Read Komrem CORINTHIANHEI INHNINA 13 Bible Online

CORINTHIANHEI INHNINA 13 - Komrem bible

CORINTHIANHEI INHNINA 13

¹Tûna nanhnenga kahong sik hi vōi 3 tlukna jo kae. Ṭong intheng in ahri kapōa, “ṭong kasōk rakip sâkhi 2 a-emak leh akakhe manchênna vâng maher sik kae.”

²Nangni setna aleikatlo jo hei hneng leh alak rakip hneng hri sik kamadu; hivahi nanhnenga vōi 2 tlukna kahong mak hma khan kaleihri jo, tâk tûnum kahlajap a ka-om jâra ave nôk a kahei hri sik: anôk a kahong pha leh chu tûte inkhat karâkna pekna inphut tlânsōt theimak ning.

³Christa khan keia inphut kaṭongsōt ti hi nangni’n manchên sik nanta madu rakip kha nanhmu sik jo. Nanchunga ṭōn tlona, ama tlâksam mak; khava kanek a, aratha hratna nankâra amalâr jôk a kae.

⁴Ama thingrake chunga thina katlunga akatlasam achang ravâng, Pathen ratha hratna khan amanhringa kae. Keini ama leh kan-inchun jâra katlâksam ung; tâk nangni leh ni’nchunna shunga Pathen rathahrat jâra ama hringna kha chen nineisap sik a kae.

⁵Nangni nantaksenna chunga khan akahring chei mo ti jongsōtna sik a, nanbinga in-ensui ruh. Christa kha nanshunga takkhet a aka-om inchên nâk mo? Kha achangmak inchu nantaṭhe hêr jo kae.

⁶Keini chung kasōkmak kanchang makna hi nanmanhret sik tia kataksen chei.

⁷Keini’n kanṭōn pui kanmathluk ti malârna changloa, nangni’n akadik kha nantlo theina sik, keini akatlasam kapō kanchang jo’num, nangni’n akadik mak nantlo makna sik Pathen hneng kantader pek chei kae.

⁸Ajârchu akadik dōina ṭōn inkhatbek keini’n tlotor mak ung, tâk akadik rōk sik a kantloa kae.

⁹Keini kantlâksam pha inpâk ung, tâk nangni chu kangar cheia kae. Khava jâra pui katluk nanchangna sik keini’n kantader pek chei kae.

¹⁰Khava jâra nanhnenga inphut kahlajap a ka-omlai hivahi kaheimazet kae, hiva nangni syem mansetna sik changlo, syemsōtna ratha, Rōngpu tapek eng ratha neina hi, kahongtlung pha leh nanchunga inhnak a kahmang makna sik a kae.

¹¹Khana tûnchu sōpuihei, chibei kapek chei! Pui tlukna sik tak intlo ruh; kahri hi rangei ruh; inkhat leh inkhat intōk ruh; khan chu malung kamōnga om ruh. Khana Pathen lungsetna leh lung mōngna khan ompui chei rasoh.

¹²Inkhat leh inkhat a’ntheng kabeng injôptō pum a inlamtō ruh. Pathen mi rakip he’n anrahlâng chei, chibei anheipek chei.

¹³Rōngpu Jesu Christa maritna, Pathen lungsetna, khana Rathla Intheng thlopna khan nankhenga ompui chei rasoh.