Read Komrem JOSHUA 22 Bible Online

JOSHUA 22 - Komrem bible

JOSHUA 22

¹Khava sōa Reuben, Gad, leh Nisō Manasseh phung seng Joshua’n abek mantûp hei.

²Anhnenga ati, “RŌNGPU sōk Moses’n nanhnenga ṭong apek chei rakip nantlosōt jo, khana kaṭong pek rakip nanjui jo.

³Pha hiseng shunga nan-Israel changpui inkhatbek donloa damak chei. RŌNGPU nan-Pathen ṭongpek-hei juina sik inrin ṭhak chei.

⁴Tûnchu, ale’ntep kapōa, nan-Israel changpui hei chunga mōngna apek jo hei. Khava jâra, RŌNGPU sōk Moses tapek chei, Jordan nisōa, nankarōi ram hlō sik a nantamdu nan-inn langa inle jo ruh.

⁵Moses ṭong pek chei kha jui ngerna sik a intluk ruh: RŌNGPU nan-Pathen lungset ruh, alungdo tlo ruh, aṭongpek-hei jui ruh, ahnenga taksenthei chang ruh, khana nanmalung nanrathla akhenga razen ruh.”

⁶Vângṭhat apek heia khana hiva ṭonghei hi ahri pek heia an-inn langa atir jo hei: “Kahaotak a nan-inna inle jo ruh, ranhring katamtak leh, dangka, sana, sum-êng, thir leh pōn katamtak leh. Nan-inrepui heia inphut nanta’nlo hei kha nanphung changpui hei hneng sempek hei ruh.” Khava sōa an-inn lang ansor jo. Jordan nisōa ram kha Joshua’n Manasseh phung her khat hei hneng apek hei, tâk aherkhat hei hnenga chu, phung hlop hei leh Jordan tlaitlâk tinga ram apek hei.

⁹Khava jâra Reuben, Gad, leh Nisō Manasseh phung mihei kha an-inn langa inle jo hei. Israel alakseng hei kha Canaana Shiloa andahlon hei khana Moses a inphut RŌNGPU ṭongpek dungjuia, anta leihlō anram chen Gilead kajōna kasesōt jo hei.

¹⁰Reuben, Gad, leh Nisō langa Manasseh he’n Geliloth a anhongtlung pha, Jordan tlaitlâk panga anmani’n akalen enhnōm kakaitak maichâm inkhat tuidung panga anleisyem.

¹¹Israel alak-hei hneng mihe’n hinga anleimanthei hei, “Rangei ruh! Reuben, Gad leh Nisō langa Manasseh he’n Geliloth a maichâm inkhat ansyem jo, eini langa Jordan panga!”

¹²Israel he’n kha anthei pha, jât mi rakip nisōtinga phunghei chunga re katlo sik a Shiloa kahong hei.

¹³Israel he’n Eleazar thempu sapa, Phinehas kha Reuben, Gad khana Nisō langa Manasseh-hei hneng Gilead a anheitir hei.

¹⁴Phinehas leh tlaitlâk a phung inkhat a mi inkhat et, phungṭhen hei innshunga upa et, hlamkakei sôm leh he’nṭhōi hei.

¹⁵Gilead ram a Reuben, Gad khana Nisō langa Manasseh mihei hneng kahong hei,

¹⁶RŌNGPU a mipui ankhenga pumkhat anchangna anvahria, “Heisa mo hiva ṭhatmak hi Israelhei Pathen kadōia nantatlo? Hiva maichâm hi nansyemna hin RŌNGPU nantadōi kae! Ama juimak jo chei!

¹⁷Peor a niset tlo kha mandonsōt mak chei mo, RŌNGPU’n amihei chunga hrise vânga akarâk hei kha? Khava jâra eini tûn katlung khōdeng nilathei kae. Khavakha set akatluk set changmak mo?

¹⁸Tûn katlung ama jui sik lahnōm mak chei mo? Tuning nangni’n RŌNGPU nandōi inchu, jînga RŌNGPU’n Israel mi rakip chunga ahnuk kana sik jo.

¹⁹Tûna chu, nanram kha kamukna sik a rahōi asōk mak inchu, RŌNGPU Pōn-inn matungna, aram a hin hong jo ruh. Kankâra inphut ram ṭhahrep vakadei ruh. Tâk RŌNGPU kadōia dekna neimak ruh khana ni-RŌNGPU maichâm a-om reireia maichâm inkhat syem nôk a keini dōina kha tlomak ruh.

