Read Komrem GALATIANHEI 1 Bible Online

GALATIANHEI 1 - Komrem bible

GALATIANHEI 1

¹Mihringa inphut leh mihring themna vânga changloa, tâk Jesu Christa leh ama thina inphut akakei inthōipa, Pathena inphut sonle inkhat kachang sik a beksōt, Paul ke’n kaheimazet kae.

²Galatia bekrup-hei hneng kei leh inṭhōia hiva hmun a sōpuihei seng in marimna chibei kanhei pek chei:

³Ni-Pa Pathen leh Rōngpu Jesu Christa’n maritna leh lung mōngna kha pek chei rasoh.

⁴Tûnlai pha kaṭhamak a inphut eini ning leh hnōma masōna sik, ni-Pa, Pathen lungdo kajuia Christa kha abinga nisetnahei jâra inpek sōt jo.

⁵Lûrna kha are-rea Pathen ta changṭhak rasoh! Amen.

⁶Inlak kasak hêr chei! Pha katôitek shunga Christa maritna vânga nankabekpa nanda hlona, ṭong kaṭha hlop nanmajôm jo.

⁷Kadiktak a kahri kae, “ṭong kaṭha alak om mak”, hiva katina ajârchu mi ṭhahrep in nangni aluk-alet a hmangcheia Christa ṭong kaṭha kha ahlop inkhat vâng thleng sik akatlo ka-om hei.

⁸Tâk-kha keini kanchang inum, marvâna inphut ngeva achang inum ahma inkeia nanhnenga kanta leihri, khava teilo ṭong kaṭha ahlop inkhat nanhnenga ahong kahri mi kha hmeikhura maset chen rasoh!

⁹Hma inkeia kanleihri jo, tûnum hri nôk rong: nangni’n nantalei rahlângsa jo ṭong kaṭha khava teilo alak ṭong kaṭha hlop inkhat nanhnenga mi inkhat in ahong hri’nchu, ama kha hmeikhura maset chen rasoh!

¹⁰Hivahi mihring hnōm pekna jongna kahri mo? Kha changkhet mak! Kamadu khachu Pathen mandikna kae! Kei mipuihei manhretna sik kajong mo? Ke’n tûn katlung hin mipuihei manhretna sik eng kalajong achang inchu, kei Christa sōk inkhat changmak ning.

¹¹Sōpuihei, ke’n hi hripek chei rong, ke’n ṭong kaṭha kahri hi mi-hringa inphut changmak.

¹²Hivahi tûte’n amanthei mak, khan chu mihring inkhat a inphut a kahmu’m changmak. Hivahi Jesu Christa ama khet in aphôngpek eng kae.

¹³Kei Jehudihei beklangting kamalung aleihlut lai khan, Pathen bekrup kha lungsetna neilo hêra manhmangna sik kator chenna kaleitlo kha nanlei thei sik jo.

¹⁴Kakum in-angpui hei kâra kei Jehudi beklangting chôndân kajui hma kakeipen inkhat leikachang eng, pu leh pi hei insena ṭong chunga malung aleikahlutpen eng kae.

¹⁵Achang ravâng Pathen in marittak a ka’ntet mak hma inphut akadei eng, khana ama inzen sik a abek eng kae. Khana Asapa kha kei hneng malâr sik arei pha

¹⁶Jât-hlop hei hneng ama chungchânga, Ṭong kaṭha kavahrile theina sik ke’n, ani’nse sik a, tûte hneng leise mak eng,

¹⁷kei mak hma sonle aleikachangsa Jerusalema ka-om hei hneng um leise mak eng. Khava kanek a Arabiating leikaserek enga, khava sōa Damascus a he’nle enga kae.

¹⁸Kum 3 sō tōa Peter hneng ṭong kalo Jerusalema vakase enga, kani vehni vaka-omsap unga kae.

¹⁹Rōngpu sōpui James teilo sonle alak inkhatbek ke’n leihmu mak eng.

²⁰Ke’n kamazet hi akadik kae. Maleisei tlomak eng ti hi Pathen in amanhret!

²¹Khava sōa Syria leh Cilicia hmun heia vakase eng.

²²Khava pha katlunga khan Judea ram a Christian bekrup mihe’n kei amanhret manchênmak heia kae.

²³Anmani’n milak-hei hrina hrep a antathei khachu hi kae: “Eini inrimna anilei kapekpa khan tûnchu pha khat a suk manhmang sik a aleitlo taksenna ṭong kha ahrile jo!”

²⁴Khang’khan anmani’n kei jâra Pathen anmanpâk a kae.