sonle alak-hei kanek a, ke’n inhnakchet a ṭōn katloa kae. Khavakha kei tatlokhet changmak, Pathen maritna tatlopui eng kae.

¹¹Achang jâra kei kachanga anmani anchanga kankhenga ṭong kaṭha kha kantahrile et kae, hivahi nangni tataksen kha kae.

¹²Tûnchu, Christa kha thina inphut kathōisōt jo ti ṭong hi keini’n kantahrile achang inchu, nankâra mi ṭhahrep in heikhong mo akathi thōi nôkna om mak antati thei sik?

¹³Khavakha adik inchu, Christa kha’m thōisōt mak tina kachang jo.

¹⁴Khana Christa kha akathōisōt mak achang inchu keini tahri manthang sik heite om mak jo; khana nangni tataksen sik um heite om mak jo.

¹⁵Khava chunga, keini Pathen chungchânga malei kasei akachang jo unga kae, ajârchu ama’n Christa kha thina inphut akei mathōi jo tia kantahri jo kae, tâk akathihei kha kahringa keimathōimak ti hi akadik achang inchu, Christa kha leikei mathōimak jo.

¹⁶Ajârchu, akathihei kha akathōi mak hei anchang inchu, Christa kha’m akathōi mak jo kae.

¹⁷Khana Christa kha akathōi mak achang inchu, nantaksenna kha môksek kae jo, khana tûn katlung nangni setna shunga anhmanga laka-om chei.

¹⁸Hivahin Christa akataksena akathihei kha’m inhmang jo hei tina kae.

¹⁹Khana eini Christa ni’nhōrna hi tuna hringkhō ṭhatna sik rōk a achang joa, abân sik a-om mak jo’nchu, eini hi raleichunga mihring rakip kâra rathla sinpuipen sik kha kachang jo me.

²⁰Tâk-kha akadiktak khachu Christa kha thina inphut kathōi jo, hivahi akathia akaje hei kha’m kathōisōt sik heitina manchênna kha kae.

²¹Ajârchu mi inkhat a inphut thina kha akajōng kapōa, thina inphut hringsōtna hi’m mi inkhat a inphut akajōng kae.

²²Heijâra mo niti’nchu, mi rakip Adam leh inchunna jâra thina aka-om kapōa, Christa leh inchunna jâra mi rakip hringna akathōisōt sik hei kae.

²³Kha achang inum, adânhrep a inkha-khat a akathōi sik hei kae: ti chu hma inkeipena Christa, khava sōa ama ajōng pha leh ami kachang hei seng kha kathōisōt sik hei.

²⁴Khava sōtak leh a’nchaina kha kajōng sik; Christa’n rathla vaikarôn rakip, ṭong kanei rakip, ratha hratna rakip, atorsō sik heia kha Pa Pathen hneng Rengram apek sōt sik jo.

²⁵Ajârchu, Pathen in a’nrepui rakip ator heia ake chōnpha amanchang mak hma seng Christa’n vai arôn nger sik kae.

²⁶Achaina pena ator sik inrepui khachu thina hi kae.

²⁷Ajârchu ṭong intheng in ahri, “Pathen in heirakip ake chōnpha adapet jo.” Hivahi inchên jo, ti chu, “Heirakip,” inti kâra hin Christa thōia heirakip akada Pathen chu invei mak a kae.

²⁸Tâk-kha Christa vairônna thōia heirakip adapek sō pha, Sapa kha abinga Pathen thōia ka-om sik jo; khava pha Pathen in heirakip chunga pui katluk a vai arôn sik jo.

²⁹Tûnhin akathihei sik tui manhlutna kachen hei khan heimo antatlo? Hei tlosōtna sik a mo a’nhōr hei? Anmani’n akathi thōisōtna om mak antati kha akadik achang inchu, heisik jâra mo akathihei sik tui manhlutna antalanei?

³⁰Khan chu heisik jâr pena mo keini’n apha rakip a thina ratōnathei shunga akatlân lele ung?

³¹Sōpuihei, “Kei ani tina thina karatō.” Hivahi nihringkhōa ni-Rōngpu Jesu Christa leh ni’nchunna shunga nanchunga ka’nlensakna khan amanphôngsōt eng kae.

³²Ke’n hiva Ephesus a hin mihring ngai dungjuia “ramshahei” hi re ka’ntukpui he’nchu, heimo kahnemna sik aka-om? Akathihei akathōi mak sik hei achang inchu, a’nhri kapōa, “Sâk rih, in rih, ajârchu jîng leh akathi sik jo me kae.”

³³Hōnmathlâk a om mak ruh! Inloipui kaṭhamak in omchen kaṭha amanhmanga kae.

