Read Komrem EPHESIANHEI 2 Bible Online

EPHESIANHEI 2 - Komrem bible

EPHESIANHEI 2

¹Anphutbia khan nangni setna leh ṭong juimak jâra rathlating akathi leikachang cheia kae.

²Vânhnōi ṭhatmakna hlam kha nanleijui; nangni’n khava lai khan tuna Pathen ṭong kajuimak mihei kathlimpa, bōirōk a ratha kanei, rathla vaikarônpa nanleijuia kae.

³Kadik khet a eini nikhenga vânhnōi mihei kapōa nimalung leh nitaksa tamaduhrep kha nitloa kahring me. Ni-om ngaia chu, mi rakip in-ang me, eini Pathen hnuknat akade sik kha leikachang me.

⁴Tâk-kha Pathen maritna me leh alungsetna me hingtuk hrep kalen,

⁵ti chu eini Pathen ṭong juimakna shunga nileithi laitak khan Christa leh akahringsap a ada jo me. Hivahi Pathen maritna khan ahuk manhring jo chei kae.

⁶Khana Christa leh inchunna shunga khan marvân ram a ama leh vairônsapna sik a amathōisap jo me kae.

⁷Ama’n hi atlo hichu Jesu Christa a nihnenga amalârsōt ama maritna akalen inhlei kha, pha rakip a manhmuna sik a atlo kae.

⁸Ajârchu hivahi taksen jâra Pathen maritna khan ahuk manhring jo chei kae. Hivahi nanṭōn tlo jâra changmak, tâk Pathen kutchoi pek kae, hiva chunga tûte’n a’nlensak makna sik a kae.

¹⁰Nikahring hi Pathen tasyem me kae, Jesu Christa leh inchunna shunga nihringkhōa tlosōt sik aman tlukdek jo ṭōn kaṭha katlo sik a asyem me kae.

¹¹Nangni nan-intet a inphut Jât-hlop chei, vun katan ung kati loi Jehudi he’nchu “vun katanmak hei” anta leiti nangni, heimo aleikachang chei (mihe’n antaksa chunga chîkna antatlo) mandon ruh.

¹²Khava lai khan nangni Christa leh inkârtak a leika-om chei. Pathen kadeisōt mipui leichang mak chei, ram hlop mi leikachang chei. Pathen in amihei chunga aṭong tepna shunga, nangni’n chen heite leinei mak chei, khana nangni chu hiva raleichunga Pathen neiloa leh inhōrna kasea aleika-om chei kae.

¹³Tâk-kha tûnchu, nangni kahlatak a aleika-om chei kha Jesu Christa thisen khan, Christa leh inchunna shunga aheiṭhōi manhnai jo chei.

¹⁴Ajârchu Christa khan inchamna kha ahei choi pek mea Jehudi leh Jât-hlop mi pumkhat a asyem jo me. Ti chu anmani inṭhenna leh in-enkadana bang inkhâr kha ataksakhet in anvōkkhōi joa kae.

¹⁵Ama leh inchunna shunga jât 2 hei kha mipuither inkhat syemsōtna sik a, hing’hin intōk inchamna asyema, ama’n Jehudihei Dân leh ṭongpek khana sedânhei kha asuk manhmang jo.

¹⁶Thingrake chunga Christa athi khan in-enkadana kha asuk manhmang jo; thingrake vâng khan jât 2 kha taksa pumkhat a amanchun jo hei khana Pathen hneng aheiṭhōi male jo heia kae.

¹⁷Khava jâra nangni, Pathena inphut kahlatak a ka-om nangni, Jât-hlop chei leh ahnenga inhnaia aka-om, Jehudihei hneng, Christa kha kajōnga inchamna ṭong kaṭha kha ankhenga hneng ajōng hria kae.

¹⁸Christa jâra Jehudi leh Jât-hlop, nikhenga Rathla inkhat rōk a Pa ângshunga kahong tor jo me.

¹⁹Khava jâra, Jât-hlop nangni tûnchu ram hlop mi changmak jo chei; Pathen innshunga mihei leh Pathen ram a mi akachangsap jo chei kae.

²⁰Sânkathemhei leh sonle he’n innhmun anta leideng chunga nangni’m a’nsak inn chei kha kae, khava inn karônpen arakir hlung kha Christa Jesu kae.

²¹Rōngpu hneng a’ntōksōt a’ntheng bek-inn inkhangsōt khana a’ntu inchun akapu kha ama kae.

²²Pathen in Rathla a a-omna hmun inkhat a ahlop-hei leh nankhenga, ama leh inchunna shunga nangni’m a’nsak jo inn chei kha kae.