Read Komrem JOSHUA 20 Bible Online

JOSHUA 20 - Komrem bible

JOSHUA 20

¹Khava sōa RŌNGPU’n Joshua amanthei,

²Israelhei hneng hinga hri sik a, “Moses’n nanhnenga ahri sik a ṭong kaleipek jo Inthupna Khōpui tihei kha kadei hei ruh.

³Manhret lo theiloa mi inkhat kathat jo kha khana khan kasethei sik khana achunga phuhlōna inphut katlânsōt thei sik.

⁴Hiva khōpui inkhat a amapa a-emak leh amanu katlân inhlut thei sik, ṭong tanna hmun khōpui sōngkot a vase sona, hlamkakeihei hneng omchen kasōk kha hrimantheng pet hei rasoh. Khava sōa anmani’n amanu a-emak leh amapa a-omna sik a hmun anpek sik hei. Khan ka-om thei sik hei.

⁵Phu kahlō hnōm inkhat in ahei jui he’nchu, khōpuia mihei khan ankut chunga antapek manhlut mak sik hei kae. Antahrung sik hei kae, ajârchu hnuknat a changloa manhret manloa aleithat kae.

⁶Anmani mipui ṭong tanna anchen mak kârseng khana khava laia Thempu Kalen kha athimak leh kârseng khōpuia khan ka-om thei sik hei. Khava sōa anlei tlânsōtna ankhō et a inlethei sik hei.”

⁷Khava jâra, Naphtali tlângram, Jordan tlaitlâk a Galilee shunga ka-om Kedesh; Ephraim ram a Shechem; Judah tlângram Hebron anṭhensōt jo hei.

⁸Jordan nisōa, Jericho nisōa nêrdiram chunga phaichama, Reuben ramṭhen shunga Bezer; Gilead shunga Ramoth; khana Manasseh ramṭhen shunga Bashan shunga Golan anleikadei jo.

⁹Hihei hi Israel mipui rakip sik a leh anram shunga aka-om ram hlop mihei sik a Inthupna Khōpui kadeisōt hei kha kae. Manhret manloa mikathat chunga phuhlō sik a a’ntluk heia inphut khana khan inhrungna anhmuthei sik; mipui ṭong tanna chenloa tûte inkhat that thei changmak a kae.