Read Komrem CORINTHIANHEI INKHATNA 8 Bible Online

CORINTHIANHEI INKHATNA 8 - Komrem bible

CORINTHIANHEI INKHATNA 8

¹Tûn, kamukna thlaisâk chungchânga nanta heimazet ngeitōna. Anmani tahri, “Nikhenga manhretna ninei et,” ti hi akadik chu kae. Achang ravâng khava manhretna khan mi amanlensak, tâk lungset inchu mi asyemsōt a kae.

²Heikhat kanmanhret kati mihei khan antamanhret sik kasōk kha kadik khet a manhret mak hei.

³Tâk-kha Pathen inlungset mi kha Pathen in amanhret.

⁴Khava jâra, limsyem kamukna thlaisâk chungchânga: eini’n nimanhret khachu limsyem inkhat hi kadiktak a akahringmak heikhat sik a akangir kae; eini’n Pathen inkhat rōk kha ka-om ti nimanhret.

⁵Marvân chunga leh raleichunga “pathenhei” an-om inum; khan chu, “pathenhei” leh “rōngpuhei” hingja an-om inum,

⁶eini sik chu heirakip Kasyempa ni-Pa khana ama sik a akahring me Pathen inkhat rōk kha ninei; khana Rōngpu Jesu Christa inkhat rōk kha ninei, ama a inphut heirakip insyem, khana ama jâra eini akahring me kae.

⁷Tâk-kha hiva akadik hi mi rakip in manhret mak hei. Mi ṭhahrep chu limsyem a inhmanghei, ti chu tûn katlunga hin khava thlai kha ansâk pha limsyem ta kae tia anmandon; anmani mandon ṭhen theina kha katlâksam, khana thlaisâk khan amantheng mak tia anmandon.

⁸Achang ravâng thlaisâk khan eini Pathen leh ni’nmetna mankhangdek mak ning; eini’n nisâk jâra heite hnemdek mak min; khana nisâk mak jâra heite inhmangdek mak min.

⁹Kha achang inum, nangni’n ṭōn tlona sik masō nanchangna khan taksena akatlasam hei kha setna mathlâk makna sik insing thei ruh.

¹⁰Ajârchu, nang “manhretna” inti kaneipa, limsyem bek-inn shunga thlai nasâk kha mandonna akatlasam inkhat in ahmu che’nchu, ama kha limsyem thlai sâkna sik a namathok changmak ning mo?

¹¹Khachu Christa’n aleithipek jo akatlasam nasōpui kha nang “manhretna” khan nasuk manhmang sik jo kae.

¹²Khana hing’hin manhret ṭhenna katlâksam sōpui malung nanmantôna anchunga setna nantlona khan Christa kadōia setna kha nantatlo sik jo kae.

¹³Kha achang jâra, thlaisâk khan kasōpui setna akatla sik achang inchu, kasōpui setna kamathlâk makna sik thlai kha sanôk hêrmak jo ning.