Read Komrem CORINTHIANHEI INKHATNA 6 Bible Online

CORINTHIANHEI INKHATNA 6 - Komrem bible

CORINTHIANHEI INKHATNA 6

¹Nangni nankâra inkhat leh inkhat ṭong nansōk pha, Pathen ka-ôihei hneng se lo cheia, khōvel ṭongkatanhei hneng sea nanṭong vatan sik jôk a’ntluk chei mo?

²Pathen mihe’n vânhnōi raleichung ṭong antalatan sik hi manhret mak chei mo? Khan chu kaṭha jo, nangni’n vânhnōi hi ṭong nantatan sik achang inchu, khava ṭongte hei kha tantorlo chei mo?

³Eini’n marvân ngevahei ṭong kapha nilatan sik hi manhret mak chei mo? Kha achang inchu hiva hringkhō shunga ṭong kasōk hei rarap hichu nitan mông sik kae!

⁴Khang khava ṭong kasōk hei kha bekrup mi kachangmak hei hneng ṭong vatan sik a akase chei mo?

⁵Ka’nzakpui chei! Nan-inloikhômna shunga mikasing inkhatbek Christianhei shunga ṭong kasōk katanthei mi om mak jo mo!

⁶Khachu changloa, Christian inkhat in inkhat maherna sik ṭongtan hmun a avakase cheia khōvelhei kha nanṭong nantamantan hei mo!

⁷Nankâra dân tak a nan-inhernatak khan pui katluk a nanṭhena kha amalâr jo. Inher kanek a nang akaṭhe nachang sik kha ṭhajôk mak ning mo? Nanei antamarûk sik kha nang sik ṭhajôk mak ning mo?

⁸Khachu changlo jo cheia, nangni khat leh khat chunga ṭhena nantloa inruna jo chei, nansōpuihei chung tak um khanga nantlo joa kae!

⁹Mikaṭhamak in Pathen rengram kha chenmak ning ti hi inchêna nanmanhret jo. Nanbinga inhōn inthla mak ruh; jông leh kîk katlo, limsyem kabek hei, mikajông, pase leh pase inn kanei,

¹⁰mikachom, phâmrai kase, ju inrui, mi kateitôm khana mi inru tûte inkhat in Pathen rengram kha chenmak hei ning.

¹¹Nangni ṭhahrep chu khahei kapō leikachang chei, tâk nangni chu setna inphut mantheng jo chei kae; Pathen hneng a’npesōt jo chei kae; Rōngpu Jesu Christa leh ni-Pathen Rathla khan nangni chu Pathen leh amandiksap jo chei kae.

¹²Mi inkhat in, “Ke’n heirakip tlo ayapet,” atithei, kadik, tâk nangni sik a heirakip akaṭha changmak. Ke’n heirakip tlo ayapet katithei tâk kei sōk changna sik chu hei-inkhat tlomak ning.

¹³Mi inkhat nôk in hinga ati sik, “Von sik a bu ka-om khana bu sik a von ka-om.” Kadik; Pathen in an-inhnibât a alamanhmang sik hei. Taksa hi hur leh jôngna sik changmak, tâk Rōngpu razenna sik a kae; khana Rōngpu khan taksa veina sik kha apek kae.

¹⁴Pathen in Rōngpu kha thina inphut amanhring jo, khana eini’m aratha hratna vâng amanhring sik me kae.

¹⁵Nantaksa hei kha Christa bâk anchang kha nanmanhret a kae. Ke’n Christa taksa bâk kha kaloa notinu inkhat taksa bâk a kavasyem sik mo? Changthei mak ning!

¹⁶Achangmak leh notinu inkhat leh a’nchun mi kha amanu leh taksa inkhat kachang jo hei ti hi nantamanhret mak mo? Ṭong intheng in intheng senga ahri, “Inhnihei kha taksa inkhat rōk kachang sik.”

¹⁷Tâk-kha tu achang inum ama abinga Rōngpu leh a’nchun jo mi kha rathla langa ama leh pumkhat kachang jo hei.

¹⁸Jông leh kîk a inphut tlânsōt ruh. Setna inti aralak seng chu taksa chunga changmak; tâk jông leh kîk inphut a setna katloseng chu ataksa kadōia akaset kae.

¹⁹Nantaksa kha nanshunga aka-om Pathen tapek chei Rathla Intheng bek-inn kae ti hi manhret mak chei mo? Nangni nanbing ta changmak jo chei, Pathen ta jo chei kae;

²⁰ajârchu nangni nanman ateia arachôk jo chei kae. Khava jâra nantaksa hei kha Pathen manlûrna sik hmang ruh.