Read Komrem CORINTHIANHEI INHNINA 11 Bible Online

CORINTHIANHEI INHNINA 11 - Komrem bible

CORINTHIANHEI INHNINA 11

¹Kei akamohlek inkhat kaleichang inum, nantaleidê theipek sik eng kamadu. Lungsettak a adepek ruh!

²Thangset kanei Pathen achang kapōa, ke’m nan-chunga kathangsetna kana; ajârchu pase inkhat rōk leh lu kahông sik nuhngâk inthengtak inkhat kapōa, Christa leh lu kahông sik a ke’n nangni ṭong ka’nteppui chei kae.

³Eve kha lungthim kaṭhamak malei kasei mari khan ahōnmathlâk kapōa, nangni’m Christa a nanmalung akhenga nantapek kha kabâng sik cheia kha nanmalunga setna ting inhekhâk sik tia kaṭi eng.

⁴Ajârchu nanhnenga akahong mi tu mo inkhat in keini tahri manthang kha tei loa ahlop Jesu anhrile pha inpâk a nanlei rahlânga kae; khana keini hnenga inphut nanta rahlâng Rathla leh ṭong kaṭha tei loa ahlop-hei rathla leh ṭong kaṭha kha nanrahlânga kae.

⁵Ke’n khava nangni “sonle” hlopdet hei kanek a kei akasinpen eng kae tia indonmak eng!

⁶Manhretnating changloa, ṭonghrina ting kei malung kahlutdet kachang sik eng tia indon eng; hivahi ahei tik a khana ajâr rakip a keini’n kanta leihri manchênsa jo kae.

⁷Ke’n nanhnenga Pathen Ṭong kaṭha kahrilelai khan aman heite leider mak chei eng; ajârchu nangni kasyem manlen theina sik chei kei kabinga insinsak enga kae. Khana khan kaṭhe aka-om mo?

⁸Ke’n nankâra ṭōn katlolai khan, bekrup lak he’n tloman kha anleipek eng. Nihria achang inchu, nangni inthōpuina sik ke’n milak-hei nei kachom heia kae.

⁹Kei nangni leh ni-om saplai khan sêr kamadu pha ke’n nangni a’nthōpui ruh tia leimanbōi mak chei eng; ajârchu Macedonia inphut a sōpui akajōng hei khan kamadu karangei katluk a anjōngrôn pek enga kae. Pha akathlengsa kapōa, hnunga achang inum: nangni sik a kei rônkahrik chang hêrmak ning!

¹⁰Christa dikna kha kashunga a-om jâra, Achaia ram a hmun rakip a ka’nlensakna hi daidekmak ning tia intep eng.

¹¹Ke’n kalungset mak chei jâra hi kahri mo? Kalungset chei kha Pathen in amanhret!

¹²“Sonle” ralak he’n keini leh in-anghrep a antlo tia an-inlensakna hei kha khârtheina sik, tuna kaṭōn tlo hi abân bâna kalatlo hi sik a kae.

¹³Anmani kha sonle kadik khet changmak hei, sonle kadikmak hei kha kae, Christa sonle takkhet manpōna sik a anje anthup a anṭōn tlona chunga anmalei kaseia kae.

¹⁴Kaṭha jo, mandon hlana sik om mak! Seitan kapha kha’m marvân ngeva pōna sik a’nhlem thei kae!

¹⁵Khava jâra asōk-hei khan akadik sōk kapōa an-inhlem kha ṭōn kalentak changmak. Achaining kania anmani’n anṭōntlo dungjuia anrahōi kasōk hrep kha antachen sik kae.

¹⁶Ke’n kahri nôk: tûte’n kei hi mikamo inkhat kae tia amandon mak ning. Tâk-kha khanga nanmandon eng inchu, ajingtebek ka’nlensak theina sik akamo kapōa amandon jo paruh.

¹⁷Tûna kahri sik hi Rōngpu tamanhri eng changmak; hinghiva inlensakna hi akamo inkhat kapōa kahri jo kae.

¹⁸Ajârchu mi katamtak ralei taksa dungjuia an-inlensak jo jâra, ke’m anmani leh in-anga katlo sik kae.

¹⁹Nangni nanbinga khangtuk hrep kasing cheia, akamohei kha inpâktak a nanlei mado thei heia kae!

²⁰Tu-tu achang inum nanchunga ṭongpek kapek, nannei kachom, chânga ani in-ôk, nankateitôm, nanhmai inben hei kha inpâktak a nanlei mado heia kae.

²¹Khava sik a kei inzak eng, keini chu kanṭit kase! Tâk-kha mi inkhat heikhat sik a a’nlensak ngam inchu, akamo kapōa kahri kae, ke’m inlensak ngam sik eng.

²²Anmani Hebrewhei mo? Ke’m kae eng. Anmani Israel sahei mo? Ke’m kae eng. Anmani Abraham sōnhei mo? Ke’m kae eng.

²³Anmani Christa sōk-hei mo? Ke’n mi invet kapōa ṭong kasō, anmani kanek a akaṭhachet sōk inkhat eng kae! Ke’n ṭōn inhnakchet a katlo, kurkhum a pha katam ka-om chet eng, sung vânga anvōkchet eng, kathi vetvetna katamchet a kae.

²⁴Jehudi he’n vōi 5 tak sung vânga vōi 39 sasâm anvōk eng;

²⁵vōi 3 Rome sepei he’n anvōk jo eng; hlung vâng vōi khat andeng eng. Vōi 3 rakōng kōina karatō, khana tui kâra pung 24 vōi khat ka-om jo enga kae.

²⁶Khōhme kalônna hmun katamtak a tuilena, inru mikachom heia, Jehudi changpui heia Jât-hlop heia inphut khōdengthei katamtak karatō; khōpui shunga, ram thōia, tui-ôngpui chunga, ṭhōn kadikmak heia inphut khōdengthei inrimna katamtak karatō joa kae.

²⁷Kaṭōn mantlukna hlam a: je kasam, vonṭâm tuihre kade, sâk tluk loa, omna neiloa, pōnsi derkei tluk loa ka-om enga kae.

²⁸Khana alak chu hrisa loa, ani tina bekrup-hei seng sik a insaler enga kae.

²⁹Mi inkhat atlâksam kahmu pha, ke’m tlasamna kanei; mi inkhat setna atlâk pha inrimna kasip eng.

³⁰Kei ka’nlensak sik inchu, heituk a akatlasam eng mo tia malârsōtna kaṭōn tlohei chungchânga a’nlensak sik eng kae.

³¹Rōngpu Jesu Pa leh Pathen khan kamalei seimak ti anmanhret, arahming kha ahei tik a mahâm kaṭha chang rasoh!

³²Kei Damascus a ka-omlai, Aretas Reng thōia ka-om ram vaikarônpa’n kei kasur sik kekot kunga mi amanhlō enga kae.

³³Tâk-kha kurbang kave inkhat a hrai inkhat vâng anleimakhei mathlâk enga ama a inphut leikatlânsōt enga kae.