Read Komrem CORINTHIANHEI INKHATNA 9 Bible Online

CORINTHIANHEI INKHATNA 9 - Komrem bible

CORINTHIANHEI INKHATNA 9

¹Kei masōsōt mi inkhat changmak eng mo? Sonle inkhat changmak eng mo? Kei ni-Rōngpu Jesu aleikahmu jo changmak eng mo? Nangni Rōngpua kaṭōntlo kara kha changmak chei mo?

²Kei milak he’n sonle inkhat a anrahlâng mak eng inum nangni’nchu nanrahlâng eng! Rōngpu leh inchunna shunga nanhring jâra nangni khet khan kei sonle inkhat kachangna manchênna chei kae.

³Mihe’n kei anmaset eng pha, hing’hin kei a’nhrung eng kae.

⁴Kaṭōntlo jâra sâk leh in nantapek sik eng hi karahōi sōk mak mo?

⁵Sonle ralak-hei kapōa, khan chu, Rōngpu naipa leh Peter kapōa, kakhōhme sena ke’num kanuhmei kaṭhōithei mak sik mo?

⁶Achangmak leh kei leh Barnabas rōk inmo kanhringna sik ṭōn kanta’ntlo sik jo?

⁷Tu sepei inmo remi inṭanga abinga hlō inpek aka-om phung? Tu thei rahōn inkur pa’nmo avomhrui theikara sâk loa aka-om phung? Tu kemōng kakhempa’n mo akemōnghei netui inloa aka-om phung?

⁸Hivahi ani tina manhretsa tekâk hria kabinga a’nteitôm sik eng changmak, ajârchu Dân kha’num in-angtlinga ahri.

⁹Eini’n Moses Dâna, “Se kha sâng nanmanchōn rachilai ahmur khitmak ruh,” tia niteisōt. Hivahi Pathen in se kha mo atina?

¹⁰Hivahi eini atina me changmak mo? Kae, khavakha einihei sik a a’nzet kae. Hlei kakhōipa leh akakhômpa khan kara kha anchen et, chenna sik a inhōrpuma antatlo sik kae.

¹¹Keini’n Rathla hmuchi kha nankâra kanvor jo. Nangnia inphut keini’n neinâk vâng hnemna kankhôm inchu khavakha akatam hêr jo mo?

¹²Milak he’n hivahi nangnia inphut hmuna sik inhōrna ratha annei inchu, keini’n khava kakhe chet a hmutheina kantanei mak sik mo? Tâk-kha keini’n khava kanratha nei kha hmangmak ung. Khava kanek a, Christa Ṭong kaṭha kha akakhar a-om makna sik heirakip a kandehrat a kae.

¹³Bek-inn ṭōnkatlo mihei khan bek-inna inphut sâk sik anchen khana maichâm ṭōn katlohei kha’m maichâma tōkna inphut chen annei ti inchênna nanmanhret.

¹⁴Khava kapōa ṭong kaṭha kahrihei kha’m khana inphut anhringna sik antahmu sik kae tia Rōngpu khan ṭong pekna anei.

¹⁵Tâk-kha ke’n hiva ratha neina hei hi inkhatbek hmangmak eng; khan chu khava karatha neina hei kha hmang rong tia kaheimazet um changmak. Khava kanek a kei hmapena kathi jôk sik eng! Kei ratha kaneitak a inlensakna hi tu inkhat in ṭong akarōk a mathlâk mak ning.

¹⁶Ke’n ṭong kaṭha kahri jâra inlensakna sik ratha heite neimak eng. Hei-achang inum hiva ṭōn katlo sik a ṭong a’npek jo eng kae. Khana ke’n hiva ṭong kaṭha hi kahri mak a achang inchu heituk a kei sik a inrengna aka-om sik mo!

¹⁷Khana ke’n tlohnōmtak a rathahrok pum a katlo’nchu, tloman rahlâng sik a inhōrna kanei tor jo; kha changloa, Pathen in hiva akatlo sik a angansê eng tia, tlohlam kasōk tihnâma katlo jo.

¹⁸Khan chu, heitloman mo karahlâng sik? Hivahi aman injong loa, ṭong kaṭha ṭōn tlona chunga karatha neina kha injong loa, Ṭong kaṭha hrilena aṭhatchômna kha kae.

¹⁹Kei tûte sōk changmak eng, kaning kahnōm eng kae; tâk mi katamtak kalo manhlut theina sik, kabinga mi rakip sōk a insyem eng.

²⁰Jehudihei leh ṭōn kantlolai, Jehudihei lomanhlut theina sik, Jehudi inkhat kapōa leika-omchen eng; khana kei Moses Dân thōia ka-om mak ravâng, Dân thōia ka-om hei kha kalo manhlut theina sik, anmani leh ṭōn kantlolai, dân thōia aka-om kapōa ka-omchen eng.

²¹Khava kapōa Jât-hlop hei lomanhlut theina sik, anmani leh ṭōn kantlosaplai, Jât-hlop inkhat kapōa Jehudihei dân vângtinga ka-om eng. Hivahi Pathen dân kajuimak changmak; kei kadik khet a Christa dân thōia aka-om eng kae.

²²Taksenna akatlasam hei kha lomanhlut theina sik, akatlasam inkhat kapōa ka-om eng. Khava jâra anmani kâra mi ṭhahrepbek kahuk manhring theina sik, mi rakip hneng heirakip kachang enga kae.

²³Amahâmṭhatna kha kachen theina sik, heirakip hi ṭong kaṭha jâra katlo kae.

²⁴Tlân in-erna mi katamtak katlân hei, tâk inkhat rōk in hratman arahlâng kha nangni’n inchêna nanmanhret. Khava kapōa nangni’m inpâkman nanchenna sik tlân ruh.

²⁵Resik in-er rakip in an-inthem chûklai chôndân kadiktak thōia ka-om hei; khavakha akasôt hmangthei mak sik reihrui lukhu hmun a sik a kae; tâk eini chu kumsôt a aka-om ṭhak sik kha nihnong kae.

²⁶Kha achang jâra kei atorna hmun katlung sik a intlunhrek a katlân eng. Kei akarōksaia kuttum suk a, pha inhmang mak, insukmi inkhat kapō eng kae.

²⁷Milak-hei kha in-erna sik anhei beksō jo hei pha, kei kha kadei mak kachangmakna sik kataksa hi kaman ngara a’nkhîm eng kae.