Read Komrem CORINTHIANHEI INHNINA 5 Bible Online

CORINTHIANHEI INHNINA 5 - Komrem bible

CORINTHIANHEI INHNINA 5

¹Hiva raleichunga kan-omna pōn-inn taksa hi aṭet jo’num, ahei tik a omna sik inn inkhat marvân chunga, Pathen in keini sik asyempek ung ka-om ti hi kanmanhret.

²Tûn khavakha keini’n kan-en, marvâna inphut akajōng kan-inn kha keini antamanvon sik ung kha hingtuk hrep kanmadu;

³khavakha kan-invon jo’nchu, keini taksa kasea om mak jo ning.

⁴Hiva ralei rabuk-inna kan-omlai seng hin suk manrimna kandea inkōia ka-om ung; hivahi kanralei taksa pesōt sik kantamadu khachu changmak, tâk akathithei hi hringna khan athleng theina sik marvân taksa kachang inkhat kha kanta’nvon hnōm kae.

⁵Hiva kan-inthlengna sik intluk hi Pathen kha kae, khana ama’n keini sik a karōi bukna manchênna sik arathla kha apek ung.

⁶Khava jâra keini ahei tik a kanratha kahrok a kae. Khana keini hiva taksa innshunga kanla-om lai seng Pathen inna inphut inhla ung ti hi kanmanhret.

⁷Ajârchu keini hringkhō hi taksena a’nhnga kae, hmit-hmua changmak.

⁸Keini pui katluk a inngam ung khana hiva taksa inn hi dahlona Rōngpu leh omsap sik kha kantamadu jôk kae.

⁹Hina inn achanga sona inn achanga, khon-khon achang inum, heirakip kanek a keini’n ama malung mantlai sik hi kanmadu.

¹⁰Nikhenga Christa ṭongtan in-ongna ângshunga ala’nlâr et sik me kae. Ajârchu taksa ralei hringkhō shunga mi rakip in akaṭha leh akase atlo dungjuia rahōi kasōk kha arahlângna sik a kae.

¹¹Rōngpu ṭit sik kae tina hei hi keini’n kanmanhret, khava jâra mihei kantamathlem hei kae. Pathen in keini pui katluk a amanhret ung, khana nanmalung shunga ke’m nanmanhret sik eng tia inhōr eng.

¹²Keini kanbinga nanhnenga inhri inṭhatna sik tlomak ung; khava kanek a, mihei omchen chunga changloa avângphônga a’nlensak hei kha nanmasôn theina sik, nangni keini jâra nan-inlensakna sik ajâr kaṭha kha pek sik cheia kantarei jôk kae.

¹³Keini akamokhet jo ung mo? Khavakha Pathen sik jâra kae. Achangmak leh akasing ung mo? Nangni sik a kae.

¹⁴Christa lungsetna khan kanchunga vai arôn jâra tûnchu mi rakip sik a mi inkhat akathi kha keini’n kanmanhret, ama thina shunga khan mi rakip in chen ninei et jo kae.

¹⁵Ama mi rakip sik a kathi jo, khavakha akahring mihei khan anmani bing sik a anhring makna sik, tâk-kha anmani sik a aleikathi jo khana kahringa keimathōisōt jo ama sik rōk a anhringna sik a kae.

¹⁶Kha achang jâra keini’n tûte inkhat mihring taksa lang tinga mandon mak jo ung. Pha khat a Christa kapha kha’m taksa ralei ngaia kanleimandon, tâk tûnchu mandon mak jo ung.

¹⁷Tu achang inum Christa leh a’nchun mi kha mihring ather kae; amarō kha kathleng jo, ather kha hong katlung jo.

¹⁸A’ndōipui kanlei changna inphut tûnchu Christa jâra keini aṭhōn amanchang jo ung, khana milak he’m aṭhōn manchangna sik ṭōn kha keini apek jo unga kae, hiva rakip hi Pathen tatlo kae.

¹⁹Keini ṭong khachu Christa jâra mi rakip Pathen in aṭhōn amanchang jo ti hi kae. Mihei setna kha Pathen in teimak jo, khana anmani kha heikhong mo aṭhōna asyem ti ṭong kha keini apek jo ung.

²⁰Hinahin Pathen in keinia inphut ṭong ahri kapōa, keini’n Christa sik a kantahri kae. Christa kahlâng kathlenga kantangek chei kae. A’nrepui nanchangna inphut Pathen in aṭhōn manchang chei rasoh.

²¹Christa khan setna neimak, tâk eini ama leh ni’nchunna shunga khan Pathen dikna kha nichensōm theina sik Pathen in eini setna kha ama chen amanchang jo kae.