Read Komrem CORINTHIANHEI INHNINA 8 Bible Online

CORINTHIANHEI INHNINA 8 - Komrem bible

CORINTHIANHEI INHNINA 8

¹Kansōpuihei, Macedonia bekrup-hei chunga Pathen maritna’n ṭōnpui amathluk kha nantamanhret sik kanmadu.

²Anmani’n inrim khōdeng theina inhnaktak a enmansinna anratō ravâng; sara anchang pupuma malung kalentak a pekna anneia khana an-inpâkna khang hrep a khan kalena kae.

³Anmani’n antator kakham kha anpek, khana khava kakhe chet a antapekna kha kahri manchên pek chei kae. Anbinga maduna dungjuia

⁴Judea ram a Pathen mihei inthōpuina kha chen nei rung tia kanhnenga ander unga kae.

⁵Khava antatlo kha ni’nhōrpui hei kakhea antatlo jo kae! Ahmapena Rōngpua inpesōt hei; khava sōa Pathen lungdo dungjuia keini hneng um inpesōt heia kae.

⁶Khava jâra hiva lungsetna ṭōnpui Titus in aleiphutsa jo chunga hin, pui katluk a nangni a’nthōpuina sik chei, aṭōn atlo manjônna sik keini’n kanngek a kae.

⁷Heirakip a nangni kahao jo chei: Taksena, ṭonghrina, khana themnating, inthōpui sik ratha hrokna leh keini nanlung setna unga. Khava jâra hiva lungsetna pekna langting hinum malung kalentak a pekna nantanei sik kanmadu.

⁸Ke’n dân heite syem mak eng. Tâk-kha alak he’n heituk inthōpui hnōmna malung antanei kha manhmu cheia, nangni lungsetna kha heikhong hrep mo akadik ti kha hmusōtna sik a katlo kae.

⁹Ni-Rōngpu Jesu Christa maritna me kha nangni’n nanmanhret; ama sara changna vâng nangni mikahao nanchangna sik a, mikahao ama kha nangni sik a abinga sara inchang joa kae.

¹⁰Hiva chunga kei tamandon chu hi kae, yângkuma nantalei phutsa jo ṭōn kha tûnchu nantatlosōt sik jo hi nangni sik akaṭha kae. Ṭōn katlo sik rōk hnâm changloa tlohnōmtak a akatlosōt sik hi’m, nangni ahma inkeipen chei kae.

¹¹Tlo manjōm una, ṭōn kha chai ruh! Ṭōnmantluk laia kapōa ṭōn chainating kha’num hngâk-hlatak a tlo ruh, tûntûna nantorchena tlo ruh.

¹²Pek-hnōmna malung nannei inchu, nantanei mak chunga changloa, nantanei pekna chunga khan Pathen in arahlâng sik.

¹³Milak-hei phur yângna sik nangni rônkahrik manrôn chei rong katina chu changmak; tâk nangni’n tûn hingja nanneilai hin, akaneimak hei kha nanta’nthōpui sik hei hi akaṭha kae. Khan chu nangni’n nanhong neimak pha, anmani’n hingja anneia achang inchu, anmani’n nangni anta’nthōpui nôk sik chei kae. Khang’khan khat leh khat in-anghrep a a’nbômtō sik me kae.

¹⁵Ṭong intheng in ahri kapōa, “Akatamtak kabuk mi khan a’nhlei neidek mak, akatlômtek kabuk mi kha’num vâtdek mak.”

¹⁶Keini kapōa Titus inum nangni bômna sik aratha ahrok jâra Pathen kha heituk a kantamanpâk jo mo!

¹⁷Keini ngekna akahnōm rōk hi changmak; arachamtak a ratha kahroktak a nangni inthōpui sik a ale’ntluksa kae.

¹⁸Ama leh inṭhōia bekrup rakip takaja ṭong kaṭha hrina ṭōn chunga malung kahlut sōpuipa hi leh kantahei tir hei kae.

¹⁹Khava rōk kha’m changloa, keini’n Rōngpu lûrna sik lungsetna ṭōn tlosōtna chunga, khana mi hnenga inthōpui sik kanmadu ti hi malârna sik a keini leh inṭhōia akasesap sik a ama hi bekrup he’n antamanṭhat a antakadei jo kae.

²⁰Hiva lungset kathem kutchoi pekna chungchânga hin tûte’n animaset makna sik kagûttak a kantatlo kae.

²¹Keini mantlukna hi Pathen hnenga rōk changloa, mihring hmit-hmua’m akadik tlo sik hi kantamadu kae.

²²Khava sik jâra nisōpui ama hi anmani leh inṭhōia kantahei tir kae; keini’n ama hi pha katamtak a kan-enmansina, inthōpuina chungchânga amalung kahlut hêr ti hi kanhmusōt a kae. Khana tûn ama’n nanchunga inngamna hingtuk hrep anei joa, mi inthōpuina sik a aratha kahrokchet joa kae.

²³Titus hichu nangni inthōpuia kei leh ṭōn katlosap inkhat kae; khana sōpui alak-hei hichu, bekrup rakip kahlâng kathlenga Christa lûrna heikachoi hei kae.

²⁴Nangni chunga ka’nlensakna kha kadik tia inchênna bekrup he’n anman hretsōtna sik, leilungset hei ruh.