Read Komrem CORINTHIANHEI INHNINA 6 Bible Online

CORINTHIANHEI INHNINA 6 - Komrem bible

CORINTHIANHEI INHNINA 6

¹Pathen leh inṭhōia kanṭōn tlona shunga khan tûnchu Pathen maritna kanchen jo, nangni’n khavakha ahnemna kase manchang mak ruh tia kantangek chei kae.

²Pathen in heimo ahri rangei ruh: “Nangni ka’nṭang puina sik pha kha ajōng inhlâng pha nantader kha kathei pek chei; nangni hukmanhringna pha kha ajōng tlung pha ke’n ka’nthōpui chei.” Rangei ruh! Tûn hi Pathen hnōm pekna phatak kha kae; tuning hi inhuk inhringna kani kha kae!

³Kanṭōn tlona chunga tu mo inkhat in masetna ahmu sik kha madu mak unga, tu inkhat hlam hrona inpai inthlûkna damakna sik kantloa kae.

⁴Achang ravâng kantlona rakip a khōdeng theina, intakna, khôkna chunga kandehrat a Pathen sōk kanchangna kha kanmalâr.

⁵Keini anvōk ung, kurkhum a ankhum ung, mipui he’n kanchunga anhnuk leikana; busâk manlo leh jelo leoa leikalôn ung.

⁶Pathen sōk kanchang hi kan-inthengna, kanmanhretna, kandehratna leh lungsetna vâng kanmalâr, khan chu Rathla Intheng vâng, lungsetna kadiktak vâng,

⁷kanṭong rôn kadik vâng, khana Pathen ratha hratna vâng kanmalâr. Keini’n akadik kha pho leh chem kanmanchanga, inhrungna leh re dena kanhmanga kae.

⁸Keini hnōi anse ung, kaja’m ankaja ung; anmaset ung, manpâk um anmanpâk ung. Keini malei kasei kapōa antlo ung, kha’num akadiktak kantahri kae;

⁹manhret lo kapōa antlo ung, kha’num keini mi rakip in anmanhret ung; akathi kanpō, tâk, nantahmu ung kapōa kahring ṭhak ung. Karâkna anpek ung ravâng, athat mak hei;

¹⁰kanmalung inrim ravâng, ahei tik a keini inpâk ung; sara kachang kanpō, tâk mi katamtak kanmanhao hei; heite kaneimak kanpō, kha’num kadiktak a chu heirakip kannei.

¹¹Corinth a ka-om kanṭhōnhei! Malung inthengtak a nanhnenga kantahri kae; kanmalung kot kanmahlâng manlen pek chei.

¹²Keini’n kanmalung kot kantakam pek chei changmak; nangni’n nanmalung kot nantakam pek ung kae.

¹³Kasahei ângphungtak a tûn nanhnenga kahei hri kae: keini’n kantamandon chei kapōa hin nangni’n num nanmandonna ung amanhmu ruh: Nanmalung kot mahlâng manlen ruh!

¹⁴Akataksenmak hei leh in-anga ṭōn katlo sik a inreimak ruh, ajârchu kha ethei mak. Heikhong mo akadik leh akadik mak in chen antaneisap thei sik? Heikhong mo a’nthim leh akavâr aka-omsap thei sik?

¹⁵Heikhong mo Christa leh Seitan a’ntōk thei sik? Heikhong mo akataksen inkhat leh akataksenmak in-angna antaneithei sik?

¹⁶Heikhong mo Pathen bek-inn kha limsyem bekna leh man-ang thei sik? Ajârchu akahring ṭhak Pathen bek-inn kha eini me kae! Pathen ama khet in ahri: “Ke’n ka-inn kha kami heia inphut kasyem sik khana ankâra ka-om sik eng; kei an-Pathen kachang sik eng, khana anmani kami akachang sik hei kae.”

¹⁷Khava jâra Rōngpu khan ahri, “Nangni’n anmani nantadahlon nger sik hei kae anmania inphut a’nṭhensōt sik chei kae. A’nthengmak inti leh heite nantatlosap mak sik kae, khana ke’n nangni karahlâng sik chei.

¹⁸Kei nanpa kachang sik eng, khana nangni kasapahei leh kasanuhei kachang sik chei, Akahratpen Rōngpu khan ati.”