Read Komrem THESSALONIANHEI INKHATNA 3 Bible Online

THESSALONIANHEI INKHATNA 3 - Komrem bible

THESSALONIANHEI INKHATNA 3

¹Achaina keini desôttor mak jo ung. Khava jâra Athena kanbinga aka-om sik a kanmanṭhat jo.

²Khava pha Christa Ṭong kaṭha hrina Pathen ṭōn kantatlopui nisōpui Timothy kantahei tir jo kae. Nangni taksenna ting nanngarna sik a nan-inthōpui sik kantahei tir kae,

³hiva manrimna jâra tûte inkhat nankahnung nan-inle makna sik a kae. Hinghiva inrimna hi Pathen lungdo shunga ṭhen inkhat kae ti hi nanbinga nantamanhret kae.

⁴Ajârchu keini’n pha bongkhat kan-ompuilai chei khan, eini antamanrim sik me kae tia kanleihri pek dek jo cheia kae; kaṭha nenga nanta leimanhret kapōa khavatak kha ajōng katlung jo kae.

⁵Timothy kha kahei tir jo kae. Khava jâra akasôt hngâktor mak enga, nantaksenna manhret sōtna sik ama kahei tir kae. Seitan in amathlem mathlâk cheia kanṭōn leitlo rakip môk-hnâm amanchang sik khachu changthei mak ning!

⁶Tûnchu Timothy nanhnenga inphut he’nle jo, khana nantaksenna leh nanlung setna vâng nanlei ratōna ṭonghei kha kanhnenga ahei rôn joa kae. Nangni’n keini ahei tik a akaṭha hlam a nanlo ung khana keini’n nangni kantahmu hnōm chei kapōa nangni’num keini nanhmu hnōm ung tia ahri pek ung.

⁷Khava jâra sōpuihei, khōdeng kantheina leh inrimna rakip a nangni chunga, kanmalunga ratha hrokna kannei. Keini ratha hrokna anikapek kha nantaksenna kha kae,

⁸ajârchu Rōngpu leh inchunna shunga kahnet a nanngir inchu tûn keini kadik khet a akahring ung kae.

⁹Tûnchu keini’n nangni jâra ni-Pathen hneng inpâkna kanpektor jo. Nangni jâra Pathen hmaikunga hōina kannei jo jâra ama kanmanpâk.

¹⁰Keini’n nangni taksakhet a inhmupui cheia taksenna ting nanta madu leh nanta rangei kha kanpek theina sik chei sûn leh jân kanmalung pumpui vâng ahnenga kantader ṭhak kae.

¹¹Keini nanhnenga kanhongna sik ni-Pathen leh ni-Pa khana ni-Rōngpu Jesu khan hlam amantluk pek rasoh!

¹²Nangni inkhat leh inkhat chunga leh mi rakip chunga keini’n kanlungsetna chei alen kapōa manlen pek chei rasoh.

¹³Hing’hin nangni ratha amanngarpek sik chei, khana ni-Rōngpu Jesu kha amihei seng leh inṭhōia ajōng pha, ni-Pa Pathen hmaikunga nangni a’ntheng leh pui katluk kachang sik jo chei.