Read Komrem CORINTHIANHEI INKHATNA 7 Bible Online

CORINTHIANHEI INKHATNA 7 - Komrem bible

CORINTHIANHEI INKHATNA 7

¹Tûnchu, nanta heimazet ṭong chungchânga ngeitōna nei rih. Pase’n nuhmei aneimak sik hi akaṭha atlo kae.

²Tâk-kha jôngna atam jâra, pase rakip in nuhmei nei et hei rasoh, nuhmei rakip in puise nei et hei rasoh.

³Pase khan puise achangna hlō kha pui mathluk rasoh, khana nuhmei khan nupui achang hlō kha pui mathluk rasoh, inkhat in inkhat madu rangei kha inthlukpek hei rasoh.

⁴Nuhmei kha abing taksa chunga khan akapu changmak, apuise kha akapu kae; khava kapōa apuise kha abing taksa chunga khan akapu changmak, anuhmei kha akapu kae.

⁵Pha ṭhahrep derna hmang sik a inhnōmtōna thōia inkârchot tei loa khat leh khat indōitō mak ruh; khana khava sōa angaia inchun nôk ruh. Kha achang inchu binga insur tor mak jâra Seitan mathlemna inphut, inkhâmtor sik chei.

⁶Hivahi ṭongpek tak a kahri changmak, tâk nantahnōm sik a kahri kae.

⁷Kadiktak a chu, nangni nankhenga kei kapō nanchang sik kamadu; tâk mi inkha-khat kutchoi ahlop et Pathen in apek kae, mi inkhat in hiva langting, mihlop inkhat in ahlop langting apek.

⁸Tûn inn lakanei mak hei leh renghmeihei hnenga kahri kae khachu kei kapōa nanbinga nan-om sik hi nangni sik kaṭha jôk sik.

⁹Tâk-kha madu rangeina kha nan-inkhâm tor mak sik inchu, lu hong ruh; maduna kha dehlatak a om kanek a luhông kha kaṭha jôk.

¹⁰Lu a’nhông jo mihei sik a, keia inphut changloa, Pathena inphut ṭong pek sik inkhat kanei; nuhmei inkhat in apuise adahlon mak sik kae;

¹¹tâk amanu’n khanga atlo’nchu, ama abinga aka-om sik kae a-emak leh ama apuise leh a’nchun nôk sik hei kae; khana puise inkhat in anuhmei adamak sik kae.

¹²Alak-hei hnenga ke’n kahri, (Kei tahri kae, Rōngpu tahri changmak). Christian pase inkhat in akataksenmak nuhmei aneia, anuhmei khan khanga apuise leh omsap sik ahnōm inchu, adamak sik kae.

¹³Khana Christian nuhmei inkhat in akataksenmak puise aneia, apuise khan khanga omsap sik ahnōm inchu, a’nṭhenpui mak sik kae.

¹⁴Ajârchu akataksenmak puise kha anuhmei leh an-omsap jâra Pathen hnōm pekna achen, khana akataksenmak nuhmei kha apuise leh an-omsap jâra Pathen hnōm pekna achen a kae. Kha alei changmak inchu ansahei kha Pathen ka-ôimak hei sa ka-ang sik hei; tâk hinga akachang ansahei khachu Pathen talothei kachang hei.

¹⁵Achang inum, akataksenmak jôk khan Christian kha a’nṭhenpui hnōm inchu, inṭhenpui rasoh. Khava chunga khan, Christian kachang apuise achanga anuhmei achang inum ṭōn tlona sik masō jo kae, ajârchu Pathen in nangni malung kamōnga aka-om sik a abek chei kae.

¹⁶Eh Christian nuhmei, napuise kha nang in nahuk manhring tor mak sik kha heikhong mo namanhret? Achangmak leh Eh Christian puise, nang in nanuhmei kha nahuk manhring tor mak sik kha heikhong mo namanhret?

¹⁷Pathen in abeklaia nanleiomje dungjuia khana Rōngpu kutchoi pek chei dungjuia hring ruh, khana Pathen beklaia vun katan mi kha vun katan a, khana vun tanloa ka-om mi kha vun tanloa khan om hei rasoh. Hivahi bekrup rakip kamanthei hei dân kha kae.

¹⁸Vun katan jo mi inkhat in Pathen bekna kha ahnōm inchu avun tanna kha losōt mak jo rasoh; vun katanmak mi inkhat in Pathen bekna kha ahnōm inchu avun tanna sik jongmak jo rasoh.

¹⁹Vuntan leh tanmak khan mipa chunga heite khôkmak. Akakhôk chu Pathen ṭongpek jui sik hi kae.

²⁰Nangni inkha-khat Pathen in abekna chei nanhnōm laia kapō-pōa khan om ruh.

