Read Komrem CORINTHIANHEI INHNINA 10 Bible Online

CORINTHIANHEI INHNINA 10 - Komrem bible

CORINTHIANHEI INHNINA 10

¹Nangni leh ni-omsap pha a chu, nunkahōi leh nun-innem antatipa, tâk nangni leh inhlajap a ka-om pha a chu, hnuk kase tia antahripa Paul, ke’n, katak khet in nanhnenga kangek chei kae. Christa nun-innemna leh milungset themna vâng khan

²kangek chei, kahong pha leh rumhrat a hnuk kase amanchang mak ruh; ajârchu raleichung tamadua ṭōn nantlo anikati hei kha inhnaktak a kamanse tor sik hei tia kamandon.

³Raleichunga kahring ung ti hi akadik kae, tâk keini’n raleichung taksa sik a re kantade changmak.

⁴Kanre tlona kantahmang hmangchâk-hei kha raleichung hmangchâk-hei changmak, tâk rekur kahnettak hei sukkhōina ratha kaneitak Pathen hmangchâk-hei kha kae. Keini’n akanimak makhena hei kansuk manhmang;

⁵Pathen man-hretna hlam kakhâra a’nlensak rakip, inshângtak a makhena kathemhei kha, kantasuk machim hei kae; khana sōk changna antakhit malung rakip kanmasō heia Christa ṭong kanmanjui hei.

⁶Khana nangni pui katluk a ṭong kajui nanchang a’nchên sō pha leh, ṭong kajuimak hei kha karâkna pekna sik keini a’ntluk sik ung kae.

⁷Nangni’n avâng pôngting rōk nan-en heia kae. Tu mo inkhat in abinga kei Christa mi eng kae kati ka-om mo? Anmani anchang kapōa khan, keini’m Christa mi akachang ung kae, anbing sik a mandon kaṭha nôk hei rasoh.

⁸Rōngpu tapek eng ratha neina chunga hin akakhe chet a ka’nlensak joa achang inum, kei inzak dekmak eng, hiva ratha neina hichu nangni akasukset kha changloa, nangni akasyemsōt kha kae.

⁹Kachithi hi ke’n nangni kahei maṭhitna chei achang sik madu mak eng.

¹⁰Mi inkhat in hing’hin, “Paul chithi hichu inhnaktak a kangar hêr, tâk ami khet nihnenga a-om jo pha chu, ama innem, aṭong hri kha’m heite emak jo,” atithei sik!

¹¹Khang khava mi inkhat khan kanhong pha kantatlo sik kha kanhong mak hma kantahei mazet chei hi leh in-anghrep a ṭōn kantatlo sik kae ti hi manhret rasoh.

¹²Mi ṭhahrep anbinga a’nchoi inshâng hei kapōa keini chu mi leh intekâkle sik hi kanratha hrok mak! Anmani heituk-hrep a akamo jo hei mo! Anmani anbinga khat leh khat intekâkle heia in-enle hei.

¹³Keini sik a chu, kan inlensakna kha abângna kha khemak ning; nanhnenga ṭōn tlo sik kha leh inveina, Pathen tapek ung ṭōn shunga hrep a sik kae.

¹⁴Nangni khava katlunghrep shunga nan-om jâra, keini nanhnenga Christa Ṭong kaṭha kahei choi pha, khava kakhea inlensak mak ning.

¹⁵Khava jâra Pathen tapek ung hrep kakhea milak-hei ṭōntlo phutnasa chunga keini inlensak mak ung. Khava kanek a ahei tik a Pathen tapekna ung nangni kâra ṭōn kalen chet tlotheina sik a, nantaksenna akakhangchet sik hi kan-inhōrna kae.

¹⁶Khava sō leh chu nangni kakhea ramlak heia Ṭong kaṭha kanvahri thei sik jo, khana milak-hei ṭōn leiphutnasa chunga khan keini inlensakna neimak ung.

¹⁷Tâk-kha ṭong intheng in ahri dungjuia, “Tu achang inum a’nlensak hnōm mi a-om inchu Rōngpu ṭōntlosa chunga khan a’nlensak sik kae.”

¹⁸Ajârchu mi inkhat ama binga a’nhri inṭhat kha akaṭha changmak, tâk Rōngpu’n ahri manṭhat mi kha akaṭha a’nchênkhet kha kae.