Read Komrem CORINTHIANHEI INHNINA 9 Bible Online

CORINTHIANHEI INHNINA 9 - Komrem bible

CORINTHIANHEI INHNINA 9

¹Judea ram a Pathen mihei inthōpuina tir sik chungchânga hin heimazet sik cheia heite rangei mak.

²Ajârchu nangni’n nan-inthōpui hnōm hei ti ke’n kamanhret, khana Macedonia mihei hneng nangni chungchânga le’nlensak eng. “Achaia ram a sōpui he’n, yângkuma inphut inthōpuina sik a intluk jo hei kalei tia kae.” Khava nanratha hrok khan mi katamtak malung amathok heia kae.

³Khanga kale’nteina ṭong kha môk-hnâm changmak ning tia kamandon, tûnhin ke’n nisōpuihei hi kahei tir hei kae. Tâk-kha kahri kapōa khan, nan-inthōpuina sik kha, leimantluk dek ruh.

⁴Kha achangmak inchu, Macedonia inphut a mihei kha leh inṭhōia kanhong pha, nanle’ntluk dekmak kha anhmusōt inchu, nangni inzak rōk sik kha hrina changmak a, hingtuk hrep a inteipui nanchangna chunga hin heituk a keini a’nzak sik ung mo!

⁵Khava jâra nan-inthōpuina sik a nanṭong tepsa kha kahong mak hma nanleimantluk dekna sik nisōpuihei hi ahma inkeia nanhnenga anhongna sik ngekna arangei tia kamandon kae. Kei kahong pha rumhrat a mantlo ngerna sik changloa, tōk hnōmtak a nantapek kha, inlâr sik jo.

⁶Hmuchi katlomtek kavor mi khan akatlômtek alōk sik kae; hmuchi katamtak kavor mi khan akatamtak alōk sik kae ti hi mandonsōt ruh.

⁷Mi rakip in antapek sik kha katlai senga anpekna sik mandon hei rasoh, rumhrat tak a maner pum a pek mak rasoh; ajârchu, malung katlai senga kapek mi kha, Pathen in alungset kae.

⁸Khana ṭhatna hlam rakip a inhleia nachen torna sik leh ahei tik a namadu rangei inhlei leoa Pathen in apektor chea kae.

⁹Ṭong intheng in ahri: “Ama’n malung kalentak a akachâm hei kha apek hei; alungsetna ahei tik a ka-om ṭhak.”

¹⁰Hmuchi vor sik a leh sâk sik buhlom akapek Pathen khan nanta madu hmuchi rakip kha apek sik cheia kha nanhmuchi amankhang pek sik chei, khana pek hnōmtak a nantapek khana inphut kara katamtak amanpung pek sik cheia kae.

¹¹Ama’n ahei tik a malung kalentak a nanpek torna sik amanhao sik chei, khana inphut a mi katamtak in keinia inphut antarahlâng nankutchoi pek tam jâra khan Pathen antamanpâk sik kae.

¹²Hiva inthōpuina ṭōn nantatlo hi Pathen mi akatlâksam hei rōk nanta’nthōpui hei changloa, Pathen hneng inpâk malârna kha’m ajōng rôn sōt kae.

¹³Nanṭōn tlosōtna khan amanchên jo jâra, nangni’n Christa ṭong intheng nantahrisōt kha nanjui jâra khana pek hnōmtak a anmani leh mi rakip chen nanneipui hei jâra, mi katamtak in Pathen kha lulenna antapek sik kae.

¹⁴Pathen in maritna inlaktak aleimanhmu jo jâr cheia anmani’n lungsetna inritak a nangni sik antaderpek sik chei kae.

¹⁵Akutchoi mankase jâra Pathen kha manpâk rih.