Read Komrem EPHESIANHEI 5 Bible Online

EPHESIANHEI 5 - Komrem bible

EPHESIANHEI 5

¹Nangni Pathen sa marit chei nanchang jâra, ama kapō nanchangna sik tak intlo ruh.

²Christa khan eini alungset mea, Pathen malung tlaina marim katui tōkna leh inthoina inkhat kachanga ama abinga eini sik jâra anpek sōt kapōa nangni um lungset in ching chei rasoh.

³Nangni Pathen mi nanchang dungjuia nankâra jôngna, intheng makna, phamhrai set inti ṭong hrisōt sik hi akadik changmak.

⁴Achangmak leh khōza inhret mak, bekṭong kajuimak, omchen kase ṭonghei hi nantahmang sik a rahōi changmak. Khava kanek a Pathen nantachoi ka-ân jôk sik kae.

⁵Nangni’n hivahi nanmanhret thei sik, mikajông khōza inhret mak, phamhrai kase (ajârchu phamhrai setna hi limsyem kamuk inkhat kae) hei hin Pathen leh Christa Rengram kha chen nei hêrmak hei ning.

⁶Ṭong kadikmak vâng tûte’n hōnmathlak mak chei rasoh; ajârchu Pathen ṭong kajuimak hei chunga ahnuk natna ajōng katlung sik kha khava jâr pena kae.

⁷Khava jâra khang khava mihei kha leh heite tlosap mak ruh.

⁸Nangni inthim thōia khanga ale’nhmang chei kae, tâk tûnchu nangni Pathen mi nanchang jo jâra, khōvâra ka-om jo chei. Khava jâra vârta akachang hei kapōa aka-om sik chei kae,

⁹ajârchu ṭhatna, dikna leh ṭong kadik inti rakip kara katamtak lōkna akanei khachu, vâr hi kae.

¹⁰Rōngpu malung tlaina kha inchûna sik tak intlo ruh.

¹¹Khō inthim ta kachang, hnemna kase mihei ṭōntlohei kha leh heite sap changmak ruh. Khava kanek a chu khōvâra malârsō pet hei ruh. (

¹²Marûk a anṭōn tlohei kha hri sik bek um kadiktak a inzakpui ka-omhêr heia kae.)

¹³Khana anṭōntlo rakip kha khōvâra a’nrôn sōt pha an-omchen khet kha inchêna inlâra kae;

¹⁴ajârchu heirakip inchêntak a a’nlârna kha vâr kha kae. Khava jâra hing’hin inhri: “Akaje nang, ṭhang jo roh, thina inphut ṭhōisōt roh, khana Christa khan nang chunga hong kavâr sik.”

¹⁵Khava jâra heikhong mo aka-omchen chei insing thei ruh. Mikamo kapō changloa, mikasing omchen a hring ruh.

¹⁶Tûnlai kanikhō hei aṭhatmak jâra, pha kaṭha nantachen rakip kha hmang kaṭha ruh.

¹⁷Khava jâra momak ruh, tâk Rōngpu’n heimo amantlo hnōm chei kha jongsōt una tlo ruh.

¹⁸Ju inruimak ruh, khava khan nang rōk amanhmang sik che; khava kanek a Rathla kasip a om ruh.

¹⁹Kamukna hla, manpâkna hla, khana hla intheng ṭong vânga khat leh khat inbek ruh; nanmalung shunga manpâkna hla leh inṭhōia Rōngpu hneng choi ka-ânna hla leh kamukna hla sak ruh.

²⁰Pa Pathen kha ni-Rōngpu Jesu Christa rahminga, heirakip sik jâra ahei tik a manpâk ṭhak ruh.

²¹Christa kajana jâra nangni inkhat leh inkhat ṭong injui ruh.

²²Nupuihei, Rōngpu thōia kapōa, nanpuise hei ṭong thōia hlut ruh.

²³Ajârchu Christa khan bekrup chunga ṭong anei kapōa apuise khan anuhmei chunga ṭong aneia kae; khana ataksa kachang bekrup kahuk inhring kha, Christa ama khet kha kae.

²⁴Khava jâra bekrup in Christa thōia pui katluk a ahlut kapōa nupuihei kha anpuisehei ṭong thōia pui katluk a akahlut sik hei kae.

²⁵Puisehei, Christa khan bekrup kha alungset jâra ahringna ama sik a apek sōt kapōa, nannuhmeihei lungset hei ruh.

²⁶Ama’n bekrup kha tui vâng arasi manthengsō pha Pathen hneng apek sōt theina sik a hivahi atlo kae,

²⁷ahmai kunga bekrup kha ahme ṭhatna rakip leh, a’nthengseng, innimna kase, intônna bi kase leh a’nvōi mak, pui katlukmak ti omlo kha tōksōt theina sik ama’n atloa kae.

²⁸Pase he’n antaksa binga ani’nlungset kapōtak a annuhmeihei lungset hei rasoh. Tu achang inum anuhmei inlungset mi khan ama abinga a’nlungset kae.

²⁹(Tûte’num ama taksa binga ka-en kada om mak. Khava kanek a chu, Christa bekrup chunga atlo kapōa, ama’n lungsetna aneia a-ensuia aveia kae;

³⁰ajârchu eini ama taksa bâk me kae.)

³¹Ṭong intheng in, “Hiva sik jâra pase inkhat in anu leh apa adahlona anuhmei a’nchunpui sik kae, khana 2 hei kha taksa inkhat rōk akachang sik jo hei kae,” ati.

³²Hiva Ṭong intheng shunga hin ṭong kadik ari in-ip kalentak inkhat inlâr, hivahi Christa leh bekrup ahrina kae ti ke’n kamanhret.

³³Achang ravâng nangni chungchâng ṭong um ahrina kae: puise rakip in ama bing a’nlungset kapōa anuhmei alungset nger sik kae, khana nupui rakip in anpuise antakaja nger sik kae.