Read Komrem GALATIANHEI 4 Bible Online

GALATIANHEI 4 - Komrem bible

GALATIANHEI 4

¹Tâk-kha tûn abân hi, apa karōi rakip kachen sik sapa kha heirakip atâ achang inum asinlai seng chu sōk inkhat kapōa achunga omchen le’ntloa kae.

²Ama naipang achanglai seng apa phatep atluk mak lai seng, ama leh aṭōn chunga mihe’n anta-ensui kae.

³Khava leh in-anghrep a, eini’m rathla a pui nitluk mak hma seng vânhnōia rathlahei vairônna thōia leika-om me.

⁴Tâk-kha achaina pha kaṭhahrep kha ahong tlung jo pha, Pathen in ama khet Sapa ajōngtir jo. Ama Jehudihei Dân thōia nuhmei inkhat sapa kapōa kajōng jo.

⁵Eini Pathen sahei nichang theina sik a dân thōia nileiomna inphut ni’nsō sik a kajōng jo.

⁶Nangni asa nuhngâk leh pase nanchang malârna sik, Pathen in Sapa Rathla kha nimalung shunga ajōng tira, khava rathla khan, “Apa, kapa” tia abek a kae.

⁷Khava jâra tûnchu, nangni sōk changmak jo chei, tâk sapa a-emak leh sanu inkhat jo chei kae. Khang’khan nan-e jâra, Pathen in akarōi kahlō nangnihei sik a anei rakip kha apek sik chei kae.

⁸Hmalai nangni’n Pathen leimanhret mak chei, khava jâra Pathen kachangmak hei sōk leikachang cheia kae.

⁹Tâk tûnchu nangni’n Pathen kha nanmanhret jo, Pathen in nangni amanhret jo chei kati sik, khan chu heikhonga mo akatlasam leh heite kaemak vaikarôn rathlahei hneng inle nôk sik a nanta madu? Heisa mo anmani sōk chang nôk sik nanta madu?

¹⁰Nangni’n ahlop mônga kani, thla, pha khana kumhei chunga nanmalung nanmanhlut a kae.

¹¹Nangni sik a kamalung inrim! Kaṭōntlo rakip hei hi hmangna kase nanta manchang sik mo?

¹²Kasōpuihei, kei apō ruh, tia kangek chei kae. Ke’num heirakip a nangni kapō chei kae. Kei chunga nanṭhena heite om mak.

¹³Ahma inkeia nanhnenga ṭong kaṭha kaleihrilai khan kataksa leidammak ti kha heijâra mo mandonsōt ruh.

¹⁴Tâk-kha kataksa chunga natna kha nangni sik a enmansinna kalentak aleichang ravâng, nangni’n aleihmu masimak chei, rahlâng mak um atlo mak chei. Khava kanek a, marvân ngeva kapō leh Jesu Christa kapōa nanlei rahlâng enga kae.

¹⁵Nangni kahōi hrânghra jo chei! Heimo kachang jo chei? Ke’n nanhnenga hinga kahritor, khachu nantor inchu nanhmit hei nantakhersōt a nantaleipek sik enga kae.

¹⁶Akadik kahri pek chei jâra tûnhin nan-inrepui akachang jo eng mo?

¹⁷Milak-hei khan nanchunga lumlohêrna anmalâr, tâk antatup kha akaṭha emak, anmani’n antamadu khet khachu keia inphut nangni ṭhensōtna sik, khana anmani’n nangni lum antalochei kapōa nangni’num anmani lum nanta lo sik hei kha kae.

¹⁸Tûnchu, lungtup kha akaṭha achang inchu khang khava lum lona kha rahnaktak a nei sik hi akaṭha kae, hivahi ka-ompuilai chei rōk changloa, apha rakip sik a kae.

¹⁹Kasa marit hei! Vōi khat nôk, nu inkhat in anai neia ade kapōa nanshunga Christa nunchen a’nsyemsōt mak lai seng khava natna leh a’n-anghrep kha nangni sik a kadea kae.

²⁰Ke’n nanhnenga omchen hlop inkhat kahei rôn sōt theina sik, tûntak ni-omsap sik hi heituk a kamadu jo mo. Kei nangni sik a kamalung inrim hêra kae!

²¹Dân thōia aka-om hnōmseng nangni ṭong der chei rong: nangni’n Dân tahri kha theimak chei mo?

²²Hing’hin inhri, ti chu Abraham in sapase 2 anei hei, sōknu leh inkhat, khana anuhmei taknu leh inkhat.

²³Asōknua inphut anei sapa khachu chônngaia le’nte, tâk masōa aka-om anuhmei tamatet asapa khachu Pathen intepna dungjuia a’nte kae.

²⁴Hivahei hi man enna inkhat kapōa nilothei: nuhmei 2 hei kha intepna 2 hei kae. Asōk nai kaneinu kha Hagar hi kae, ama’n Sinai Tlânga ale’nsyem intepna kahlang athleng.

²⁵Arabia ka-om, Sinai Tlâng kahlanga akangir Hagar hi, tuna Jerusalem khōpuia aka-om mi rakip leh inṭhōia, sōk anleichangna tekâk inkhat kae.

²⁶Tâk-kha marvân Jerusalem khachu masōa ka-om, khana ama kha ninu kae.

²⁷Ajârchu ṭong intheng in ahri: “Sa kanei hêrmak nuhmei kha, amahâm kaṭha! Naiha kaphu kade mak nu, inpâk a ông ruh, peng ruh! Ajârchu apuise’n adahlon hêrmak nu kanek a dahlon nu khan sa katam anei jôk sik kae inti.”

²⁸Tûn, kasōpuihei, nangni Isaac kapōa, aṭongtep dungjuia, Pathen sahei kachang jo chei.

²⁹Khava phalai taksa ngaia ale’nte sapa khan Pathen Rathla vânga ale’nte inkhat kha asuk manrim; khana tûn hi leh in-anghrep a kae.

³⁰Achang ravâng ṭong intheng in heimo ahri? Hing’hin ahri, “Sōknu leh asapa kha tirsōt hei roh; ajârchu masōa aka-omnu sapa leh inṭhōia sōknu sapa’n pa karōi kha chenthei mak ning.”

³¹Khava jâra kasōpuihei, eini chu sōk inkhatnu sahei changmak me, tâk masōa aka-omnu sa me kha kae.