Read Komrem GALATIANHEI 6 Bible Online

GALATIANHEI 6 - Komrem bible

GALATIANHEI 6

¹Kasōpuihei, mi inkhat in ṭhatmak atlo nanhmusōt jo’nchu, rathla mi kachang nangni’n ama kha malung kadâi nenga adik nôkna sik tlo ruh. Khana nangni’m mathlemna nantlâk makna sik, nanbinga in-en kaṭha ruh.

²Inkhat leh inkhat rônkahrik inbômtō ruh, khana hing’hin Christa dân kha nantajui sik kae.

³Heite kaemak pase a-emak leh nuhmei inkhat in ke’m inkhat eng kae tia amandon inchu, anbibinga a’nhōn inthla hei kae.

⁴Nanbing omchen et nanta-ensui sik kae. Hivahi aṭhat inchu, tu mo inkhat taleitlo kha leh telo jena, nangni khet in nanta leitlo chunga inlensaktor sik chei.

⁵Ajârchu mi rakip in rôn sik a phur ninei et.

⁶Christian ṭong antamanthei hei khan akaṭha antanei rakip kha an-ojahei leh antachensōm sik kae.

⁷Nangni nanbinga inhōn inthla mak ruh; Pathen kha tûte tahōnthei changmak. Mi inkhat in hmuchi avortak kha akhôm sik kae.

⁸Antaksa tamaduna hleia khan hmuchi anvor inchu, khana inphut a anmani’n thina kara antalōk sik kae; khana rathla hleia khan anvor inchu kumleikōa hringna antalōk sik kae.

⁹Khava jâra ṭōn kaṭha tlona châmmak rih; ajârchu eini’n ṭōn kaṭha kha bânglo jena nitloṭhak inchu, akara lōk pha kha alajōng katlung nger sik kae.

¹⁰Khava jâra pha nineilai hin, injônjet a mi rakip hneng akaṭha kha tlo rih, adek a taksenna shunga, ni-innshung mihei hneng tlodet rih.

¹¹Tûnchu enruh hiva chithi hi ke’n kakutkhet vâng heituk inhrea kaheimazet chei mo!

¹²Rumhrat a nangni vun mantan sik anikati hei kha vângpông ṭōnna inlensak indu inkhat hei kae. Christa thingrake jâra, anmani suk manrim anchang makna sik rōk a, hivahi antatlo kae.

¹³Anmani vun katan he’n hmen dân chu juilo heia; hiva taksa pônga anṭōntlo vâng khan inlensak theina sik a nangni vun antamantan hnōm chei kae.

¹⁴Kei sik a chu, ni-Rōngpu Jesu Christa thingrake jâr rōk a inlensak sik eng; ajârchu ama thingrake jâra, vânhnōi hi kei sik a chu kathi jo, khana kei vânhnōi raleia kathi jo eng.

¹⁵Mi inkhat in avun atan inum a-emak leh atanmak inum heite khôk hêrmak; akakhôk pen khachu insyemther inkhat chang sik kha kae.

¹⁶Ajârchu hiva chôndân kajuia anhringkhō kahmang hei kha, Pathen mihei seng kha leh inṭhōia, lung mōngna leh maritna’n ompui hei rasoh!

¹⁷Achaina: kahnenga malung inrimna kha tûte’n apek nôk mak jo rasoh, ajârchu kataksa chunga natbi karôn hin, kei Jesu sōk eng kae ti hi amalâr.

¹⁸Kasōpuihei ni-Rōngpu Jesu Christa lungset maritna khan nankhenga ompui chei rasoh. Amen.