Read Komrem CORINTHIANHEI INKHATNA 2 Bible Online

CORINTHIANHEI INKHATNA 2 - Komrem bible

CORINTHIANHEI INKHATNA 2

¹Sōpuihei, Pathen ṭong kadik in-ip kahria nanhnenga kahonglai khan, ṭonghri kahōi leh themna katluk a leihmang mak eng.

²Ajârchu nangni leh ni-om saplai khan, Jesu Christa khana akakhôk pena thingrake chunga athina ṭong tei loa heirakip mahngina sik kaleimandon.

³Khava jâra kei nanhnenga kahonglai khan katlâksam eng khana heirakip a ṭitpum a karatha le’nnok,

⁴Kami manthei leh kaṭong hri kha mihring singna inphut ṭonghri themna vâng leichang mak, tâk Pathen Ratha hratna manchênna vâng kaleihri kae.

⁵Khava jâra nantaksenna kha mihring singna chunga a’nhnga changmak, Pathen ratha hratna chunga a’nhnga kae.

⁶Achang ravâng ke’n rathlatinga pui katluk hei hneng singna ṭong kha kahri kae. Tâk-kha hivahi raleichung singna ṭong kha changmak, khan chu raleichung vaikarôn ratha hratna kha’m changmak, ratha kahrat hei anratha hrat ahong katlang jo kha’m changmak.

⁷Kei tahri singna khachu, ralei insyem mak hma inphut einihei lûrna sik a aleikadeisa, Pathen singna inthup kha kae.

⁸Hiva raleichung vaikarônhei, inkhat rōk inum hiva singna hi leimanhret mak hei, anmani’n anleimanhret inchu, lûrna Rōngpu kha thingrake chunga anta leimakhei hlon mak sik kae.

⁹Achang inum ṭong intheng in ahri: “Tûte inkhat tahmu phungmak leh tathei phung hêrmak, tûte inkhat in kasōk sik tia amandon phungmak, khavatak kha, Pathen in ama inlungset hei sik a amantluk pek heia kae.”

¹⁰Tâk-kha ṭong in-ip kha, Pathen in Rathla vâng eini amanthei jo mea kae. Rathla khan, Pathen ṭōnmantluk inritak a a’n-ip heirakip kapha kha ajōngsōt jo.

¹¹Mihei shunga ka-om rathla khan anshunga ka-om rakip kha amanhret, kha leh in-anghrep a Pathen Rathla rōk khan Pathen chungchânga heirakip amanhret a kae.

¹²Eini’n hiva raleichung rathla kha nileichen jo changmak; Pathen tapek me rakip kha nimanhretna sik, Pathen tajōngtir Rathla kha nichen jo kae.

¹³Khava jâra keini’n mihring singna mantheina vâng hrimak ung, tâk Rathla mantheina vâng, Rathla kachen hei hneng rathla langa akadik kha kantahri manchên pek hei kae.

¹⁴Tu achang inum rathla kaneimak mi’n Pathen Rathla a inphut akajōng kutchoi kha chenthei mak. Khang khava mi’n kutchoi kha inchênna manhret tor mak; anmani sik a ajâr kase kae, ajârchu khava kutchoi pek hnemna kha Rathlating rōk a manhret ṭhentor kae.

¹⁵Tu achang inum rathla kanei mi khan heirakip ṭhatje amanhret ṭhentor, tâk tûte’n ama manhret ṭhentor mak.

¹⁶Ṭong intheng in ahri kapōa: “Rōngpu malung inhret tu mo? Tu’n mo ama amanse tor?” Achang inum eini chu Christa malung kha nirôna kae.