²¹Pathen in abeklai che khan sōk aleikachang che mo? Kaṭha, heite khôkmak; tâk masō inkhat nachang theina a-om inchu, khavakha hmang roh.

²²Ajârchu Pathen tabek jo sōk khachu Rōngpu sik a chu masō jo kae; kha leh in-angtlinga masōa ka-omsa inkhat Christa tabek jo khachu ama sōk kae jo.

²³Nangni Pathen in nanman apek a arachôk jo chei kae; khava jâra mihring sōk chang nôk mak jo ruh.

²⁴Kaṭhōnhei, nangni inkha-khat Pathen in abeklai cheia nanlei om kapō-pōa khan nangni Pathen leh inloi khôma aka-om sik chei kae.

²⁵Tûnchu, inn kaneimak hei chungchânga nanta heimazet kha ngeitōna: ke’n Rōngpua inphut ṭongpek neimak eng, tâk Rōngpu lungset jâra taksenthei inkhat kachang dungjuia kei malung kahei hri kae.

²⁶Tûnlai inrim khōdengthei hei hi nimandona, mi inkhat inn neiloa aka-om kha ama sik a kaṭha jôk.

²⁷Nang in nuhmei nanei jo mo? Nanei jo achang inchu, amanua inphut sesōtna sik tlomak roh. Inn laneimak che mo? Nalaneimak achang inchu, nuhmei nei sik a jongmak roh.

²⁸Inn nanei kha setna natlo changmak. Inn lakanei mak nuhmei in puise anei kha setna atlo changmak. Tâk-kha inn kanei he’n ani tina antade sik bōina inphut kaṭhensōt hnōm cheia kae.

²⁹Kaṭhōnhei, ke’n hiva ṭong kahrina ajârchu pha hi sôtmak jo, tuna inphut chu inn kaneihei kha akaneimak kapōa,

³⁰akaṭap hei kha a’nreng mak hei kapōa, a’nnui hei kha a’npâkmak hei kapōa, a’nchohei khan anneinâk rachôk kha antanei mak kapōa ka-om sik hei;

³¹raleichung neinâk a a’nvei hei kha anneinâk kha antamaturep mak kapōa ka-om sik hei. Ajârchu hiva ralei hin tuna kapōa omsôt mak jo ning.

³²Nangni’n malung inrimna inphut masō nanchang sik kamadu. Nuhmei kaneimak mi khan abinga Rōngpu ṭōn kha angeitō, ajârchu Rōngpu mantlai sik amadu.

³³Tâk-kha nuhmei kanei mi khan chu raleichung neinâk angeitō, ajârchu anuhmei mantlai sik amadu;

³⁴Khava jâra ama malung hlamhnia inbâk joa kae. Inn kaneimak nuhngâk intheng khan chu Pathen ṭōn kha angeitō, ajârchu taksa leh rathla akoptōa inpesōt sik amadu; tâk inn kanei nuhmei khan chu raleichung neinâk angeitō, ajârchu apuise mantlai sik amadua kae.

³⁵Ke’n nangni ka’nthōpui hnōm chei jâra hivahi kahri kae. Nangni mankhârna sik cheia a’ntluk eng changmak. Khava kanek a, akadik leh akaekhet khana heite ṭhen neiloa pui katluk a Rōngpu ṭōn tlona sik nanbinga nan-inpek sōt sik kamadu cheia kae.

³⁶Ṭong a’ntepsa jo hei tâk lu hôngmak sik a a’ntluk hei chunga: pase khan nuhngâk hnenga omchen kadik a om mak jo eng tia amandon jo’nchu, khana pase’n arangeina kha a’nhnak joa luhông sik a rahōi kasōk jo ati’nchu amadu kapōa khan lu antahông sik kae. Khava khan setna om mak.

³⁷Tâk-kha pase khan, khanga tlona sik rumhrat omloa, lu hôngmak sik a amalung kahnet a asyema, amandona pui katluk a a’nkhâm tor a, khana heikhonga tlo sik mo ti amandon sō jo’nchu, khangdông nuhngâk aluhôngmak sik kha akaṭha atlo jo kae.

³⁸Khava jâra inn kanei pase kha ṭōn kaṭha atlo kae, tâk inn kaneimak khan akaṭhachet atlo kae.

³⁹Puise kanei nuhmei kha apuise hring lai seng masōa om mak; tâk apuise athi jo’nchu, amadu pase inkhat a inn aneithei jo, kha’num pase kha Christian akachang sik kae.

⁴⁰Achang ravâng, amanu kha abinga a-om inchu kahōi jôk sik. Hivahi kei mandonna kae, kei um Pathen Rathla kha kachen tia indon eng.