²⁰Zerah sapa Achan in neinâk suk manhmangna sik a ṭongpekna aleijui mak kha mandonsōt ruh; khava sik a Israel mipui rakip karâkna anchen a kae. Asetna jâra Achan rōk kha akathi changmak a kae.”

²¹Reuben, Gad khana Nisō Manasseh phung mipui he’n tlaitlâk tinga phung innshunghei hneng anmasôn hei:

²²“Akahratpen Inkhat kha Pathen kae! Ama kha RŌNGPU kae! Akahratpen Inkhat kha Pathen kae! Ama kha RŌNGPU kae! Hivahi heisa mo kantatlo ama’n amanhret, nangni’m nantamanhret sik a kanmadu! RŌNGPU dekna kantloa, taksena kha kannit mak inchu, keini kahringa adamak ruh!

²³Keini’n RŌNGPU kanjuimak a khana romanvâm inthoina, hmuchi inthoina khana inlôikhôm inthoina tlona sik a kanbing sik a maichâm kansyem inchu, RŌNGPU khet in kanchunga akarâk rasoh.

²⁴Kha changmak! Hiva kantatlona ajârpen chu hnung leh hma a nansōn nanpâr he’n keini sōnhei hneng hinga anti sik, ‘RŌNGPU Israelhei Pathen hnenga heimo nantatlo sik aka-om?

²⁵Jordan hi nangni, Reuben khana Gad mihei leh keini hei kâra ramri asyem jo kae. Nangni RŌNGPU leh heite nantatlo sik om mak jo. Khava sōa nangni sōn he’n keini sōn leh pârhei kha RŌNGPU inmuk ankhâm sik jo hei.

²⁶Khava jâra kae keini’n maichâm kantasyem hi, inthoina ro manvâm sik a leh nei tōkna sik changmak,

²⁷khava kanek a, nangni leh keini mipuihei mêrchîkna sik inkhat a, eini kahnunga khangtherhei sik a, ti chu keini’n romanvâm tōknahei leh inthoina khana inlôikhômna tōknahei leh ama Pōn-inn hma kanhong leh RŌNGPU kha kankamuk theina sik a kae.

²⁸Keini mandonna khachu hi kae, hivahi antlo jo’nchu, keini sōn he’n hinga anhongti tor sik, ‘Enruh! Kanpu sōn he’n RŌNGPU maichâm kapō inkhat anleisak. Hivahi romanvâm tōkna sik leh inthoina sik changmak, tâk nangni leh keini hei mêrchîkna sik a kae.

²⁹Keini romanvâm inthoina, hmuchi tōkna, khana inthoinahei seng sik a maichâm syema RŌNGPU kadōia dekna tlomak ni’ung khana tûnhin ama juina bângmak ni’ung. Keini’n ama omna Pōn-inn hmaikunga akangir RŌNGPU maichâm tei loa maichâm ralak syem mak ni’ung.”

³⁰Phinehas thempu leh ale’nṭhōipui, tlaitlâk tinga phung innshung upa, mipuihei hlamkakei 10 hei khan Reuben, Gad leh Nisō langa Manasseh-hei ṭonghri kha anthei pha, anmani katlâi jo hei.

³¹Eleazar sapa Phinehas thempu’n anhnenga ati, “Tûnchu RŌNGPU’n a’nṭhōipui chei ti kanmanhret jo. Nangni ama dōimak jo chei, khana Israel mipuihei RŌNGPU’n akarâk sik heia inphut nanhûk jo.”

³²Khava sōa Phinehas leh hlamkakeihei kha Gilead ram Reuben leh Gad mipuiheia inphut kasesōt heia Canaan ram Israel mipuihei hneng inle jo hei, khana anhnenga thang anvakōi jo.

³³Israelhei kha katlâi jo heia Pathen anmanpâk jo. Reuben leh Gad mipuihei omna ram a re tloa suk manset sik inbek nôk mak jo hei.

³⁴Reuben leh Gad mihe’n anti, “Hiva maichâm hin RŌNGPU hi Pathen kae tina eini nikhenga hnenga sâkhi inkhat a kachang jo.” Khava jâra sâkhi tia anphō jo.