Read Komrem EPHESIANHEI 1 Bible Online

EPHESIANHEI 1 - Komrem bible

EPHESIANHEI 1

¹Pathen lungdo dungjuia Jesu Christa sonle inkhat Paul a inphut, Ephesus a ka-om anhringkhōa Jesu Christa leh inchunna shunga taksenthei kachang hei, Pathen mihei hnenga kaheimazet kae:

²Ni-Pa Pathen leh Rōngpu Jesu Christa khan maritna leh lung mōngna pek chei rasoh.

³Ni-Rōngpu Jesu Christa Pa leh Pathen kha eini’n manpâk rih! Ajârchu Christa leh ni’nchunna shunga hin, Pathen in marvân ram a rathla vângṭhat rakip kha apek mea mahâm kaṭha amanchang me.

⁴Eini ahmai kunga ṭhenakase a’ntheng nichangna sik, vânhnōi ralei ansyem mak hma inphut Pathen in atâ kachang sik a, Christa leh inchunna shunga aleikadei jo me kae. Ama lungset jâra

⁵Pathen in eini hi Jesu Christa a asapa leh asanuhei amanchang sik me hi aleimandonsa kae, hivahi amalung hōina leh mantlukna kha kae.

⁶Pathen in kalûra amarit me jâra Asapa marittak a inphut kutchoi apek jo me jâra Pathen kha manpâk rih!

⁷Heijâra mo niti’nchu Christa thisen vânga niset arangei mandam jo, khana ning leh hnōma amasō jo me. Khangtuk hrep a apek me Pathen maritna kha heituk a akalen jo mo,

⁸khangtuk kalena nihnenga apek me kha! Asingna leh ashung hmusōtna rakip vâng khan

⁹Pathen in alungtup kha atlosōt, khana a’nthup mantlukna kha, Christa vânga pui mathluk sik a aleimandonsa kha eini amanhmu jo me.

¹⁰Apha atluk pha, Pathen ṭōnmantluk achaina sik khachu, marvân leh raleia kutsyem rakip akhôm mantûp sōa Christa khan anlu akachang sik kha kae.

¹¹Ajârchu Pathen in amandon leh aṭōn mantluk dungjuia heirakip hi atlo kae; akungbia inphut Pathen in aleimandonsa chunga khan, amantlukna dungjuia Christa leh inchunna shunga ami kachang sik a aleikadei jo me kae.

¹²Kha achang inchu, hma inkeia, Christa inhōrna kanei sik eini’n Pathen lûrna kha choi ka-ân rih!

¹³Khana nangni’m akadik, Ṭong kaṭha hukmanhring anikapek kha nanthei pha khan Pathen mi kachang jo chei. Nangni’n Christa nantaksena Pathen in aleitepsa Rathla Intheng apek chei vâng khan atâ nanchangna mêrchîkna kha nanchunga akatatkhum jo chei kae.

¹⁴Pathen in amihei hneng ale’ntepna eini tachen sik manchênna kha Rathla hi kae, khana amihei hneng pui katluk ning leh hnōm apek sik me manchênna kha hi kae. Ama lûrna kha choi ka-ân rih!

¹⁵Hiva jâra hin, nangni’n Rōngpu Jesu nanta taksenna leh Pathen mihei seng sik a nanlung setna ṭong kha katheibia inphut,

¹⁶nangni jâra ke’n Pathen manpâkna bângmak eng. Ke’n kaderna rakip a nangni kamandonsōt ṭhak chei

¹⁷ke’n ni-Rōngpu Jesu Christa Pathen, akalûrpen Pa hnenga, Rathla kha apekna sik chei, ama nanmanhretna sik a, nangni singna apekna sik chei kader. Khana Pathen in amalârpek sik chei.

¹⁸Amihei hneng heituk inlak mahâmṭhatna aleitep hei kha akachen sik a, abekna chei chunga nan-inhōrna kha nanmanhret theina sik, ama vâr kha nanhmuna sik, nanmalung kot a’nhlangna sik,

¹⁹khan chu eini akataksenhei chunga ṭōnkatlo aratha kha heituk kalen mo ti kha nanmanhretna sik, ke’n kader a kae. Hiva nishunga ṭōnkatlo aratha hratna hi

²⁰ama’n thina inphut Christa amathōisōtna leh marvân ram a achangting amanongna sik aleihmang rathahrat inhnak kha leh thakhat kae.

²¹Khana khan, Christa’n marvân chunga vaikarônhei, ṭong kaneihei, ratha kaneihei leh Rōngpuhei seng chunga vai arôna ka-om jo; tûnlaia leh hnunga akahong sik raleichunga rahming inphō ratha kanei rakip chunga achung katōngpen kha kachang joa kae.

²²Pathen in heirakip kha Christa kethōia ada a khana heirakip chunga ratha kaneipen Rōngpu inkhat a bekrup hneng apek sōt joa kae.

²³Bekrup hi Christa taksa kae, hmun rakip a heirakip pui intluk ama khet kha apuitlukna kha kae.