Read Komrem JOSHUA 18 Bible Online

JOSHUA 18 - Komrem bible

JOSHUA 18

¹Ram mihei kha antorsō hei pha, Israel jât mi rakip Shiloa intûp heia RŌNGPU omna Pōn-inn anmatungsōt a kae.

²Khana khan Israel phung 7 hei ram chen inpekloa laka-om ṭhak hei.

³Achang jâra Joshua’n Israel mipuihei hneng ati, “RŌNGPU, nanpu sōnhei Pathen in apek jo chei ram kha akahlut cheia nanta lo sik kha heituk kasôt mo nanta lahngâk sik?

⁴Phung rakip a mi 3 et ahei pek ruh. Ke’n khahei kha ankarōi chenhnōm seng ramri ka-en inhret sik a, ramṭhen pumpuia katir sik hei. Khan anmani kahnenga hong inle sik hei.

⁵Ankâra ram kha ṭhen saria kasem pek sik hei; Judah’n thlanga aramṭhen shunga ka-om sik, Joseph in sak tinga aramṭhen shunga ka-om sik.

⁶Hiva ramṭhen 7 hei malârna kha lekha vânga mazet hei una kahnenga heichoi ruh. Khava sōa ke’n nangni sik a RŌNGPU ni-Pathen hneng ṭongderna, vâng-enna kanei sik:

⁷Kha’num, Levihei chu nangnihei kapōa ram chen neimak hei ning, anmani chen chu RŌNGPU thempu inṭanga razen sik kha kae. Khana Gad, Reuben leh Nisō Manasseh-hei chu RŌNGPU sōk Moses’n aleipek hei Jordan nisōting anram kha anchendek jo.”

⁸Joshua’n hiva mansena hi apek hei sōa mihei kha ramri ka-en sik a kase jo hei: “Ram pumpuia se una ramri vamanhret ruh, khana kahnenga hong inle ruh. Hiv Shiloa hin ke’n vâng-enna kaneia RŌNGPU hneng derna kanei sik.”

⁹Khava jâra, mihei kha ram pumpuia kase jo hei khana anramṭhen 7 kha anmazetsōt jo, khōpuihei agôra ansyem jo. Khava sōa Shilo rephōra Joshua hneng inle jo hei.

¹⁰Joshua’n anmani sik a RŌNGPU derna vâng-enna anei, khana a’nhlei Israelhei kha ramṭhen amanchên pek jo hei.

¹¹Benjamin phung innshunghei ramṭhen chen kha hmapena pekmanchen sik hei kae. Anmani ram kha Judah leh Joseph phunghei kâra ka-om.

¹²Sak a anramri kha Jordana inphut Jericho pang kaketoua tlaitlâk tinga tlângram apetana Bethaven nêrdiram katlung.

¹³Ramri kha A’nhnemdet Beth Horon thlanga tlâng chunga, Luz (Bethel um anti) thlang panga kase.

¹⁴Ramri kha ramkei inkhat ting kase jo, thlang ting ahnget a hiva tlâng tlaitlâk panga inphut Judah phung ram chen, Kiriath Baal (a emak leh Kiriath Jearim) shunga kase. Hivahi tlaitlâk tinga ramri kae.

¹⁵Thlâng tinga ramri kha Kiriath Jearim ahmora inphut tlaitlâk ting Nephtoa Tuiripût a kase.

¹⁶Khava sōa Hinnom Phaicham hmutheina jo khava tlânghnōi ting katumsuk a, Rephaim Phaicham sak hmora katla. Khava sōa thlâng ting, Jebush kare thlânga, Enrogelting, kasea Hinnom Phaicham apetan.

¹⁷Khava sōa Enshemesh sak ting inhea Adummim Rakanna leh inhnget a ka-om Geliloa kase. Ramri kha Bohan Hlunga (Bohan hi Reuben sapa kae) katumsuk a

¹⁸khava kareri kha Jordan phaicham hmutheina sak ting apetana kae. Khan chu phaichama kasesuk,

¹⁹Beth Hogla kareri sak ting apetan, khana Tuipui Kathi sak a tuikekōk a inhnga jo, khana khan Jordan tuidung kha akatla kae. Hivahin thlang tinga ramri kae.

²⁰Jordan kha nisō ramri kae. Hivahi Benjamin innshung he’n karōia antachen ramri kha kae.

²¹Benjamin phung innshunghei khōpui chen khachu Jericho, Beth Hogla, Emek Keziz,

²²Beth Arabah, Zemaraim, Bethel,

²³Avvim, Para, Ophrah,

²⁴Chepharammoni, Ophni, leh Geba: khōpui 12, ankimvea khō kalenhei leh.

²⁵Khana khan Gibeon, Rama, Beeroth,

²⁶Mizpah, Chephirah, Moza,

²⁷Rekem, Irpeel, Tarala,

²⁸Zela, Haeleph, Jebush (a-emak leh Jerusalem), Gibeah, khana Kiriath Jearim: khōpui 14, ankimvea ka-om khōpuihei inveisa hei. Hivahi Benjamin phung innshung he’n karōi sik a antachen ram kha kae.