Read Komrem CORINTHIANHEI INHNINA 1 Bible Online

CORINTHIANHEI INHNINA 1 - Komrem bible

CORINTHIANHEI INHNINA 1

¹Pathen lungdoa, Christa Jesu sonle inkhat Paul, khana nisōpui Timothy in, Corinth a Pathen bekrup hneng, khana Achaia ram pumpuia Pathen mi rakip hei hneng kantahei mazet kae:

²Nipa Pathen leh Rōngpu Jesu Christa khan maritna leh mōngna pek chei rasoh.

³Ni-Rōngpu Jesu Christa Pa leh Pathen kha eini’n manpâk rih, ama lungset maritna kasip, inthōpuina rakip jōng sōkna Pathen kha kae!

⁴Ama’n kankhōdeng theina rakip a a’nthōpui ung, khana khava inthōpuina Pathena inphut kantachen kha keini’n kanhmanga, heirakip a inrim khōdeng katheihei kha kan-inthōpuitor heia kae.

⁵Christa inrimna katamtak a khan keini’n chen kantanei kapōa, Pathen inthōpuina kalentak a kha’num Christa jâra chen kanneia kae.

⁶Keini’n inrim khōdeng theina kande’nchu, khavakha nangni inthōpuina leh hukmanhringna sik a kae; khana keini inthōpuina kanchen inchu, keini tade inrim khōdengthei kapō kha detorna leh thōktorna sik inthōpuina leh ratha ngarna nangni’m a’npek chei kae.

⁷Khava jâra nanchunga kan-inhōrna heitikchena enum inhling mak; kankhōdeng theina nantatheipui ung kapōa, inthōpui kanchenna shunga hinum nangni’m chen nantanei kae ti kanmanhret.

⁸Sōpuihei, keini’n Asia ram a khōdengthei kantade kha nantamanhret sik kanmadu. Kanchunga rônkahrik kalentak in adekhum unga akahring sik a kapha le’nhōrtor mak jo ung.

⁹Thina sik a ṭong tanna kanchunga ṭong ajōng katlung jo mo tia kanleimandon jo. Tâk-kha keini kanbinga chunga inngam sik changloa, akathi akakei inthoi Pathen chung rōk a inngamna sik a omchen kha leikasōk a kae.

¹⁰Khang khava ṭit ka-om tak thina inphut aleihuk ung, khan chu alahuk nôk sik ung tia achunga inhōrna kannei.

¹¹Nanderna hei vâng nan-inthōpui ung. Khava jâra keini sik a nanderpek ṭhakna ung kha masônna ka-om sik, Pathen in mahâmṭhat abōk sik ung; khana mi katamtak in keini sik a manpâkna kare an-ôn sik.

¹²Hiva raleichunga kanhringkhō, akarôn pena nangni leh ni’nmetna chunga hin Pathen tapek me malung ipna omlo leh inthengna vâng, Pathen maritna ratha neina vâng, mihring singna vâng changloa, nichunga vai arôn ti hi keini malung ṭhen theina hin amanchên jâra inlensakna kannei.

¹³Keini’n nantateithei sik, nantamanhret thei sik rōk a nanhnenga kantahei mazet kae. Tûn nangni’n keini ajingtehrep nanmanhret thei unga enum, pui katluk set a nanhong manhret thei sik jo ung tia inhōr eng, hiva jâra ni-Rōngpu Jesu Kani ning khan keini’n nangni kanta’n teipui sik chei kapōa nangni’num keini nan-inteipui tor sik jo ung.

¹⁵Mahâmṭhat vōihniset nanchen theina sik tia, heirakip kachang thei nger sik tia le’nhōr enga ahma inkeia nanhnenga hongna sik le’ntluk eng.

¹⁶Ajârchu Macedonia inphut kahong inleting nanhnenga heihlut sik intluk eng, ajârchu Judea ram jōnna sik a inthōpuina kamadu.

¹⁷Hiva mantlukna hin, kamalung hnetmakna kaleimalâr mo? Ke’n ṭōn kamantluk pha, binga hnemna sik a kabeitak a pha khat shung rōk a, “Ôk, ôk” khana “Dâng, dâng” tina sik a mo kaleisyem?

¹⁸Pathen in akadik ahrikhet dungjuia, nanhnenga ka-intepna kha “Ôk” leh “Dâng” kha changmak.

¹⁹Ajârchu Pathen Sapa, Jesu Christa kha, Silas, Timothy, khana kei khet in nankâra kantalei phôngsōt khachu, “Ôk” leh “Dâng” kha changmak. Khava kanek a ama chu, Pathen in “Ôk” ati kha kae;

²⁰ajârchu ama hi Pathen ṭongtep rakip chunga “Ôk” tina kha kae. Hing’hin Jesu Christa a eini “Amen” ti hi Pathen manlûrna sik a a’nhri kha kae.

²¹Keini kasyem kha Pathen ama khet kae, nangni leh inṭhōia keini hringkhō hi Christa a amanchun me kae; khana ani kaṭhensōt kha’m Pathen khet kae,

²²nikapu changna mêrchîkna nichunga akanam khum leh akarōi bukna heirakip eini sik a akakhōr manbuk kha manchênna sik a Rathla Intheng nimalung shunga anikapekpa kha kae.

²³Ke’n kasâkhi sik a Pathen kabek, ama’n kamalung amanhret! Corinth a semak sik a a’ntluk eng hi nangni ṭhensōt a nan-omna sik a kae.

²⁴Nantaksenna ngarna sik a keini’n rumhrat a manse sik chei intluk mak ung; nantaksenna khan kahnet a kangir chei ti kanmanhret. Khava kahlanga nan-inpâkna sik jôk a keini’n nangni leh ṭōn kantatlo kha kae.