Read Komrem JOSHUA 1 Bible Online

JOSHUA 1 - Komrem bible

JOSHUA 1

¹RŌNGPU sōk Moses athisōa, Moses inthōpuipa, Nun sapa Joshua hneng RŌNGPU’n ṭong aleihri.

²Ama’n ati, “Kasōkpa Moses kathi jo. Nang leh Israel mipui rakip intluk jo ruh, khana ke’n kapek hei ram shunga Jordan Tuidung rakan jo ruh.

³Moses hneng kaleihri kapōa, nangni’n nantahro sik ram akhenga nang leh kami seng hneng kapek jo chei kae.

⁴Nanramri kha thlâng tinga nêrdiram leh sak tinga Lebanon Tlânghei akatlung sik kae; nisōtinga Euphrates Tuidung kalena inphut, Hit ram apetanna, taitlâk tinga Mediterranean Tuipui katlung sik kae.

⁵Joshua, nang nahring lai seng tûte inkhat in re tor mak hei tin. Moses ka-ompui kapōa nang ka-ompui sik che; nang ahei tik a dahlon hêrmak che ning.

⁶Inrin roh khana inngam roh, ajârchu nanpu sōnhei hnenga kalei intepna ram hi anchen pha leh nang in hiva mihei hlamkakei a’nṭang sik che kae.

⁷Inrin rōk kha inrin roh, inngam roh; kasōkpa Moses’n aleipek che Dân seng kha jui ngerna sik tlo roh. Khavakha ṭhen inkhatbek heisak lo tlomak roh khan chu nasena rakip a chung kasōk sik che.

⁸Nankamukna phatina Dânrabu teiṭhakna sik a intluk ruh. Sûn leh jân tei ruh, ashunga a’nzet rakip ajuina sik a tlo ruh. Kha achang inchu nangni kahao sik chei khana chung kasōk sik chei.

⁹Na-inrinna sik leh inngamna sik a kaṭong pek che kha mandonsōt roh! Ṭitmak roh khana malung mathla mak roh, ajârchu RŌNGPU na-Pathen ke’n nasena chen a ka’nṭhōipui sik che.”

¹⁰Khava sōa Joshua’n hlamkakeihei hneng

¹¹rephōra anvasena sik leh mipuihei hneng anvahrina sik a ṭong apek hei, “Sâk leh in ṭhahrep mantluk ruh, ajârchu RŌNGPU nan-Pathen in apek sik chei ram kahlō sik a ni 3 shunga Jordan Tuidung re akake sik chei kae.”

¹²Joshua’n Reuben, leh Gad leh Manasseh phung aṭimkhat hei hneng ahri,

¹³“Nangni omna sik a Jordan nisōtinga ram RŌNGPU nan-Pathen in apek sik chei kha RŌNGPU sōk Moses’n heikhonga mo ahri pek chei kha mandon ruh.

¹⁴Nannuhmei, nansa, nanranhei hinahin ka-om sik hei, tâk re hmangchâk a-invon nanremihei chu ansap changpui Israelhei inthōpui sik, anmani hmating re anrakan sik,

¹⁵RŌNGPU nan-Pathen in apek hei Jordan tlaitlâk tinga ram kha anhlō mak kârseng. Israel phung rakip ram kha kaṭha apek hei phatō leh khan RŌNGPU sōk Moses tapek chei hiva Jordan nisōa nanram hin hong inle sik cheia kha ka-om thei sik chei.”

¹⁶Anmani’n Joshua anmasôn, “Namanthei rakip kantlo sik khana natirna rakip a kase sik ung.

¹⁷Moses ṭong ahei tik a kantajui kapōa, nang kanjui sik che, khana RŌNGPU na-Pathen in Moses a-ompui kapōa nang ompui che rasoh!

¹⁸Nang ratha neina chunga akahnōm mak hei leh naṭongpek heikhat kajuimak hei that sik hei kae. Inrin roh khana inngam roh anti!”