Read Komrem JOSHUA 23 Bible Online

JOSHUA 23 - Komrem bible

JOSHUA 23

¹Pha kasôttak RŌNGPU’n Israel sahei kha ankimvea an-inrepui heia inphut inhrungna aleipek jo hei. Khava pha khan chu Joshua kha leikater hêr jo,

²khava jâra Israel seng ankhenga abek heia, upahei, hlamkakeihei, ṭongkatanhei, mipui ṭōnpui karônhei hnenga ati, “Tûnchu kei kater jo eng.

³Nangni jâra RŌNGPU nan-Pathen in hiva jât-hei seng hnenga heirakip atlo hi nangni’n nanhmu jo. RŌNGPU nan-Pathen in nangni sik re atuk pek jo cheia kae.

⁴Ke’n jât-hlop hei ram alaka-om leh kahlōsō jo hei, nisōa Jordan tuidunga inphut tlaitlâk a Mediterranean Tuipui katlung hi nankarōi sik a kamanchen jo chei.

⁵RŌNGPU nan-Pathen khan anmani kha nangnia inphut ahnong male sik hei, khana nangni hmating nan-injôk pha anmani ahnong sōt sik jo hei, nan-RŌNGPU, Pathen ṭong intepna dungjuia anram kha nanhlō sik jo.

⁶Khava jâra aṭong juina khan inrin ṭhak ruh, khana Moses Dânrabu shunga a’nzet rakip kha tlo ruh. Aṭhen inkhatbek donloa tlomak ruh,

⁷khana hiva mi nankâra aka-om hei leh a’nthlop mak sik chei, khana an-pathenhei rahming nantapan mak sik, khana intepna nannei pha rahminghei kha nanta hmangmak sik, pathenhei kha nantakamuk mak sik, khana anhma a’nkunmak sik chei kae.

⁸Khava kanek a, tûn katlunga nantatlo kapōa, RŌNGPU hneng taksenthei chang ruh.

⁹Nangni hmating nanhei injôk pha RŌNGPU’n akalen akahrat jât-hei kha ahnong sōt jo hei khana tûte inkhat nankadōia nanhmai kunga ngir tor mak a kae.

¹⁰Nangni mi inkhat in mi 1,000 nanhnongsōt tor hei, ajârchu RŌNGPU nan-Pathen khan ale’ntepna kapōa, nangni sik re adōi pek chei.

¹¹RŌNGPU nan-Pathen lungsetna sik a intluk ruh.

¹²Ṭong nanjuimak a nankâra alaka-om jât-hei leh nan-inmat a jōr nan-inloa achang inchu,

¹³nangni hmating nanhong pha RŌNGPU nan-Pathen in hiva jât-hei hi hnongsōt ṭhak mak hei ning ti hi nantamanhret manchên sik kae. Akakhe chet a nangni sik a châng a-emak leh khur kapōa thinathei kachang sik hei khana nankhōna sunga vōkna kapōa kana sik khana nanhmit a rahling tasun kha ka-ang sik hei. Hiva omchen hi RŌNGPU tapek chei ram kaṭha shunga hin nangni inkhatbek nan-om mak kârseng akasōk sik kae.

¹⁴“Tûnchu kei thina sik pha kahong jo. Nangni inkhat et in nanmalung nanrathla shunga RŌNGPU nan-Pathen in akaṭha rakip ale’ntepna dungjuia apek jo chei ti hi manhret ruh. Ale’ntepna rakip kha ama’n atlo jo; inkhatbek akatlasam om mak.

¹⁵Nanhnenga ale’ntepna rakip atlosōt kapōa maṭhitna rakip atlosōt sik kae.

¹⁶Nangni tajui sik a RŌNGPU nan-Pathen in ṭong apek chei intepna kha nanjuimak inchu khana pathen ralak nanrazena nankamuk inchu, ahnuknat a akarâk sik chei, khana hiva apek chei ram kaṭha shunga inrangtak a nangni tûte om mak tin chei.”