Read Komrem GALATIANHEI 3 Bible Online

GALATIANHEI 3 - Komrem bible

GALATIANHEI 3

¹Nangni Galatia mikamohei! Tu’n mo athlim chei? Thingrake chunga Jesu Christa athije kha nanhmit in inchêntak a nanleihmu jo.

²Hiva ṭong inkhat hi amanthei ruh: Dân tamadu kha nantlo jâra mo, a-emak leh ṭong kaṭha nantheia inphut taksen jâra mo, Pathen rathla nangni’n nantaleichen?

³Hingtuk hrep hin heisa mo akamo chei! Pathen Rathla a ale’nphut jo chei kha; tûn nangni bing ratha hratna vâng chai sik mo nantati?

⁴Nangni’n nantahmu leh nantathei hei kha ahnemna heite om mak jo mo? Kadiktak a ahnemna ṭhahrep ka-om!

⁵Pathen in Rathla apek cheia nankâra tlotor mak ṭōn-inlak atlo hei kha Dân tamadu ṭōn nantlo jâra mo, a-emak leh ṭong kaṭha nanthei pha nantaksen jâra mo?

⁶Abraham chungchânga mandon ruh; ṭong intheng in hinga ahri, “Abraham in ataksen, khana ama’n ataksen jâra Pathen in ama mikadik a alo jo.”

⁷Khan chu taksenna kanei mihei kha, Abraham sōn kadiktak hei kae ti hi nangni’n manhret ruh.

⁸Jât-hlop hei khan antaksen jâra Pathen in ama leh inṭhōia amandiksap hei ti hi ṭong inthenga aleihridek jo kae. Khava jâra ṭong intheng shunga ṭong kaṭha kha Abraham hneng aphông: “Nanga inphut a Pathen in raleichung mi rakip mahâmṭhatna apek sik hei kae.”

⁹Abraham in taksen jâra mahâmṭhat achen; khava kapōa akataksen rakip ama leh in-anga mahâmṭhatna kha antachen sik kae.

¹⁰Dân juina chunga a’nngam hei kha hâksêrna thōia akahring hei kae. Ajârchu ṭong intheng in, “Tu achang inum dânrabu shunga a’nzet rakip kha ahei tik a ajuimak inchu, hâksêr thōia aka-om kae!” ati.

¹¹Tûnchu, Dân dungjuia tûte Pathen leh kadiksap a om tor mak ti hi inchên jo, ajârchu ṭong intheng in ati, “Taksen jâra Pathen leh kadik a aka-om mi kha akahring sik kae.”

¹²Tâk-kha Dân khachu taksenna chunga a’nngam changmak. Khava kahlanga, ṭong intheng in hing’hin, “Dân tamadu rakip katlo mi kha kahring sik,” ati.

¹³Tâk-kha Dân tarôn sōt hâksêrna kachen kha Christa kachang joa, eini hâksêrna inphut ning leh hnōma Christa khan amasō jo me; ṭong intheng in hinga, “Tu achang inum thinglera a’nkheihlon kha hâksêr kachen kae,” ati.

¹⁴Pathen in Abraham hneng aleitep mahâmṭhatna kha Christa Jesu jâra Jât-hlop he’num anchenna sik, khan chu taksen jâra Pathen Rathla kha nichenna sik Christa khan khava ṭōn kha atlo jo kae.

¹⁵Kasōpuihei, ke’n ani tina tekâk inkhat heihmang rong: mi 2 he’n heikhat chunga ṭong intepna antanei kha anmazet pha khava intepna kha mi inkhat rōk in sukkhōi theimak, khan chu besa’m besa theimak.

¹⁶Tûn Pathen in Abraham leh asōnhei hneng intepna aleinei. Ṭong intheng in mi katamtak manhretna, “Nasōnhei”, timak, “Nasōn” ati kae, ti chu mi inkhat rōk, Christa kha atina kae.

¹⁷Hiva katina khachu Pathen in Abraham leh inṭhōia inhnōmtōna inkhat aleisyem khana intepna kha pui mathluk sik a ṭong le’ntep. Kum 430 sō tōa ale’npek Dân khan, khava inhnōmna Pathen ṭong intepna kha vōkkhōi tor mak ning.

¹⁸Ajârchu Pathen kutchoi kha Dân chunga a’nngai achang inchu, a’ntepna chunga a’nngai changmak jo. Achang ravâng hivahi ṭong intepna aleinei jâra Pathen in khava kutchoi kha Abraham hneng aleipek kae.

¹⁹Khan chu, Dân kha heisik a mo a’npek? Khava khachu Abraham sōn inkhat akajōng sik a a’ntep kha ajōngmak kârsenga sik, dikmak katlo kha malârna sik a a’npeksa kae. Dân kha marvân ngeva’n mi inkhat akâklak a inmatna katlo hnenga ajōng pek.

²⁰Tâk-kha mi inkhat rōk inṭangna achang jo pha akâklak a inmatna katlo sik kha rangei mak jo; khana Pathen kha inkhat rōk kae.

²¹Khan chu Dân kha Pathen intepna kadōi akachang jo mo? Kha changmak! Ajârchu hringna kapek tor Dân kha mihring in arahlâng jo achang inchu, Dân kha juia mi rakip Pathen leh amandiksap tor sik kae.

²²Tâk-kha ṭong intheng in ahri khachu vânhnōi hi setna ratha neina thōia ka-om; khana Jesu Christa taksen jâra intepna kutchoi kha akataksenhei hnenga a’npek kae.

²³Taksenna sik pha kha ajōng tlung mak hma, akahong taksen hi ajōng inphông mak hma seng, Dân khan eini nikhenga khum mi kapōa kurkhum a akekhum mea kae.

²⁴Khava jâra taksenna vâng eini Pathen leh inṭhōia kadik a omsap theina sik Christa ajōngmak kârseng, Dân khan nichunga ani ka-ensui leikae.

²⁵Tûnchu Dân ta-ensui sik me rangei mak jo, ajârchu taksen sik kha hin ka-om joa kae.

²⁶Nangni Christa Jesua inchunna shunga taksen jâra nankhenga Pathen sa kachang jo chei.

²⁷Nangni Christa leh inchunna shunga tui leikahlut jo chei, khana hinga nihrisa’n chu, nangni tûnchu Christa hringkhōkhet kha a’nvon jo chei kae.

²⁸Khava jâra sōk leh akapu, nuhmei leh pase, Jehudi leh Jât-hlop ṭhenna sik heite om mak jo; nankhenga Jesu Christa leh inchunna shunga pumkhat rōk kachang jo chei.

²⁹Nangni Christa ta nanchang inchu, nangni Abraham sōn chei kha kae, nangni Pathen ṭongtep kha nantachen sik kae.