Read Komrem GALATIANHEI 2 Bible Online

GALATIANHEI 2 - Komrem bible

GALATIANHEI 2

¹Kum 14 sōa Barnabas leh inṭhōia Jerusalema vakase nôk enga, Titus um kaṭhōisa a kae.

²Kasen a sik a Pathen in aleimalâr pek eng jâra kei leikase eng. Hlamkakeihei leh binga intûpna inkhat a ke’n Jât-hlop hei hneng ṭong kaṭha kavaphông kha kaleihri manchên pek hei. Hma a leh tûntûna kaṭōntlo kha hnemna kase a-e sik ke’n leimadu mak eng.

³Ke’n ka’nthlop pui Titus hi, Greek mi inkhat achang ravâng, avun tan ngerna sik a tlomak eng,

⁴mi ṭhahrep in avun anmantan hnōm tâk inum. Anmani hi, eini Christa leh ni’nchunna shunga nining nihnōma ni-omna hi aka-ensui sik a, aka-en inthlip a ahong kahlut hei kae. Anmani’n eini hi sōk manchang sik anmadu mea kae,

⁵nangni’n hringna ṭong kaṭha akadik kha nan-inda theina sik, keini’n anmani kha pha bongkhat rōk um leihnōm pek mak hei unga kae.

⁶Kha’num hlamkakei inhlem hei kha tu-anchang inum kei sik a chu an-in angmakna omdek mak; ajârchu mihei kha Pathen in avângting enmak, khava hlamkakeihei chungchânga, kei sik a chu athera hrina sik om mak.

⁷Khava kanek a, Jehudihei hneng ṭong kaṭha hri sik ṭōn hi Peter hneng Pathen in apek kapōa khan, Jât-hlop hei hneng ṭong kaṭha hrina sik ṭōn hi kei hneng Pathen in apek eng kha anmani’n anhmu jo.

⁸Ajârchu Peter kha Jehudihei hneng sonle inkhat a asyem kapōa, Pathen ratha hratna vâng khan Jât-hlop hei hneng kei sonle inkhat a asyem eng kae.

⁹Ahlop mônga Pathen in hiva ṭōn hi apek eng ti hi hlamkakei kachang James, Peter, John, he’n manhretna annei, khava jâra kei leh Barnabas kut antamatua kankhenga sap changna mêrchîkna chibei anleitlo ung. Anmani Jehudihei hneng, Barnabas leh ke’n Jât-hlop hei hneng ṭōn kantatlo sik a leikahnōm ung.

¹⁰Anmani rup kâra sara khōdeng katheihei kha kanta’nthōpui sik hei hi anmani taleider kha kae, hiva ṭōnkhet hi tlo sik a kalei hngâk-hla kha kae.

¹¹Tâk Peter in Antioch a ahong pha, inchêntak a aṭhe jâra mipui kâra, ke’n kamakhea kae.

¹²James tahei tir mi ṭhahrep hei kha anheitlung mak hma, Peter in sōpui Jât-hlop hei leh thlai anleisâksap a kae. Tâk-kha anmani anhongtlung jo pha, Peter kha anmani leh akasâksap mak sik a akahnungting inkaia intet jo, ajârchu Jât-hlop hei vuntan sik indu mihei kha ama’n aṭit heia kae.

¹³Sōpui Jehudihei kha Peter leh inṭhōia ṭit inphut jo hei; Barnabas kapha an omchen a khan kaṭi joa kae.

¹⁴Ṭong kaṭha dungjuia anmani’n omchen kadik antatlo mak kha kahmu pha, ankhenga anhmai kunga ke’n Peter hneng kati, “Nang Jehudi inkhat che kae, Jehudi mi inkhat kapōa om mak che, Jât-hlop inkhat kapōa ka-om che. Hi achang inchu, Jât-hlop hei kha khong inmo Jehudihei omdâna naman om tor sik hei katia kae?”

¹⁵Kadik, eini Jehudia a’nte me kae, “Jât-hlop mikasehei kha”, changmak me.

¹⁶Achang inum Dân tamadu tlo jâra eloa, Jesu Christa taksen jâr rōk a mi inkhat kha Pathen leh amandiksap hei. Dân tamadu tlo jâra eloa, Christa nitaksenna khan Pathen leh amandik sapna sik me keini’n Christa Jesu kantaksen jo. Ajârchu Dân tamadu tlo jâra tûte Pathen leh mandiksap mak a kae.

¹⁷Kha achang inchu, eini’n, Christa leh inchunna shunga Pathen leh diksapna sik nijong inchu, eini Jât-hlop hei leh in-anghrep a mikase me kae ti inhmua kae, khan chu Christa kha setna razenna a’nṭang jo mo? Changmak!

¹⁸Ke’n kasuk manhlêr jo Dân kha syem mantherna sik katlo’nchu kei kabinga Dân kasukṭhe kachang kha kamalâr kae.

¹⁹Hei-achang inum, Dân a khan kei kathi jo eng, Dân khan athat jo eng, Pathen sik a kahring theina sik a kae. Christa leh inṭhōia thingrake chunga leikathisap jo eng,

²⁰akahring hi kei emak jo eng, tâk kashunga akahring Christa kha kae. Tûna hringkhōa kahring hi, ani’nlungset a ahringkhō kei sik a anileikapek, Pathen sapa taksenna jâra akahring eng kae.

²¹Pathen maritna kha hlonsōt sik kei hnōm mak eng. Tâk-kha mi inkhat hi Dân in Pathen leh amandiksap thei inchu, Christa leithi kha hnemna kase tina kae.