Read Komrem EPHESIANHEI 4 Bible Online

EPHESIANHEI 4 - Komrem bible

EPHESIANHEI 4

¹Khava jâra, Rōngpu razenna jâra khum mi kachang ke’n nangni kangek chei: Pathen in abeklai chei ama’n amanṭhat omdânna hring ruh.

²Nangni ahei tik a nun-innem, nunkahōi, akadehrat chang ruh. Inkhat leh inkhat inbômtō una inlungsetna kha malâr ruh.

³Nangni akakhit inchun lung mōngna vâng Pathen tapek chei pumkhat kha kaṭhadek a inda kaṭha ruh.

⁴Pathen bekna cheia khan inhōrna inkhat a-om kapōa taksa inkhat, Rathla inkhat ka-om,

⁵Rōngpu inkhat, taksen inkhat, tui hlutna inkhat ka-om;

⁶mi rakip Rōngpu, mi rakip ṭōn intlo, khana mi rakip shunga aka-om Pathen inkhat leh mi rakip Pa kha ka-om.

⁷Christa khan atena hrep a apek me dungjuia ahlop et kutchoi inkha-khat kha nirahlâng et a kae.

⁸Ṭong intheng in ahri kapōa: “Ama chung inshângtak a aketou pha khan, rehringa surmi hingja aṭhōitou hei; ama’n mihei kha kutchoi apek hei.”

⁹Tûn, “ama kaketou” inti hi heitina mo? Hiva tina hichu ahma inkeitak a ralei thōi intongpen hmun a ama jōng kaṭum tina kae.

¹⁰Khava jâra akaṭumsuk pa kha chungting akaketoupa khet kha kae, marvânhei chung leh ankakhea vânhnōi pumpui ama’n asipsōna sik a kae.

¹¹Ama kha “kutchoi kapek,” kha kae, mi ṭhahrep khat sonlea akadei, alak in sânkathem, ṭhen khat in evangelist, ṭhen khat in Pastor khana ṭhen khat oja amanṭang hei.

¹²Christa taksapum syemsōtna sik, Christian ṭōn tlona sik hi Pathen in mi rakip mantlukna anei kae.

¹³Khava jâra Pathen Sapa kha nimanhretna leh nitaksenna chunga pumkhat a hong inchun sik jo me; khan chu pui katluk Christa dung leh vai kaphâk tor pui katluk mihei kha kachang sik me.

¹⁴Khan chu lungthim kaṭhamak-hei mantheina thli tasêm lelena taṭhōi naipang kha changmak jo me, anmani mihōnna khan mihei ṭhenating anṭhōi heia kae.

¹⁵Khava kanek a, Rathla a inlungsetna shunga, ṭong kadik kha hria nilu kachang Christa a ahlam rakip a kakhang nger sik me.

¹⁶Ama ensuina thōia taksa bâk-hei injomna rakip in tlohlam kasōk dungjuia ansur manhnet hei. Khava jâra taksa bâk rakip in anbing et ṭōn kha antlo pha, taksa kalōng pumpui kha inlungsetna vâng akakhang kae.

¹⁷Khava jâra ke’n, Rōngpu rahminga karakôk chei kae: akahnem mak indon Jât-hlop hei kapōa, hringṭhak mak jo ruh,

¹⁸khan chu malung kajîng hei kapōa om mak jo ruh. An-êng setna leh heite anmanhret makna kha pui atluk jâra, Pathen tapek hringna shunga anmani’n chen neimak heia kae.

¹⁹Anmani’n inzakna heite neimak jo hei; setna katlo sik a anbing et a inpesōt heia inkhâmlo hêra heirakip antloa kae.

²⁰Khavakha Christa chunga nanta’nthem chuk kha changmak!

²¹Nangni’n ama chungchâng ṭong chu nantathei khet jo kha kae, khana ama kahnung kajui nanchang dungjuia Jesua akadik kha anmanthei jo chei.

²²Khava jâra nan-om ngaia ani inhring nunchen marō kha dahlon jo ruh, ama mihōnna, madu rangei na’n asuk manhmang jo nunchen marō kha.

²³Nanmalung leh nanmandonna pui katluk a manther sik kae,

²⁴Pathen kapōhrep a ansyem khana akadik leh a’ntheng hringkhō kadik a abinga a’nlâr, nunchen ther kha nanta’nvon sik kae.

²⁵Maleisei tlohêr mak jo ruh! Nangni khat leh khat hneng akadik nanta hri nger sik kae, ajârchu eini nikhenga Christa taksa bâk et me kae.

²⁶Nanhnuk anat inchu, nanhnuknat khan setna ting ṭhōi mak chei rasoh, khana hnuknat pum a kani mathlak mak ruh.

²⁷Seitan kha pha kaṭha pek mak ruh.

²⁸Malung inthenga anbinga hringtheina anhmuna sik leh sara khōdeng katheihei an-inthōpui torna sik a, inru katlo ṭhak mi kha, inru akabâng sik kae khana ṭōn atlo sik kae.

²⁹Nanbeia ṭongse hmangmak ruh, nanṭong hri katheihei sik akaṭha achangna sik a insyemsōtna leh pekna langa inthōpuina ṭong rōk kha hmang ruh.

³⁰Pathen Rathla intheng kha manrim mak ruh; ajârchu Rathla kha nangni Pathen ta nanchangna mêrchîkna kha kae, Pathen in ning leh hnōma amasōna sik chei kani ajōng tlung sik manchênna kha kae.

³¹In-enkadana, maduna, hnuk natna rakip dahlon ruh. Ôngsan leh rasei, in-enkadana heikhat om hêrmak rasoh.

³²Khava nek a, Pathen in Christa a arangei mandam jo chei kapōa, khat leh khat malung innema lum inlo una inngei indam ruh.