³⁴Malung dikna tinga he’nle ruh, khana setna hlam dahlon ruh. Hivahi nan-inzakna sik a kahri kae, ti chu nangni kâra mi ṭhahrep in Pathen manhret phâkmak cheia kae.

³⁵Mi ṭhahrep in ander sik, “Mi kathi kha heikhong mo kahringa akathōi sik? Heikhong khova taksa ravōi mo anta hongrôn sik?”.

³⁶Eh mikamo! Nang in hmuchi inkhat navor kha thiloa chu adôn hongkeksōt mak.

³⁷Nang in raleia natuk kha hmuchi hrepte kae, gehu a-emak leh alak hmuchi achanga, pui akatluksa ahong kakhang hnâm sik jo kha changmak.

³⁸Pathen in hmuchi kha amadu dungjuia akung apek a kae; hmuchi rakip kha ankatluk hrep et a taksa apek heia kae.

³⁹Hringna kanei taksa rakip a’n-ang et changmak; mihring taksa ravōi ahlop, shahei ravōi ahlop, vahei ravōi ahlop, khana ngahei ravōi ahlop inkhat ka-om.

⁴⁰Khana marvân taksahei leh ralei taksa ka-om hei; marvân taksahei ṭhatna inkhat, khana ralei taksahei ṭhatna inkhat, khana ralei taksahei ṭhatna kha in-ang mak hei.

⁴¹Kani’n ṭhatna ahlop inkhat anei; thla’n ṭhatna ahlop anei, ârsi he’n ṭhatna ahlop annei; khana ârsihei kapha’m anṭhatna ahlop et hei kae.

⁴²Akathihei kha anthōisōt pha, khang’khan kati sik heia kae. Taksa kha anvûm pha akathithei kha a’nvûm kae; athōisōt pha, akathi theimak sik jo taksa kha kae.

⁴³Taksa kha anvûm pha, hme kasetak a leh ratha kaneimaktak a a’nvûm kae; athōisōt pha, ahme kaṭha sik khana aratha kangar sik jo.

⁴⁴A’nvûm pha, ralei taksa a’nvûm kae; athōisōt pha, rathla taksa kachang sik jo. Ralei taksa kha aka-om achang jâra, rathla taksa kha’m aka-om nger sik kae.

⁴⁵Ajârchu ṭong intheng in, “Mihring hma-inkei Adam khachu, akahring inkhat a a’nsyem kae,” ati; tâk hnung kakhôr Adam khachu, hringna kapek Rathla kha kae.

⁴⁶Hma inkeia akajōng kha Rathla kha changmak, tâk taksa kha kae, khava sōa Rathla kha akajōng kae.

⁴⁷Hma-inkei Adam kha raleia a’nsyem kae, raleia inphut hong kakōn; 2 tlukna Adam khachu marvâna inphut akajōng kae.

⁴⁸Raleichung tahei seng khachu, raleia inphut a’nsyem hei kha anpō; khana marvân tahei seng khachu marvâna inphut akajōng kha anpō.

⁴⁹Eini’n raleia a’nsyem mihring hmea a’nret me kapōa, marvâna inphut akajōng mi hme kapōa a’nret sik me kae.

⁵⁰Sōpuihei, hiva kahri hi taksa leh thisena a’nsyem khan Pathen Rengram a chen neimak, khana akathithei khan akathi theimak kha chenthei mak ti hi katina kae.

⁵¹Hiva ṭong kadik in-ip hi rangei ruh: eini nikhenga thimak min, tâk a’nchaina pengkun kha ahon’hring pha, khavatak a eini nikhenga hmitkhap kâra inthleng sik me. Ajârchu pengkun kha ahon’hring pha, akathihei kha akathi nôk mak sik a hongkathōi sik hei, khana eini nikhenga nihme inthleng sik jo me.

⁵²

⁵³Ajârchu akathitheia a’nvon kha akathi theimak a inthleng nger sik, akathi sik kha akathimak sik a inthleng sik jo.

⁵⁴Achang jâra akathithei kha akathi theimak a ahong inthleng sō pha, ṭong intheng tahri, “Thina kha suk inhmang jo, torna kha pui katluk jo,” ti hi hui katlung sik jo.

⁵⁵“Eh thina, natorna kha khomo? Eh thina, naratha neina tûr kha khomo?”

⁵⁶Thina’n atûr ratha neina kha setna inphut achen; khana setna’n aratha neina kha Dân a inphut achen.

⁵⁷Tâk-kha ni-Rōngpu Jesu Christa jâra torna anikapek Pathen kha manpâk a om rasoh!

⁵⁸Khava jâra kasōpui marit hei, inhlinglo jena kahnet a ngir ruh. Rōngpu razenna nanṭōn tlo kha môk a inhmang mak ning ti namanhret jo jâra, Rōngpu jâra nanṭōn tlona kha insaler ṭhak ruh.