Read Komrem JOSHUA 3 Bible Online

JOSHUA 3 - Komrem bible

JOSHUA 3

¹Abân jîngkâra Joshua leh Israel mi rakip in hmatak a kathōi heia, Acacia rephōr kha anleidahlon jo, Jordanna leikase hei, khana khan tuidung kha rakanna sik antlo lai seng khan le’nhnga hei.

²Ni 3 sōa hlamkakei he’n rephōr shunga leikase hei

³khana mipuihei hneng anleiti, “RŌNGPU nan-Pathen Intepna Bôm kha thempu he’n antakadom nanhmu pha, rephōr ṭhet unna ankahnung jui hei ruh.

⁴Hinahin nangni hmalai khan lahong phungmak chei, achang jâra sena sik hlam kha anmanthei sik chei. Tâk Intepna Bôm hnenga chu hnaimak ruh; kilometre inkhat kapō inkâra jui ruh.”

⁵Joshua’n mipuihei hneng ati, “Nanbinga intheng sōtna tlo ruh, ajârchu jîng kania RŌNGPU’n nankâra ṭōn-inlak atlo sik kae.”

⁶Khava sōa ama’n thempuhei kha Intepna Bôm ankadoma mipuihei hmating ansena sik amanthei hei. Ama tahri kapōa anmani’n antlo jo.

⁷RŌNGPU’n Joshua hnenga ati, “Tuninga katlosōt ṭōn hin mikalen inkhat nachangna kajana kha Israel mi rakip hei amannei manphut sik hei, khana ke’n Moses kaleiompui kapōa nang ka-ompui che ti hi anmani’n anhong manhret sik jo.

⁸Intepna Bôm indom hei kha manthei hei ruh khan anmani’n tuidung kha antlung pha, tuipanga dôp kâra akangir sik hei kae.”

⁹Khava sōa Joshua’n mipuihei hneng ati, “Hin hong ruh khana RŌNGPU nan-Pathen in heimo ahri varangei ruh.

¹⁰Nangni’n hmating nan-injôk pha, ama’n Canaan, Hit, Hiv, Periz, Girgash, Amor, Jebush-hei kha ahnong sōt nger sik hei. Ralei pumpui Pathen Intepna Bôm khan nanhma Jordan arakan pha

¹¹akahring Pathen kha nankâra ka-om ti nanhong manhret sik.

¹²Tûnchu Israel phung rakip a, pase inkhat et kadei ruh.

¹³Ralei pumpui RŌNGPU Intepna Bôm indom thempu he’n anke tui anchōn lim leh, Jordan tuilōng kha inting sik, tui ajōng kalōng kha hmun khat a hong inshâng sik.”

¹⁴Khava phat kha sâng khôm pha kae, tuidung khachu tui leikalen. Jordan rakan sik a mipui he’n rephōr anhei dahlon pha, thempu he’n Intepna Bôm ankadoma, anhma kase hei. Thempu he’n tuidung shunga anke anheichōn lim leh

¹⁶tui akalōng kha intinga chungtinga Zarethan hnenga Adam khō katlunga hong inshâng jo. Tuipui Kathia alōng inthla sik kha intingrep jo, mipuihei kha Jericho hnenga tuidung kha anrakan tor jo.

¹⁷Mipui he’n ramchâr kapōa anrakansō mak kârseng, RŌNGPU Intepna Bôm indom thempuhei kha Jordan alaiṭima ramchâra kangira ka-om hei.