Read Komrem CORINTHIANHEI INKHATNA 16 Bible Online

CORINTHIANHEI INKHATNA 16 - Komrem bible

CORINTHIANHEI INKHATNA 16

¹Tûn, Judea ram a Pathen mihei inthōpuina sik sêrtōklôm chungchânga nanta heimazet ngeitōna. Galatia bekrup-hei hneng kahri kapōa, Nangni’num nantatlo sik kae.

²Kei kahong pha leh sêr ṭheina a-om makna sik Pathen kani akai, mi rakip in ahlōsōt dungjuia apek sik kha ahlop a leimankhôm ruh.

³Kei kahong pha leh nantamanṭhat mihei kha hme malârna chithi kapek heia nankutchoi kha avakathak sik a Jerusalema katir sik hei.

⁴Khana kei kavasea akaṭha sik achang inchu, kei leh inṭhōia kasesap sik jo ung.

⁵Kei Macedonia kapetan a akase sik eng kachang jâra, Macedonia kahei petan sō leh nanhnenga kahong sik eng.

⁶Pha ṭhahrep nanhnenga ka-om sik eng, phebi katlung bit um kachang thei, khava sōa nangni’n abâna kasena sik a nan-inthōpui thei sik eng, khava hmun a achang inum abâna kase sik jo eng.

⁷Ajârchu kase sik ting pha bongkhat rōk nangni leh inhmu sik kha madu mak eng. Rōngpu’n ahnōm pek eng inchu, kasôt-hlek nangni leh pha hmang sik hi kamadu.

⁸Tâk-kha kani 50 tlukna Pentecost mak kârseng chu Ephesus a hin om sik intluk enga kae.

⁹Hiva hmun a hin anikadōi antam inum ṭōn kalen leh rahōi kasōk tlona sik hi kot inhlânga kae.

¹⁰Timothy nanhnenga ajōng inchu, nankâra malung kamōnga a-omna sik kaṭha leiratō ruh; ajârchu ama’m kei kapōa Rōngpu ṭōnkatlo kha kae.

¹¹Ama tûte’n leihnōise mak rasoh, tâk malung kamōnga kahnenga ahe’nle theina sik ase ahongna he’nthōpui ruh; ajârchu sōpuihei leh ahe’nle sik a inhōrna kanei kae.

¹²Tûn sōpui Apollos chungchânga. Akataksen alak-hei leh ama nanhnenga ahongna sik kamathokṭhak kae, tâk tûnlai akahong sik a ama lahnōmkhet mak. Kha’num pha kaṭha ahmu’nchu lakahong sik.

¹³Insing thei ruh, nantaksenna ngir inhnet ruh, kangama om ruh, nanratha manngar ruh.

¹⁴Nanṭōn rakip lungset a tlo ruh.

¹⁵Nangni’n Stephanas leh a-innshung mihei nanmanhret hei; anmani Achaia khōa Christian hma kakeihei kae, khana Pathen mihei ṭōn tlona sik a anbinga a’npesōt hei kae. Kasōpuihei, khang khava

¹⁶mihei hlamkeina khachu, tu achang inum anmani leh ṭōnkatlo inzensap hei kahnung kha nantajui sik a kangek chei kae.

¹⁷Stephanas, Fortunatus, khana Achaikas hei anhong jâra kei inpâk eng; ajârchu nangni om mak kha anmani’n anvathlenga kae.

¹⁸Khana anmani’n malung tlaina antapek chei kapōa, ke’m anmantlai eng; khang khava mihei kha manhret ṭhak sik hei anrahōi.

¹⁹Asia ram a bekrup he’n chibei anheipek chei; Aquila leh Priscilla khana a-inna bekrup mihe’n Christian chibei anheitlo chei.

²⁰Hina ka-om Christian rakip in chibei anheipek chei. Khat leh khat a’ntheng injôp pum a chibei intlo ruh.

²¹Kakutkhet a hivahi kaheimazet kae: Paul a inphut chibei.

²²Tu achang inum Rōngpu inlungset mak mi kha, hâksêr chen rasoh! Maranatha, Kan-Rōngpu jōng roh!

²³Rōngpu Jesu maritna khan nangni ompui chei rasoh.

²⁴Christa Jesua kalungsetna chei hin nankhenga ompui chei rasoh.