Read Komrem COLOSSIANHEI 4 Bible Online

COLOSSIANHEI 4 - Komrem bible

COLOSSIANHEI 4

¹Akapu kachang hei, nansōk-hei kha kaṭha leh kadik a hmang hei ruh. Ajârchu Nangni’num marvâna Rōngpu inkhat nantanei kha mandonsōt ruh.

²Derna pōn thō ruh, Pathen manpâk una nander pha leh insing thei ruh.

³Kha leh inṭhōia Christa chungchânga a’n-ip ṭong kha hritheina sik pha kaṭha Pathen in apekna sik ung keini sik aderpek ruh. Ajârchu khava sik a kei tûn kurkhum a aka-om eng kae.

⁴Khana ke’n kahri sik kasōk kha kahri manchên theina sik aderpek ruh.

⁵Pha kaṭha nantanei rakip kha hmang kaṭha una, akataksenmak hei hneng kasing tak a omchen tlo ruh.

⁶Nanṭongsō ahei tik a rangei akahōi sik khana rangei hnōm akakai sik kae, khana mi rakip kadik a masônje nantamanhret sik kae.

⁷Nisōpui marit Tychicus, Rōngpu ṭōna taksenthei kachang kanṭōn tlosappui, ama’n kachungchâng ṭong rakip ahri pek sik chei.

⁸Keini hei seng heikhonga aka-om ung mo nanthei pha nanmalung ahōina sik a, ama hi nahnenga kahei tir kae.

⁹Nanrup kâra inkhat, marit leh taksen ka-om Onesimus hi ama leh inṭhōia kahong hei. Hina omchen rakip anmani’n anmanthei sik chei.

¹⁰Kei leh inṭhōia khuma ka-om Aristarchus in chibei ahei pek chei, khana Barnabas tupa Mark inum chibei ahei pek cheia kae. (Mark kha nanhlam aheijōn inchu nanlei ratōna sik a mantheina nanleihmu joa kae).

¹¹Justus tia’m a’nhret Joshua inum chibei ahei pek chei. Anmani 3 rōk hei hi Pathen Rengram sik a kaṭōn tlopui taksenna kanei Jehudihei kae, khana kei inthōpui kalentak hongkachang jo hei.

¹²Nanloi kâra mi inkhat Jesu Christa sōk Epaphras in chibei ahei pek chei. Ama’n nangni Pathen lungdo katluktak a akajui, pui katluk leh akahnōm inchên jo Christian, akangir inhnet nanchangna sik a Pathen hneng angêk a, nangni sik a malung kahluttak a derna aneia kae.

¹³Ama’n nangni sik khana Laodicea leh Hierapolis a mihei sik inhnaktak a ṭōn atlo hi kei khet in sâkhi kapek tor a kae.

¹⁴Ni-doctor marit, Luke leh Demas in chibei anheipek chei.

¹⁵Laodicea ka-om sōpuihei hneng leh Nympha hneng khana amanu inna a’ntûp bekrup-hei hneng khan kanchibei leipek hei ruh.

¹⁶Hiva chithi hi nangni’n nanteisō leh Laodicea bekrup in antei ngerna sik manrôn hei ruh. Khava phatak a khan, Laodicea bekrup a sōpuihei tajōng manrôn chei chithi inkhat kha nangni’n nantatei nôk sik kae.

¹⁷Archippus hneng hripek ruh, “Rōngpu razenna ṭōn a’npek che kha achaina sik tlo-nger roh,” ati.

¹⁸Kakutkhet vâng, Paul a inphut chibei inti hi kaheimazet chei kae. Rakehruia ka’nkhit hi mahngi mak ruh! Pathen maritna’n ompui chei rasoh.