Read Komrem COLOSSIANHEI 2 Bible Online

COLOSSIANHEI 2 - Komrem bible

COLOSSIANHEI 2

¹Nangni sik a leh Laodicea mihei sik a khana kei khet ani inhret mak hei seng sik a, heituk-hrep a ṭōn inhnaktak a katlo mo ti hi heimanthei chei rong.

²Anmani lungngamna vâng ansipna sik leh lungsetna shunga an-inchunna sik hivahi ke’n katlo kae, khava jâra akadik manhretna tahei rôn sōt manchênna langa pui katluk haona kha nei ruh. Hing’hin Pathen ta-ip Christa khet kha amanhret sik jo.

³Pathen singna leh manhret theina a’nthup karōi manbukna kot mahlangna chabi kha ama kae.

⁴Khava jâra ke’n kamanthei chei kae, anmani heituk akaṭha anpōa achang inum, maleiseia makhena vâng tûte’n hōn mathla mak chei rasoh.

⁵Ajârchu kei kataksa a ka-om mak inum, rathla a ka-ompui chei, khana Christa a nantaksenna kahnettak a nanngir kha kahmua inpâk eng.

⁶Nangni’n Jesu Christa kha Rōngpua nantahnōm jo achang jâra, ama leh inchun a hring ruh.

⁷Nangni mantheisa nanchang jo kapōa, ama a inthûktak a nanrajung ṭhō ruh, achunga nanhringkhō syem ruh, nantaksenna manngar chet ruh. Khana manpâkna pekna khan siptak ruh.

⁸Khana hivahi en kaṭha ruh, Christa a changloa vânhnōi vaikarôn rathla inphut, mihringhei mantheina inphut, hnemna kase mihōnna singna inphut nangni tûte’n sōk manchang mak chei rasoh.

⁹Ajârchu ama mihring achangna shunga, Christa khan rathla achangna pui katluktak kha ka-oma kae,

¹⁰khana ama leh inchunna shunga pui katluk hringkhō kha apek jo chei. Ama chu rathla vaikarôn rakip leh ratha kanei rakip achungpen kha kae.

¹¹Nangni Christa leh inchunna shunga vun katanchei kae, mihring tasyem vuntanna kha changmak; tâk hiva binga setna ratha neina inphut ning leh hnōma masōna Christa tasyem vuntanna kha kae.

¹²Ajârchu nangni tui hlutna nanchen pha, Christa leh a’nvûmsap jo chei kae, khana tui hlutna khan nantaksen jâra ama thina inphut akakei inthōi Pathen ratha hratna khan nangni’m Christa leh akei mathōisap jo chei kae.

¹³Pha khat a rathlating chu nansetna jâra leikathi jo chei, ajârchu dân kase Jât-hlop leikachang chei. Tâk-kha tûnchu Pathen in Christa leh inṭhōia hringna shunga aheiṭhōi jo chei! Pathen in nisetna rakip arangei mandam jo me;

¹⁴ama’n nibatna madu ka-om mak tintana rabu leh a’nkhit dânhei kha alosōt pek jo me, khana khavahei kha pui katluk a thingrake chunga thirkir vâng akir mankop sō jo kae.

¹⁵Khana khava thingrake chunga khan rathla vaikarôn leh ṭong kaneihei ratha neina inphut Christa kha abinga insō jo; ama’n aretorna shunga mipuihei kha rehringa sur hei kapōa hlam akei injôkpui heia mipui ta-en sik a atloa kae.

¹⁶Khava jâra heimo nantasâk leh nanta-in chungchânga, kani intheng leh Thlather Revei leh Châmhngat kani chungchânga tûte’n nanchunga dân syem mak rasoh.

¹⁷Khahei seng khachu hnunga sik a arahle hei kae; atak-khet khachu Christa kha kae.

¹⁸Marvân ngevahei kamukna sik leh insinsak hlemna sik ṭong kahri, khana hmangtalâr hlop mông kahmu chung katōngdet ung kati tu mo inkhat in antamaset sik chei kha hnōm mak ruh. Ajâr heite omloa, khang khavahei khachu anmihring mandonna dungjuia katluk a inlensak pet hei

¹⁹khana ataleimatu taksa lu kachang Christa kha anmasōa kae. Christa ensuina thōia chu taksa pumpui kha avei mankhanga khana ru leh châng hei leh rathahrui he’n asur mankop a Pathen tamaduhrep a amankhanga kae.

²⁰Nangni Christa leh kathisap jo chei, khana vânhnōi ralei vaikarôn rathla a inphut masō jo chei kae. Khan chu heisa mo hiva raleichung ta kapōa alakahring chei? Heisa mo khang khava dânhei kha nantalajui.

²¹“Hivahi sitmak roh,” “Khavakha mantem mak roh,” “Alak kha tônmak roh?” tina hei kapō.

²²Hihei hi vōi khat nihmang he’nchu hmangthei kaemak rōk hei kha kae; hihei hi mihring dân leh intheina rōk hei kae.

²³Adek a khava dânhei kha marvân ngevahei rumhrat a kamukna, insinsak inhlemna leh taksa inhnaktak a rachōnna heia inphut insing theina sik chunga a’nhnga hei anpō; tâk taksa tamadu rangei insur torna sik a hnemna khet chu neimak hei.