Read Komrem CORINTHIANHEI INHNINA 4 Bible Online

CORINTHIANHEI INHNINA 4 - Komrem bible

CORINTHIANHEI INHNINA 4

¹Pathen maritna’n hiva ṭōn tlo sik apek jo ung, khava jâra kanmalung tlâksam mak ung.

²Keini’n ṭōn marûk leh inzakna ṭōn rakip kahlonsōt; keini’n mihōnna ṭōn tlomak ung, Pathen ṭonga maleisei um hrimak ung. Pathen hmit-hmua vâr kadiktak thōia kahring ung khana mi rakip malunga akadik kha anhmu theina sik tak kantloa kae.

³Ṭong kaṭha kantahri hi a’nthup achang inchu, anhmang hei hneng rōk a a’nthup kae.

⁴Anmani kha hiva raleichung pathen kadikmak in, anmalung kha amanjing pek hei jâra anmani’n antataksen mak kae. Pathen kapōhrep kachang Christa lûrna ṭong kaṭha a inphut, anchunga ajōng kavâr vâr kha anmani’n anhmu makna sik, raleichung pathen khan ada heia kae.

⁵Ajârchu keini’n kanbing ṭong kantahrile changmak; Jesu Christa kha Rōngpu kae tia kantahrile kae, khana Jesu jâra keini hi nansōk kapō akachang ung kae.

⁶Ajârchu, “Khō inthimna inphut vâr kha hong kavâr sik!” kati Pathen khan Christa hmaisōa Pathen lûrna vâr kha kanman hretna sik kanmalung shunga avâr kasat invâr kha Pathen khet kha kae.

⁷Achang ravâng ratha neina chunghnung kha Pathen ta kae, keini ta changmak ti kha malârtheina sik a, hiva rathla karōi manbukna kanei ung hi ralei be kapō ung kae.

⁸Keini inrengna kanthōk ṭhak, tâk insukset mak ung; phat khat leh inkei-chio ung, tâk inhōrna kase changmak ung;

⁹keini kan-inrepui katam hei, kha’num ṭhōn kaneimak chu changdek mak ung; vōi khat leh inhnaktak a antlo manset ung, kha’num asuk manhmang mak hei.

¹⁰Keini taksa hina inphut Jesu ahringna kha mihe’n anhmu theina sik, pha rakip a Jesu thina kha akathithei taksa hin kanrônṭhak a kae.

¹¹Hiva a’nhmang sik kantaksa chunga hin Jesu hringna kha kanmalâr theina sik, Jesu jâra kanhring khōa thinathei bōina shunga khan ka-om ṭhak ung.

¹²Hiva manhretna khachu, keini chunga thina’n ṭōn atlo, tâk nangni chunga chu hringna’n ṭōn atloa kae.

¹³Ṭong intheng in, “Ke’n kataksen jâra akaṭong eng kae” ati. Khava kapōhrep a, eini’n nitaksen jâra akaṭong me kae.

¹⁴Ajârchu Rōngpu Jesu akahringa akakei inthoi Pathen khan akei mathōi sik ung, khana nangni leh inṭhōia a-âng shunga aṭhōi manhlut sik me ti hi kanmanhret.

¹⁵Hiva kan-inrimna seng hi nangni jâra kae; Pathen maritna hi mi katamchet chunga atlung jâra Pathen lûrna sik anmani’n inpâkna derna akakhe chet a antanei sik kae.

¹⁶Hiva sik jâra keini kanratha semak. Ani tina kantaksa ngai hi aṭōi inum, kanrathla ngai khachu ani tina kather chet-chet a kae.

¹⁷Khana hiva pha bongkhat inrimna ajingte kantathōk hin pha kasôttak a akakhe chet lûrna sik aṭhōi sik ung kae, kan-inrimna kha mahâmṭhatna khan hingja akhe sik kae.

¹⁸Ajârchu keini’n a’nhmuthei neinâk chunga changloa, a’nhmu theimak neinâk chunga kanmalung kantup a kae. Hmit a hmuthei khachu pha bongkhat rōk sik kae, tâk hmit a hmutheilo khachu kumsôt a sik kha kae.