Read Komrem CORINTHIANHEI INKHATNA 3 Bible Online

CORINTHIANHEI INKHATNA 3 - Komrem bible

CORINTHIANHEI INKHATNA 3

¹Kasōpuihei, kadiktak a chu, Rathla kaneihei hneng kaṭong hri kapōa nanhnenga leihri tor mak eng; tâk Christa taksenna langa naipanghei kapōa, hiva vânhnōi ta nanchang dungjuia kahri sik leikasōk.

²Ke’n nangni buhrum vâng changloa, netui vâng kalavei sik chei kasōk, ajârchu buhrum kasâk thei leichang mak chei. Tûnhin um khava kasâk thei lachang mak chei.

³Heijâra mo niti’nchu tûn katlung taksa ralei mihei kapōa lakahring chei. Nankâra thangsetna khat leh khat innâkna a-om pha, khava khan nangni vânhnōi om ngaia nanhring jâra ama ta chei kae ti malârmak mo?

⁴Nankâra mi inkhat in, “Kei Paul kajui kae,” khana ahlop inkhat in, “Kei Apollos kajui kae,” ati pha, nangni vânhnōi omchen kapō nantatlo changmak mo?

⁵Hei um chang rasoh, Apollos tu mo? Khana Paul tu mo? Taksenna sik a nankaṭhōi, Pathen sōk akae hnâm ung kae. Keini inkha-khat Rōngpu tapek ung ṭōn kha kantatlo kae.

⁶Ke’n hmuchi kha kavor, Apollos in tui kha asō, tâk a’nkek khachu Pathen kae.

⁷Akalingpa leh atui kasôpa kha heite emak hei. Pathen kha akarôn pen kae; ajârchu ama’n thing kakek kha amankhang kae.

⁸Akalingpa leh atui kasôpa kha an-in angmakna heite om mak; ama ama ṭōntlo dungjui et a Pathen in tloman apek sik hei kae.

⁹Ajârchu Pathen sik a ṭōn katlosap kha keini ung kae, Pathen hlei kha nangni chei kae. Khana nangni Pathen inn chei kha’m kae.

¹⁰Pathen in marittak a apek eng kutchoi kha kahmanga, insak kathem inkhat ṭōn kha katloa innhmun kha kadengsō jo; khana mihlop inkhat in khava chunga inn asak kae. Tâk-kha inn kasak rakip in, heikhonga mo asak, insing thei rasoh.

¹¹Ajârchu Pathen in khava innhmun inkhat rōk kha Jesu amanchang jo; khava innhmun teilo alak indeng theimak.

¹²Khava innhmun chunga inn kasak sik ṭhahrep in, sana, dangka, hlung mankatam vâng ansak sik; alak he’n thing, mandi, sapôt vâng ansak sik.

¹³Tâk-kha mi rakip ṭōntlo ṭhatje kha, Christa Kani’n amalâr kha inhmu sik. Ajârchu khava ning khan mi rakip ṭōntlohei kha hmei vâng enmansinna aka-om sik kae; hmei khan a-enmansin sik khana anṭhatje kha a’nlâr sik kae.

¹⁴Khava innhmun chunga mi inkhat innsak kha akâng inhmang mak inchu, ama’n tloman arahlâng sik kae.

¹⁵Tâk-kha tu achang inum aṭōntlo kha akâng inhmang jo’nchu, tloman kha inhmang sik jo; kha’num ama khet chu hmeimale kâra inphut a akasōksōt kapōa hukmanhring kachang sik.

¹⁶Nangni Pathen Bek-inn nanchangna leh nanshunga Pathen Rathla a-om kha nanmanhret khet.

¹⁷Achang jâra mi inkhat in Pathen bek-inn kha asuk manhmang inchu, Pathen in ama kha asuk manhmang sik kae. Ajârchu Pathen bek-inn kha a’ntheng kae, khana nangni kalalen kha ama bek-inn chei kae.

¹⁸Tûte inkhat ama abinga inhōn inthla mak rasoh. Nankâra mi inkhat in hiva raleichung singna langa akasing eng tia amandon inchu, ama kadik a akasing ahong changna sik akamo inkhat kapōa om rasoh.

¹⁹Ajârchu hiva vânhnōi in kasing tia amandon kha Pathen hmit-hmua chu mikamo kapō kae. Ṭong intheng in ahri kapōa, “Pathen in akasinghei kha, an-insing sakna chânga khan aman-ôk hei”;

²⁰khana ṭong intheng ahlop a, “Mi insingsak hei malung mandon kha ahnemna kase kae ti Rōngpu’n amanhret,” tia inzet.

²¹Khava jâra mihring tlotorna chunga tûte inkhat inlensak mak rasoh. Kadiktak a chu heirakip nangni ta kae:

²²Paul, Apollos, khana Peter; hiva ralei, hringna leh thina, tûn leh hnunga, hihei seng hi nangni tahei kae,

²³khana nangni Christa ta chei kae, khana Christa kha Pathen ta kae.