Read Komrem PHILIPPIANHEI 4 Bible Online

PHILIPPIANHEI 4 - Komrem bible

PHILIPPIANHEI 4

¹Khava jâra, kasōpuihei, heituk a kamarit chei mo, heituk a karangei chei mo! Heituk a kaning nantamanṭhat mo, khana heituk a nangni jâra a’ntei eng mo! Khava jâra, nanhringkhō Rōngpu hneng khanga kahnet a akangir sik chei kae.

²Lungsettak a Euodia leh Syntyche, nangni Rōngpua sōpui inkhat a inhnōmtō ruh tia kahei ngek chei kae

³Khana taksenthei kaṭōn tlopui hei, nangni um hiva nuhmeihei hi nanta’nthōpui sik heia kamadu chei; ajârchu anmani hin, akahring Pathen lekharabu a’nzet jo Clement leh kaṭōn tlopui heirakip leh, Pathen ṭong intheng semsōtna khan kei leh kahrat a ṭōn kanta leitlosap kae.

⁴Rōngpu leh nan-inchunna shunga khan ahei tik a a’npâkṭhak chei chang rasoh. Avea kahri nôk, inpâk ruh.

⁵Mi rakip hneng nunkahōi malâr ruh. Rōngpu kha inranga kajōng sik jo.

⁶Heite inkhat chunga malung inrimna neimak ruh, tâk nanderna rakip a manpâkna malung leh inṭhōia nanta madu rangei kha derṭhak ruh.

⁷Mihring tamandon phâk tor mak, Pathen lung mōngna khan Jesu Christa leh inchunna shunga nanmalung leh nanmandonna kha amanmōng pek sik chei.

⁸Achaina, kasōpuihei, manpâk thei kachang ṭōn kaṭha hei: akadik seng, malung kalen, omchen kadik, malung intheng, madu ka-om khana kajathei kachang hei seng hi nanmalunga kasip a om rasoh.

⁹Kaṭong hri leh kaṭōntlo keia inphut nantahmu leh nantathei hei kha ṭōn tlona hmang hei ruh. Khana mōngna anikapek Pathen in a-ompui sik chei.

¹⁰Pha kasôttak sōa, nangni’n kei nanlum lona eng malârthei nôkna pha kaṭha nannei jâra, hivahi kahringkhō shunga Rōngpu leh inchunna shunga ka’npâkna kalentak inkhat kae! Nangni’n kei lum alo mak jo chei katina changmak, khava malârna sik pha kaṭha nanleinei mak jâra kae.

¹¹Khana nangni’n adonmak chei ti jâra hivahi kahri changmak, ajârchu kanei kakhamhrep vâng khan katlaithei jo enga kae.

¹²Ke’n heimo madu rangei sik kha kamanhret, heimo inhleia nei sik kha’m kamanhret, ke’n hiva a’nthup hi’m kamanhret jo, ti chu, hmuntina, phatina, kakhop inum, kaṭâm inum, akatamtak kanei inum, akatlômtek kanei inum, kei katlaitor jo eng.

¹³Christa tapek eng rathahrat vâng khan heirakip intōpui torna ratha kanei.

¹⁴Tâk-kha kakhōdeng theina nanta’nthōpui eng hi nangni ṭhatnatak kha kae.

¹⁵Hma inkeia Ṭong kaṭha kavahrile lai Macedonia kadahlon pha nangni Philippia bekrup rōk in nantalei inthōpui eng kha nanmanhret; ka’nhmangna achanga, kahnemna achanga nangni rōk in chen nanneipui eng.

¹⁶Thessalonica khōa inthōpuina karangeilai khan vōi khat kakhea nanheitir pek enga kae.

¹⁷Khavakha ke’n kutchoi chenhnōm jâr rōk a changmak, nangnihei nei tintana chunga hnemna akapungsa chet kha hmuhnōm jâr jôk a kae.

¹⁸Khava jâra, hivahin nankutchoi pek eng rahlângna lekha kha ka-om, ahmangna sik kakhea katam jo! Tûn Epaphroditus in nankutchoi rakip ahei rôn pek enga madu rangei rakip kachen jo! Hihei hi Pathen hnenga a’ntōksōt arahlângthei inthoina marim katui kapō hei kha kae.

¹⁹Pathen in Jesu Christa a anei ahao katamtak a inphut nangni sik akatluk hrep nanta rangei seng apek sik chei.

²⁰Ni-Pa Pathen kha ahei tik a lûrṭhak rasoh! Amen.

²¹Christa Jesu ta kachang Pathen mi seng chibei kahei tlochei. Hina ka-ompui sap sōpui seng in chibei anheitlo chei.

²²Hina Pathen mihei seng, apuipena Caesar innpui shunga ka-om he’n chibei anheitlo chei.

²³Rōngpu Jesu Christa maritna khan nankhenga inthōpui chei rasoh.