Read Komrem CORINTHIANHEI INHNINA 3 Bible Online

CORINTHIANHEI INHNINA 3 - Komrem bible

CORINTHIANHEI INHNINA 3

¹Hivahi keini kanbinga a’nhri inṭhat kantapō mo? Milak-hei kapōa nanhnenga malâr sik chithi a-emak leh nangnia inphut hnōmpek malârna chithi kantarangei mo?

²Mi rakip in antateia antamanhret sik, kanmalung heia a’nzet jo chithi kantanei khachu nangni chei kae.

³Hivahi Christa khet tamazet keinia inphut ajōngtir chithi kha kae. Hivahi hlung chunga muktui vâng a’nzet changmak, tâk mihring malung shunga, akahring Pathen rathla tamazet kha kae.

⁴Keini’n Christa inphut Pathena inngamna kannei jâra hi kantahri kae.

⁵Ajârchu keini’n hiva ṭōn hi akatlo tor ung kae tia hrina sik ratha heite neimak ung. Hiva ṭōn tlotorna ratha kantanei hi Pathena inphut akajōng kae;

⁶ajârchu ama’n keini intepna ther ṭōn katlo sik rahōi kasōk a asyem jo ung, khana intepna ther khachu dân inzet kha changmak, rathla intepna kha kae. Ajârchu dân inzet khan chu thina amasō, tâk Rathla khan chu hringna apek a kae.

⁷Dân kha ṭongrahme hei hlungpek chung heia le’nzetsōt, khana hivahi ale’npek sōt lai khan Pathen lûrna kha le’nlâra kae. Moses hmai kavâr kha akachibât sik a achang ravâng, ratha kaneitak leikae, Israel mihe’n anhmit inhnget kanga ama lei-en tor mak hei. Thina hongkachoi Dân hmangna shunga, khang khava lûrna leh inṭhōia ahong inchu,

⁸Rathla inzen rarap tachen sik lûrna khachu heituk-hrep a akakhe akachang sik jo mo!

⁹Masetna kapek chôndân kha hmen alûr inchu; hukmanhringna ajōng karôn ṭōntlo kha heituk kakhea akalûr sik mo!

¹⁰Tûna akakhe chet a akavâra alûr jâra hin pha khat a aleikavârhêr akalûr khachu kathlengsō jo nitithei joa kae.

¹¹Ajârchu pha bongkhat sik rōk kha hmen khangtuk alûr inchu, ahei tik a aka-om sik kha heituk-hrep a akakhe chet a akalûr sik mo!

¹²Hiva inhōrna hi kannei jâra, keini inngamtak a kaṭong ung.

¹³A’nthim sik leh a’nhmu mak sik jo Moses hmaisō kavâr kha Israel mihe’n anhmu makna sik ahmai kha pōn inkhua ka-om kapō kha keini changmak ung.

¹⁴Kadiktak a anmalung kot inkhâra ka-om; khana anmani’n intepna marō lekha kha antei pha, khava pōn khan tuning katlung anmalung alamakhua kae. Mi inkhat in Christa leh a’nchun pha leh rōk pinden kha losōtpek a aka-om kae.

¹⁵Anmani’n Moses Dân kha antei akaia, tuning katlung pōn khan anmalung kha, alamakhusi hei.

¹⁶Tâk-kha ṭong intheng in Moses chungchânga ahri kapōa, hivahi hliksōt thei kae: “Ama’n Rōngpu hnengting ahnget pha leh apinden kha inhlik sōt,” ati.

¹⁷Tûnchu hiva ṭong chunga hin, “Rōngpu” kha Rathla kachang jo; khana Rōngpu Rathla omna hmun a khan ning leh hnōm kha ka-om.

¹⁸Eini seng chu hmai makhu loa, Rōngpu lûrna kha nimalâra kae; khava lûrna Rōngpua inphut akajōng rathla khet khan ama kapōhrep a ahei tik a akalenpen lûrna a, nihme kha athleng pek jo mea kae.