Read Komrem CORINTHIANHEI INKHATNA 4 Bible Online

CORINTHIANHEI INKHATNA 4 - Komrem bible

CORINTHIANHEI INKHATNA 4

¹Nangni’n, keini hi, Christa sōk Pathen ṭongdik in-ip katintahei kae, tia amandon ruh.

²Khang khava sōk-hei sik a arangei inkhat chu, akapupa sik taksenthei akachang nger sik hei kae.

³Tûn nangni nanchanga mihring tu achang inum, kei chunga nanṭong tanna eng kha ke’n heitea teimak eng; khana kei kalan um kabinga ṭong intanmak eng.

⁴Kei mandon ṭhen theina hi intheng, tâk khava khan kei ṭhena neimak eng tia manchênna chu changmak; Rōngpu kha kachunga ṭongkatan kha kae.

⁵Khava jâra pha atluk hma nangni’n tu inkhat chunga ṭong tanloimak ruh. Achaina ṭongtan khan Rōngpu ajōngmak kârseng ahngâk nger sik kae; ama’n mihring malung shunga a’n-ip ṭōnmantluk, khō inthim thōia ṭōn marûk-hei kha khōvâra amalârsōt sik hei. Khana mi rakip anrahōi kasōk choi ka-ânna kha Pathena inphut antarahlâng et sik kae.

⁶Sōpuihei, nangni sik a ke’n hihei rakip hi Apollos leh kei chunga kamandona kahri kae, hiva a’nhri, “Dân kadik-hei kha jui ruh,” ti hi heitina mo nanmanhret theina sik keini 2 tekâk inkhat a kahmang kae. Nangni tûte inkhat mi inkhat jâra inlensak mak ruh khana alak kha hnōise mak ruh.

⁷Milak-hei kanek a, nang tu’n mo chung katōnga asyem che? Nanei rakip kha Pathen tapek che changmak mo? Kha achang inchu kaṭha jo, naneihei kha kutchoi aka-emak kapōa heikhonga mo a’nlensak tor che?

⁸Narangei rakip akhenga nanei jo mo? Akahao jo che mo? Keini reng kanchangmak ravâng, nangni reng akachang jo chei mo? Kaṭha jo, nanreng changna shunga khan keini’m kanchang puina sik chei, kadiktak a reng nanchang sik kha kamadu.

⁹Ajârchu vânhnōi mihringhei leh marvân ngevahei seng manhmuna sik a, mipui ângshunga thina sik maset manchen jo hei kapōa, Pathen in keini hnung kakhôrpen sonlehei hmun kha amanchen jo ung kae tia kamandon.

¹⁰Christa sik a keini kamo ung; tâk nangni chu Christa leh inchunna shunga kasing chei! Keini katlâksam ung, tâk nangni chu nanratha kahrat! Keini mi tahnōise kachang ung, tâk nangni chu ankaja chei.

¹¹Tûnlaitak hin keini kanvon kaṭâm khana kantui kahre; kanpōnsi derkei inhlersō, sung vâng anvōk ung; hmun khat a inphut inkhat a kalôn invâi ung;

¹²ṭōn rahnak a kantlo jâra kangōi dâk jo ung. Keini anhâksêr ung pha, vâng kanpek hei; ansuk manrim ung pha, kande;

¹³Anmanzak ung pha, keini’n ṭong kahōi vâng kanmasôn hei. Keini hi hiva vânhnōi tahnōm mak ung kha kae; tûntak hin keini a’nthengmak ramhnōk inbukna ung kha kae.

¹⁴Hivahi ke’n nangni manzak chei rong tia kaheimazet chei changmak; tâk kasa marit chei kapōa kahei mansena chei kae.

¹⁵Ajârchu nanhringkhō shunga, Christian hringkhōa nanka-ensui 10,000 nannei inum, pachu inkhat rōk nantanei kae. Ajârchu nanhringkhōa Christa leh inchunna shunga Ṭong Kaṭha kha ke’n nanhnenga kahei rôn manhlut achang jâra kei nanpa akachang jo eng kae.

¹⁶Khava jâra kei omchen kha nantajui sik a kangek chei.

¹⁷Khava sik a ke’n, Christian hringkhōa lungset leh taksen ka-om tak kasapa khet Timothy nanhnenga kahei tir kae. Ke’n Christa leh inchunna shunga hringkhōther kajui leh hmun rakip a bekrup-hei hneng kamanthei hei chôndân kha nanmandonsōtna sik ama’n avea amanthei sik chei.

¹⁸Nangni ṭhahrep in, ke’n kahongphâk mak sik chei kapōa nanmandona inlensak jo chei.

¹⁹Rōngpu’n amanṭhat inchu, kei nanhnenga inrangtak a kahong sik eng, khava pha a’nlensak hei anṭonghri rōk kha changloa, heimo anratha neina kha kajongsōt sik!

²⁰Ajârchu Pathen Rengram kha ṭong rōk a hria changmak, tâk ratha kanei kae.

²¹Kho kha mo nanta madu jôk? Sungṭai leh mo akajōng sik eng, a-emak leh innemtak a lungset malung leh mo akajōng sik eng?